আৱাজ-দ্য ভইচ ব্যুৰ'
পৱিত্ৰ ৰমজান মাহৰ এই পবিত্ৰ সময়ত ভাৰতীয় ক্ৰিকেটৰ উজ্বল নক্ষত্ৰ স্বৰূপ চৈয়দ আবিদ আলীৰ দেহৱসান ঘটে। ৮৩ বছৰ বয়সত কেলিফৰ্ণিয়াত তেওঁৰ মৃত্যু হয়। চৈয়দ আবিদ আলী আছিল ভাৰতীয় ক্ৰিকেটৰ ৭০ দশকৰ এজন উল্লেখযোগ্য ক্ৰিকেটাৰ। তেওঁ ১৯৬৭ চনৰ পৰা ১৯৭৪ চনৰ ভিতৰত ভাৰতৰ হৈ তেওঁ ২৯ খন টেষ্ট মেচ খেলিছিল।
মেডিয়াম পেচ বলাৰ হিচাপে দক্ষতা, উৎকৃষ্ট ফিল্ডিং, উইকেটৰ মাজত দ্ৰুত বেগত দৌৰাৰ বাবে আবিদ আলী পৰিচিত আছিল। ক্ৰিকেটত তেওঁৰ এটা স্মৰণীয় মুহূৰ্ত আছিল ১৯৭১ চনত, যেতিয়া ইংলেণ্ডত বিৰুদ্ধে ভাৰতে প্ৰথমবাৰৰ বাবে শৃংখলা জয় হৈছিল আৰু আবিদ আলীয়ে ভাৰতৰ হৈ ৮ নং স্থানৰ পৰা বেটিং কৰি বিজয়ী ৰান সংগ্ৰহ কৰিছিল।
শৃংখলা জয়ী হোৱাৰ পিছত দৰ্শকৰ মাজত আবিদ আলী
১৯৭১ চনত আবিদ আলীয়ে এটা দৰ্শনীয় “স্কোয়াৰ কাট” শ্বট মাৰি অন্তিম বিজয়ী ৰান সংগ্ৰহ কৰিছিল। বলটো বাউণ্ডেৰী নাপাওঁতে উত্তেজিত দৰ্শক তথা অনুৰাগীসকলে উৎফুল্লিত হৈ খেলপথাৰত দৌৰি আহি বিজয় উল্লাস কৰিছিল বুলি ই এছ পি এনক্ৰিচিনফ’ই প্ৰকাশ কৰিছে।
আবিদ আলীয়ে ১৯৭৪ চনৰ পৰা ১৯৭৫ চনৰ ভিতৰত ভাৰতৰ হৈ পাঁচখন এদিনীয়া আন্তঃৰাষ্ট্ৰীয় (এদিনীয়া) মেচও খেলিছিল। আচলতে এই মেচকেইখন আছিল ভাৰতৰ প্ৰথম পাঁচখন এদিনীয়া।
আবিদ আলীয়ে ২৯ খন টেষ্ট মেচত ৪৭ টা উইকেট দখল কৰিছিল। তেওঁৰ সৰ্বোত্তম প্ৰদৰ্শন আছিল অভিষেকৰ সময়ত, য’ত তেওঁ এডিলেইডত অষ্ট্ৰেলিয়াৰ বিৰুদ্ধে ৫৫ ৰানত ৬ উইকেট দখল কৰিছিল। মেডিয়াম পেচাৰ হিচাপে তেওঁৰ বিভিন্ন ধৰণৰ বলিং কৌশল আছিল, যাৰ বাবে বেটছমেনসকলৰ বাবে তেওঁৰ বিৰুদ্ধে ৰান সংগ্ৰহ কৰাটো কঠিন হৈ পৰিছিল। টেষ্ট মেচতো তেওঁ ছয়টা অৰ্ধশতকৰ স্ক’ৰ কৰিছিল, য’ত তেওঁৰ অভিষেক শৃংখলাৰ সময়ত ছিডনীত দুটা অৰ্ধশতক অৰ্জন কৰিছিল।
