নতুন দিল্লী
ডুবাই আন্তঃৰাষ্ট্ৰীয় ষ্টেডিয়ামত বুধবাৰে Captains' Day উদযাপনৰ জৰিয়তে আনুষ্ঠানিকভাৱে আৰম্ভ হয় আইচিচি মহিলা টি-২০ বিশ্বকাপ ২০২৪। নৱম সংস্কৰণৰ মহিলা টি-২০ বিশ্বকাপৰ প্ৰাকক্ষণত ১০টা দলৰ অধিনায়িকাসকলক একত্ৰিত কৰি এক অভিনৱ অনুষ্ঠানৰ আয়োজন কৰা হয়।
আয়োজক চহৰ ডুবাই আৰু শ্বাৰজাহত ১৮ দিনত ২৩খন খেল অনুষ্ঠিত হ’বলগীয়া বিশ্বকাপে মহিলা ক্ৰিকেটক সমগ্ৰ বিশ্বত অধিক জনপ্ৰিয় কৰি তুলিব। নতুন প্ৰজন্মৰ ক্ৰিকেট অনুৰাগীক আইচিচি মহিলা টি-২০ বিশ্বকাপে মনোৰঞ্জন দিয়াৰ সমান্তৰালকৈ আৰু খেলুৱৈসুলভ মানসিকতাৰে অনুপ্ৰাণিত কৰিব।
উল্লেখ্য যে, আই চি চি মহিলা টি-২০ বিশ্বকাপৰ উদ্বোধনী খেলখন বাংলাদেশ আৰু স্কটলেণ্ডৰ মাজত বৃহস্পতিবাৰে বিয়লি ৩.৩০ বজাৰ পৰা শ্বাৰজাহত আৰম্ভ হ’ব। সন্ধিয়া ৭.৩০ বজাৰ পৰা একেখন গ্ৰাউণ্ডতে পাকিস্তানে শ্ৰীলংকাৰ বিৰুদ্ধে খেলিব।
এই বছৰ আইচিচিয়ে অধিনায়কসকলৰ ফটো ছেচন অনুষ্ঠানক এক অনন্য ৰূপ প্ৰদান কৰিছে। ইউ এ ইৰ পৰিৱেশৰ প্ৰতীক ডুবাই ফ্ৰেমৰ আকৰ্ষণীয় পটভূমিত প্ৰতিজন অধিনায়কক ব্যক্তিগতভাৱে প্ৰতিযোগিতাখনৰ বাবে নিজৰ আগ্ৰহ আৰু উত্তেজনা প্ৰদৰ্শন কৰিবলৈ আমন্ত্ৰণ জনোৱা হৈছিল। আমিৰাটৰ চিনাকি আধুনিক স্থাপত্যক ইয়াৰ মৰুভূমি ঐতিহ্যৰ সৈতে সংমিশ্ৰণ কৰা পৰিৱেশটোৱে এই বিশ্বকাপ সংস্কৰণৰ সাংস্কৃতিক বৈচিত্ৰ্যক প্ৰতিফলিত কৰে।
ভাৰতৰ অধিনায়ক হৰমনপ্ৰীত কৌৰে ক্ৰিকেটৰ অবিৰত শিক্ষণ যাত্ৰাৰ ওপৰত আলোকপাত কৰি কয়, "মই ভাবো যে আমি প্ৰতিদিনে কিবা নহয় কিবা নতুন কথা শিকি থাকিম। আপুনি জয়ী হ'লে কেতিয়াবা অনুভৱ কৰে, ঠিক আছে, সেইটো মই অৰ্জন কৰিছো। কিন্তু পিছদিনা খেলিলে সৰু সৰু আৰু ভুল ওলাব পাৰে। মই ভাবো সেইটো খেলৰ অংশ। শিক্ষা গ্ৰহণ প্ৰক্ৰিয়া কেতিয়াও বন্ধ নহয়, প্ৰতিটো দিনেই শিক্ষা গ্ৰহণৰ দিন। প্ৰতিখন খেলৰ পৰা অহৰহ অভিজ্ঞতা লাভ কৰি আছো। মোৰ চৌপাশৰ মানুহে আমাৰ দলটোক আমি যি স্তৰত উপনীত হ’ব বিচাৰো, সেই স্তৰলৈ লৈ যাবলৈ সহায় কৰি আছে আৰু কঠোৰ পৰিশ্ৰম কৰি আছে। দলটোৱে সৰু সৰু লক্ষ্যবোৰো লাভ কৰিবলৈ যি কঠোৰ পৰিশ্ৰম কৰিছে তাত মই সুখী।"
