ক'হিমা
নাগালেণ্ডৰ পেৰালিম্পিক এথলীট হোকাটো হোটোঝে ছেমাই ভাৰতৰ হৈ পেৰালিম্পিক পদক লাভ কৰা ৰাজ্যখনৰ প্ৰথমগৰাকী খেলুৱৈ হিচাপে ইতিহাস ৰচনা কৰিছে।
পুৰুষৰ শ্বট পুট এফ ৫৭ ইভেণ্টত ছেমাই ১৪.৬৫ মিটাৰ ব্যক্তিগত শ্ৰেষ্ঠ থ্ৰ’ৰে ব্ৰঞ্জৰ পদক লাভ কৰে। তেওঁ পূৰ্বৰ পেৰালিম্পিকৰ ১৩.৪৯ মিটাৰ অভিলেখ ভংগ কৰিছিল, যিটো আজাৰবাইজানৰ অলোখান মুছায়েভে স্থাপন কৰিছিল।
ইফালে ইৰাণৰ ইয়াচিন খোছৰাভিয়ে ১৫.৯৬ মিটাৰ থ্ৰ’ৰে স্বৰ্ণ পদক দখল কৰাৰ বিপৰীতে ব্ৰাজিলৰ থিয়াগো প’লিনো ডছ ছান্টোছে ১৫.০৬ মিটাৰ থ্ৰ’ৰে ৰূপৰ পদক লাভ কৰে।
নাগালেণ্ডৰ মুখ্যমন্ত্ৰী নেইফিউ ৰিঅ’ই এক্সত এক পোষ্টেৰে ছেমাক অভিনন্দন জনায়। তেওঁ লিখিছে, "চলি থকা পেৰিছ ২০২৪ পেৰালিম্পিক গেমছত টিম ইণ্ডিয়াৰ বাবে ২৭ সংখ্যক পদক লাভ কৰি শ্বট পুট এফ৫৭ত ব্ৰঞ্জৰ পদক লাভ কৰাৰ বাবে হোকাটো হোটোঝে ছেমাক অভিনন্দন জনাইছো। তেওঁৰ উল্লেখযোগ্য যাত্ৰা আৰু নিষ্ঠাই এই অসাধাৰণ কৃতিত্বৰ সূচনা কৰিছে। তেওঁ এজন প্ৰকৃত প্ৰেৰণা আৰু আদৰ্শস্বৰূপ।"
১৯৮৩ চনৰ ২৪ ডিচেম্বৰত নাগালেণ্ডত জন্মগ্ৰহণ কৰিছিল ছেমাই। চাৰিটা সন্তানৰ ভিতৰত দ্বিতীয় সন্তান হিচাপে তেওঁ কৃষকৰ পৰিয়ালত ডাঙৰ-দীঘল হৈছিল। কিন্তু ২০০২ চনৰ ১৪ অক্টোবৰত কাউণ্টাৰ ইনফিল্ট্ৰেচন অপাৰেচনত জড়িত হৈ মাইন বিস্ফোৰণৰ ফলত তেওঁৰ বাওঁ ভৰিখন আঁঠুৰ তলত হেৰাই যায়।