ক্ৰিকেটাৰ আবিদ আলী
আবিদ আলীক এগৰাকী অলৰাউণ্ডাৰ বুলি গণ্য কৰিব পাৰি কাৰণ তেওঁ অ’পেনাৰ হিচাপে দুটা অৰ্ধশতক অৰ্জন কৰিছিল। লগতে তেওঁ ৫৩ টা টেষ্ট ইনিংছৰ ভিতৰত ২১ টাত ট'প অৰ্ডাৰত বেটিং কৰিছিল। মুঠতে তেওঁ টেষ্ট ক্ৰিকেটত ১০১৮ ৰান সংগ্ৰহ কৰিছিল আৰু গড় হিচাপত ২০.৩৬ ৰান হৈছিল। ছিডনীত তেওঁৰ নতুন বলৰ বিৰুদ্ধে সাহসী আৰু আক্ৰমণাত্মক বেটিং কৰি দুটা অৰ্ধশতক অৰ্জন কৰাটো উল্লেখযোগ্য আছিল, যিটো মেচৰ প্ৰতিবেদনত উল্লেখ কৰা হৈছে। সমগ্ৰ কেৰিয়াৰত তেওঁ ভাৰতৰ হৈ ৪, ১০ আৰু ১১ নম্বৰৰ বাহিৰে প্ৰায় প্ৰতিটো স্থানতে বেটিং কৰিছিল।
উৎকৃষ্ট ফিটনেছ আৰু অসাধাৰণ ফিল্ডিঙৰ বাবে আবিদ আলী পৰিচিত আছিল। তেওঁৰ ই এছ পি এন ক্ৰিচিনফ’ প্ৰফাইল অনুসৰি তেওঁৰ আছিল নাহৰফুটুকীৰ দ্ৰুততা, মাৰাথন দৌৰবিদৰ দৰে ষ্টেমিনা আৰু ডেকাথলীটৰ দৃঢ়তা। অৱশ্যে তেওঁৰ দুৰ্ভাগ্য আছিল যে তেওঁ এনে এটা সময়ত খেলিছিল যেতিয়া এদিনীয়া ক্ৰিকেট ইমান জনপ্ৰিয় নাছিল। তেওঁৰ খেলৰ শৈলী এদিনীয়া ক্ৰিকেটৰ বাবে নিখুঁত আছিল। তেওঁ দ্ৰুত মধ্যমীয়া গতিৰে বলিং কৰিছিল, সাংঘাতিক ফিল্ডিং কৰিছিল আৰু তেওঁ আছিল এজন গতিশীল লোৱাৰ অৰ্ডাৰৰ বেটছমেন যিয়ে উইকেটৰ মাজত অবিশ্বাস্য গতিৰে দৌৰিছিল। যেন উইকেটৰ মাজত স্কেটত গ্লাইডিং কৰিছে।
বেটিং কৰি থকা মুহূৰ্তত আবিদ আলী
বিশেষকৈ যেতিয়া খেলুৱৈসকলৰ বাবে ফিটনেছ ভাল কৰি ৰখাটো নিয়ম নাছিল তেতিয়া আবিদ আলীয়ে ফিটনেছৰ ওপৰত যথেষ্ট গুৰুত্ব দিছিল। এই নিষ্ঠাই তেওঁক এজন দুৰ্দান্ত ফিল্ডাৰ হিচাপে পৰিগণিত কৰিছিল। তেওঁ আউটফিল্ডৰ পৰা সঠিক ফ্লেট থ্ৰ’ৰ বাবে সুনাম অৰ্জন কৰিছিল। আবিদ আলীৰ প্ৰাইমৰ সময়ত হায়দৰাবাদত এজন যুৱ ক্ৰিকেটাৰ হিচাপে কৰ্মৰত ই এছ পি এন ক্ৰিচিনফ’ৰ প্ৰাক্তন স্তম্ভলেখক ভি ৰামনাৰায়ণে স্মৰণ কৰে যে আবিদৰ তীব্ৰ প্ৰশিক্ষণ ৰুটিন কিংবদন্তিৰ বস্তু হৈ পৰিছিল। কাহিনীবোৰ প্ৰায়ে অতিৰঞ্জিত কৰা হৈছিল যদিও ক্ৰিকেট খেলপথাৰত দীৰ্ঘদিন ধৰি বৰ মনোৰঞ্জন প্ৰদান কৰিছিল।