অষ্ট্ৰেলিয়াৰ অধিনায়ক এলিছা হিলীয়ে মহিলা টি-২০ বিশ্বকাপক লৈ কয়, "আজি ইয়াত ১০টা দল আছে যিবোৰ ইয়াত থকাৰ যোগ্য আৰু প্ৰতিটো দলৰে বিশ্বকাপ জয়ৰ ক্ষমতা আছে। আপুনি ইয়ালৈ খিতাপ ৰক্ষা কৰিবলৈ নাহে, বিশ্বকাপৰ অৰ্থ সেইটো নহয়, আপুনি সেইটো জিকিবলৈ আহে। আমাৰ দলটো যথেষ্ট কৌশলী। ট্ৰফী তুলিবলৈ আমি এই বহু দলৰ প্ৰত্যাহ্বান পাৰ হৈ যাব লাগিব, আৰু এই প্ৰত্যাহ্বানৰ বাবে আমি উৎসাহিত।"
ৱেষ্ট ইণ্ডিজৰ অধিনায়ক হেলি মেথিউছে বিশ্বকাপৰ দীঘলীয়া প্ৰস্তুতিৰ ওপৰত চিন্তা কৰি কয়, "বিশ্বকাপৰ বাবেই আমি গোটেই বছৰটো প্ৰস্তুতি চলাই থাকো, আৰু এইটোৱেই হৈছে দল হিচাপে সফলতাৰ শিখৰত উঠাৰ এক দুৰ্বাৰ সপোন। প্ৰতিটো ছিৰিজ, প্ৰতিটো প্ৰশিক্ষণৰ লক্ষ্য হৈছে বিশ্বকাপ জয়। ই এক দীঘলীয়া প্ৰক্ৰিয়া, কিন্তু ৱেষ্ট ইণ্ডিজৰ দল হিচাপে আমি বহুদিনৰ পৰাই ইয়াৰ ওপৰত চকু ৰাখিছো। আমি সফলতাক লৈ যথেষ্ট আশাবাদী।"
বাংলাদেশৰ অধিনায়ক নিগাৰ চুলতানাই বাংলাদেশৰ পৰা ইভেণ্টটো স্থানান্তৰিত কৰাৰ প্ৰাৰম্ভিক হতাশা স্বীকাৰ কৰে যদিও আশাবাদী হৈ থাকে। "প্ৰথমতে হতাশা অনুভৱ কৰিছিলো, কিন্তু আমি পেছাদাৰী খেলুৱৈ। এতিয়া, আমি ইয়াত আছো আৰু খেলক লৈ মনোনিৱেশ কৰিছো। মই বহুত দৰ্শকৰ উপস্থিতি আশা কৰিছো, বিশেষকৈ যিহেতু শ্বাৰজাহত বাংলাদেশী লোক বহুত আছে। এনে এটা ইভেণ্টত খেলি থকা সময়ত অধিক দৰ্শকে আহি আমাক সমৰ্থন জনাব বুলি মই আশা কৰিছো।"-তেওঁ কয়।
স্কটলেণ্ডৰ অধিনায়ক কেথ্ৰিন ব্ৰাইছে তেওঁলোকৰ প্ৰতিযোগিতামূলক মনোভাৱৰ ওপৰত গুৰুত্ব আৰোপ কৰি কয়, "আমি এই প্ৰতিযোগিতাত তীব্ৰ প্ৰতিদ্বন্দ্বিতা আগবঢ়াব বিচাৰো। আমি কোৱালিফায়াৰ ৰাউণ্ডত কল্পনাতীত প্ৰদৰ্শন আগবঢ়াইছিলো, আৰু আমি ভাল প্ৰদৰ্শনেৰে ডাঙৰ মঞ্চত নিজকে প্ৰমাণ কৰাৰ লক্ষ্য লৈছো।"
