আৱাজ দ্য ভইচ
হাৰিয়ানাৰ নুহ জিলাৰ চান্দৈনী গাঁৱৰ অৱসৰপ্ৰাপ্ত ব্লক উন্নয়ন বিষয়া লিয়াকত খানে অহা ১৪ অক্টোবৰত আহমেদাবাদত পাকিস্তান আৰু ভাৰতৰ মাজত অনুষ্ঠিত হ’বলগীয়া বিশ্বকাপৰ খেলখনলৈ অতি আগ্ৰহী। ইয়াৰ এক বিশেষ কাৰণ আছে। দুবছৰৰ পাছত তেওঁ পাকিস্তানী ক্ৰিকেটাৰ তথা জোঁৱাই হাছান আলী, কন্যা আৰু নাতিনীয়েকক লগ কৰিবলৈ সুবিধা পাইছে।
হাছান আলীৰ পত্নী ছমিয়া খান হাৰিয়ানাৰ নুহ জিলাৰ চন্দাইনী গাঁৱৰ। ২০১৯ চনত আবুধাবিত বিবাহপাশত আবদ্ধ হয় ছামিয়া আৰু হাছান আলীয়ে। তাৰ পিছৰ পৰা ছমিয়া খান এতিয়ালৈ ভাৰতলৈ অহা নাই। লিয়াকত আলী খানও কন্যাৰ বিয়াৰ বাবে আবুধাবিলৈ গৈছিল আৰু তেতিয়াৰে পৰা সাক্ষাৎ হোৱা নাই।
হাছান আলীৰ শহুৰেক লিয়াকত আলী খানে কয়, "মোৰ পত্নী ২০২১ চনত পাকিস্তানলৈ গৈছিল, যেতিয়া মোৰ ছোৱালী গৰ্ভৱতী আছিল। আশা কৰো আহমেদাবাদত পুনৰ লগ হ'ম। নাতিক লগ পাবলৈ বৰ উৎসাহিত হৈ আছোঁ।"
উল্লেখযোগ্য যে, বেগী বলাৰ হাছান আলীক বিশ্বকাপৰ বাবে ৰাষ্ট্ৰীয় দলত নিৰ্বাচিত কৰাটোও আকস্মিকভাৱে ঘটিছিল। ইয়াৰ পূৰ্বে হাছান আলী বিশ্বকাপৰ বাবে পাকিস্তান দলৰ অংশ নাছিল যদিও এছিয়া কাপত নছিম শ্বাহৰ আঘাতৰ পিছত তেওঁক দলত স্থান দিয়া হৈছে, তাৰ পিছত এই দুয়োটা পৰিয়ালে আত্মীয়সকলক লগ পোৱাৰ সুযোগ পাইছে।
লিয়াকত খানে লগতে কয়, "মই মোৰ জীৱনটো কলেজৰ দিনত পঢ়া ৰুমীৰ কথা স্মৰণ কটাওঁ, যিয়ে মোৰ হৃদয়ৰ কথা শুনে, ভিৰৰ কথা নহয়। মোৰ ছোৱালীজনীয়ে এমিৰেটছ এয়াৰলাইন্সত ফ্লাইট ইঞ্জিনিয়াৰ হিচাপে কাম কৰে। ইয়াৰ পিছত ডুবাইত হাছান আলীক লগ পায়। ছামিয়াই মোক হাছানৰ কথা ক’লে। তাইৰ সিদ্ধান্তত মই সন্মতি দিছিলোঁ।"
জীয়েক আৰু জোঁৱাইকৰ বাবে ভাৰত পাকিস্তানৰ মেচত তেওঁ কাক সমৰ্থন কৰিব? এই বিষয়ে সোধাত তেওঁ কয়, "সুনীল গাভাস্কাৰ, কপিল দেৱ, শচীন তেণ্ডুলকাৰ, মহম্মদ আজহাৰুদ্দিনক খেলা দেখিছোঁ। মই বিৰাট কোহলীৰ অনুৰাগী। বিৰাট কোহলীক মোৰ বৰ ভাল লাগে।"
৬৩ বছৰীয়া অৱসৰপ্ৰাপ্ত আমোলাগৰাকীয়ে কয়, "মই নাভাবো যে এই সময়ত বিৰাট কোহলীতকৈ ভাল খেলুৱৈ আছে। মাজতে তেওঁ ফৰ্মত নাছিল যদিও তেওঁ পুনৰ ফৰ্মত আহি ভাল খেল দেখুৱাই আছে। হাছানক লগ পালে তেওঁৰ দলৰ খেলুৱৈ সকলৰ লগত মোক চিনাকি কৰাই দিবলৈ অনুৰোধ কৰিম। বিৰাট কোহলীৰ লগত ফটো এখন তুলিব আৰু ৰাহুল দ্ৰাবিড়ক নমস্কাৰ জনাব বিচাৰোঁ।"
লিয়াকত খানে কয় যে ভাৰত আৰু পাকিস্তানৰ মাজত সু-সম্পৰ্কৰ বাবে প্ৰাৰ্থনা নকৰা এটা দিনো নাযায়। তেওঁ কয়, আল্লাহৰ ওচৰত মোৰ একমাত্ৰ প্ৰাৰ্থনা হ'ল দুয়োখন দেশৰ সম্পৰ্ক উন্নত হওক। ভাৰত আৰু পাকিস্তানৰ মাজত পাৰস্পৰিক শৃংখলাৰ কামনা কৰি, তেওঁ ক’লে, মই ভাৰত আৰু পাকিস্তানৰ মাজত আৰু অধিক ক্ৰিকেট বিচাৰো।
আশা কৰোঁ হাছানে কোনোবাদিনা দিল্লীত খেলিব আৰু আমি তেওঁক আমাৰ ঘৰত আতিথ্য দিব পাৰিম। মোৰ ছোৱালী আমাৰ ঘৰত থাকিব পাৰিব। এজন পিতৃয়ে সেইটোৱেই বিচাৰে।