খেলপথাৰত সকলোসময়তে আবিদ আলী উৎসাহিত থাকিছিল। ভি ৰামনাৰায়ণে উল্লেখ কৰা মতে যি সময়ত বেছিভাগ বলাৰেই নিজৰ আৱেগক নিয়ন্ত্ৰণত ৰাখিছিল সেই সময়ত তেওঁ অতি প্ৰকাশভংগী আছিল। উইকেট হেৰুৱাই ভগৱানৰ ওচৰত তেওঁৰ নাটকীয় আবেদন আৰু ভাগ্য ভাল হোৱা বেটছমেনৰ প্ৰতি তেওঁৰ কটু হাঁহিয়ে তেওঁক স্মৰণীয় ব্যক্তিত্ব কৰি তুলিছিল।
তেওঁৰ কেৰিয়াৰৰ এটা উল্লেখযোগ্য কাণ্ড সংঘটিত হৈছিল যেতিয়া ক্ৰাইষ্টচাৰ্চত নিউজিলেণ্ডৰ বিৰুদ্ধে টেষ্ট মেচৰ সময়ত তেওঁৰ বলিং একচনটো থ্ৰ’ৰ হোৱা বুলি ন’বল দিয়া হৈছিল।
বেটিং কৰি থকা মুহূৰ্তত আবিদ আলী
যদিও আবিদ আলী কেতিয়াও ভাৰতীয় ক্ৰিকেটত এটা ডাঙৰ নাম হোৱা নাছিল, আংশিকভাৱে ভাৰতৰ বিখ্যাত স্পিন আধিপত্য থকা যুগত প্ৰতিযোগিতাত অংশগ্ৰহণ কৰাৰ বাবেই তেওঁ হায়দৰাবাদৰ বাবে আছিল এক গুৰুত্বপূৰ্ণ খেলুৱৈ। ২০টা ছিজনত তেওঁ ২১২ খন প্ৰথম শ্ৰেণীৰ মেচ খেলি ৩৯৭ টা উইকেট দখল কৰি ৮,৭৩২ ৰান সংগ্ৰহ কৰি ১৩ টা শতক আৰু ৪১টা অৰ্ধশতক ৰান সংগ্ৰহ কৰে। ১৯৭৪ চনত শেষৰখন টেষ্ট, ১৯৭৫ চনত অন্তিমখন এদিনীয়া আৰু ১৯৭৮-৭৯ চনত শেষবাৰৰ বাবে প্ৰথম শ্ৰেণীৰ খেল খেলিছিল।
বিচিচিআইৰ সভাপতি ৰজাৰ বিনিয়ে আবিদ আলীক এজন প্ৰকৃত অলৰাউণ্ডাৰ আখ্যা দি শোক প্ৰকাশ কৰে, যাৰ অৱদান সত্তৰৰ দশকত ভাৰতৰ জয়ৰ ক্ষেত্ৰত সদায় স্মৰণীয় হৈ থাকিব।
অৱসৰ লোৱাৰ পিছত আবিদ আলীয়ে ৰঞ্জি ট্ৰফীত অন্ধ্ৰ প্ৰদেশৰ প্ৰশিক্ষক হিচাপে কাম কৰিছিল আৰু ইউ এ ই আৰু মালদ্বীপৰ সৈতেও প্ৰশিক্ষক হিচাপে কাম কৰে। মৃত্যুৰ সময়ত তেওঁ পৰিয়ালৰ সৈতে কেলিফৰ্ণিয়াৰ ট্ৰেচিত বাস কৰিছিল।