ইংলেণ্ডৰ অধিনায়ক হিদাৰ নাইটে তেওঁৰ নেতৃত্বৰ প্ৰত্যাহ্বান আৰু উন্নতিৰ বিষয়ে আলোচনা কৰি কয়, "নেতৃত্বৰ দায়িত্ব এটা নিৰন্তৰ প্ৰত্যাহ্বান। আপুনি সদায় শিকি থাকে, খাপ খাই থাকে আৰু উন্নতি কৰি গৈ থাকে। সময়ৰ লগে লগে আপুনি সতীৰ্থসকলক আপোনাৰ বাৰ্তাসমূহ বিভিন্ন ধৰণেৰে প্ৰেৰণ কৰিবলৈ শিকে। মোৰ কেইবাজনো প্ৰশিক্ষক আছে, আৰু তেওঁলোকে কথাবোৰ সতেজ কৰি ৰখাত সহায় কৰে। দলটো সদায় বিকশিত হৈ থাকে, যিয়ে সকলো গতিশীল কৰি ৰখাত সহায় কৰে।”
পাকিস্তানৰ অধিনায়ক ফাতিমা ছানাই নেতৃত্বৰ প্ৰতি নিজৰ দৃষ্টিভংগী প্ৰকাশ কৰি কয়, “মই নিজকে উপভোগ কৰিবলৈ, নিজকে প্ৰকাশ কৰিবলৈ আৰু অধিনায়ক হিচাপে নিজকে সমৰ্থন কৰিবলৈ চেষ্টা কৰিম। মেনেজমেণ্টে মোক সমৰ্থন কৰে, খেলপথাৰত সাহসী সিদ্ধান্ত ল’বলৈ উৎসাহিত কৰে। মই শান্ত হৈ সেই সিদ্ধান্ত লোৱাৰ লক্ষ্য ৰাখিছো।"
নিউজিলেণ্ডৰ অধিনায়ক ছফীয়া ডেভিনে মহিলা ক্ৰিকেটৰ বিকাশৰ ওপৰত আলোকপাত কৰি কয়, ‘মহিলা ক্ৰিকেটৰ উত্তৰণ সাংঘাতিকভাৱে দেখিবলৈ পোৱা গৈছে। খেলপথাৰৰ ভিতৰে-বাহিৰে সেইবোৰ পৰিলক্ষিত হৈছে। আপুনি এতিয়া দেখিছে যে বলাৰসকলে ধাৰাবাহিকভাৱে ১২০ কিলোমিটাৰ প্ৰতি ঘণ্টা আৰু তাতকৈ অধিক গতিৰে বল কৰি ফিটনেছ আৰু দক্ষতাৰ অগ্ৰগতি দেখুৱাইছে। আমাৰ কেইগৰাকীমান প্ৰতিভাৱান যুৱ বেগী বলাৰ আছে, যিয়ে যোৱা ১২-১৮ মাহত অবিশ্বাস্য উত্থান ঘটাইছে।"
দক্ষিণ আফ্ৰিকাৰ অধিনায়ক লউৰা উলভাৰ্ডে কয়, "যোৱা বছৰটো বৰ ভাল আছিল, কিন্তু আমি এটা সময়ত এখনকৈ খেলত মনোনিৱেশ কৰিছো। আমি এটা কঠিন পুলত আছো, কিন্তু আশাকৰোঁ আমি ছেমি ফাইনেলত প্ৰৱেশ কৰিব পাৰিম, আৰু তাৰ পৰাই যিকোনো হ'ব পাৰে। দলটোৰ পৰিৱৰ্তন হৈছে, কিন্তু নতুন প্ৰশিক্ষক আৰু ষ্টাফৰ সৈতে আমি সুসংগঠিত হৈছো।"
শ্ৰীলংকাৰ অধিনায়ক চামাৰী আটাপাট্টুৱে কয়, "আমি সদায় আণ্ডাৰডগ টেগ লৈ বিশ্বকাপত প্ৰৱেশ কৰি আহিছো। গতিকে, আমাৰ কোনো হেঁচা নাই। মইও মোৰ দলৰ ওপৰত হেঁচা প্ৰয়োগ কৰিব নিবিচাৰো। কেইগৰাকীমান ছিনিয়ৰৰ সৈতে আমাৰ এটা যুৱ দল আছে, আৰু আমি যোৱা ১৬ মাহত ভাল ক্ৰিকেট খেলি আহিছো। এইটো এটা বেলেগ ফৰ্মেট, গতিকে আমি সতেজভাৱে আৰম্ভ কৰিম আৰু এখন এখনকৈ খেলত মনোনিৱেশ কৰিম।"