এ আৰ ৰহমানলৈ ট্ৰিনিটি লাবান কনজাৰ্ভেটৰী অৱ মিউজিক এণ্ড ডান্সৰ সন্মানীয় সভাপতি পদ আগবঢ়োৱাৰ মুহূৰ্ত
লণ্ডন
সংগীত, সংগীত নাট্য, আৰু সমসাময়িক নৃত্যৰ উদ্ভাৱনীমূলক কাৰ্যসূচীৰ বাবে পৰিচিত লণ্ডনৰ ট্ৰিনিটি লাবান কনজাৰ্ভেটৰী অৱ মিউজিক এণ্ড ডান্সৰ সন্মানীয় সভাপতি হিচাপে নিযুক্তি দিয়া হৈছে ভাৰতৰ বিখ্যাত সুৰকাৰ আৰু অস্কাৰ বঁটা বিজয়ী সংগীতজ্ঞ এ আৰ ৰহমানক। ভাৰতীয় আৰু আন্তঃৰাষ্ট্ৰীয় সংগীত জগতত সুকীয়া স্থান দখল কৰা ৰহমানে পাঁচ বছৰৰ বাবে এই সন্মানীয় পদবীত কাৰ্যনিৰ্বাহ কৰি পৰিবেশন কলাৰ জগতখনত তেওঁৰ প্ৰভাৱ আৰু অধিক শক্তিশালী কৰি তুলিব।
একাডেমী বঁটা বিজয়ী স্কোৰ আৰু সংগীত নাট্যৰ অগ্ৰণী কামৰ বাবে পৰিচিত সংগীত কিংবদন্তিগৰাকীয়ে এই সন্মানক ভাৰতৰ সংগীত আৰু পৰিবেশন কলাৰ ভৱিষ্যতৰ বাবে তেওঁৰ দৃষ্টিভংগীক বাস্তৱায়িত কৰাৰ দিশত এক পদক্ষেপ হিচাপে গ্ৰহণ কৰিছে।
এই সন্মান গ্ৰহণ কৰি এ আৰ ৰহমানে ২০০০ চনত কিংবদন্তি সুৰকাৰ এণ্ড্ৰু লয়ড ৱেবাৰক লগ পোৱাৰ এটা উল্লেখযোগ্য মুহূৰ্তৰ কথা মনত পেলাই তেওঁৰ সংগীত নাট্যৰ যাত্ৰাৰ কথা ব্যক্ত কৰে। ৰহমানে স্মৰণ কৰি কয়, “যেতিয়া মই মিউজিকেল থিয়েটাৰৰ ৰজা এণ্ড্ৰু লয়ড ৱেবাৰক লগ পাইছিলো, তেতিয়া তেওঁ মোক আকস্মিকভাৱে সুধিছিল, আপুনি মিউজিকেল থিয়েটাৰৰ উত্তৰাধিকাৰ আগুৱাই নিব পাৰিবনে। সেই সময়ত মই ইয়াৰ অৰ্থ ভালকৈ বুজা নাছিলো। কিন্তু ব্ৰডৱেত বম্বে ড্ৰিমছ আৰু ইংলেণ্ড আৰু কানাডাত দ্য লৰ্ড অৱ দ্য ৰিংছৰ দৰে প্ৰজেক্টত কাম কৰাৰ লগে লগে তেওঁৰ দৃষ্টিভংগীৰ গভীৰতা মই উপলব্ধি কৰিবলৈ ধৰিলোঁ। ই আছিল এক গুৰুত্বপূৰ্ণ আৰু দূৰদৰ্শী চিন্তা।”
সংগীত নাট্যৰ ক্ষেত্ৰখনত ভাৰতৰ ভৱিষ্যত উজ্জ্বল বুলি ৰহমানে বিশ্বাস কৰে যদিও ঘৰতে প্ৰতিভাক লালন-পালন কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ কয়, ‘যদি আমি আমাৰ প্ৰতিভাত বিনিয়োগ কৰি সঠিক আন্তঃগাঁথনি গঢ়ি তোলোঁ, তেন্তে আমি ভাৰতত মনোৰঞ্জনৰ এক সম্পূৰ্ণ নতুন ধাৰা মুকলি কৰিব পাৰিম। কিন্তু মই অকলে কৰিব নোৱাৰো। মোক চৰকাৰী সমৰ্থন, কলা-কুশলী, সংগীতজ্ঞসকলৰ বাবে ইনচেণ্টিভ, আৰু এই কামবোৰক সমৰ্থন কৰিবলৈ আন্তঃগাঁথনিৰ প্ৰয়োজন। আমি এতিয়া প্ৰযুক্তিগত সংযোগস্থলত আছো, য’ত সহজেই ভিজুৱেল সৃষ্টি কৰিব পাৰি, কিন্তু লাইভ অনুষ্ঠানৰ যাদুকৰী প্ৰদৰ্শনৰ সৈতে একোৱেই তুলনা কৰিব নোৱাৰি।”
উল্লেখ্য যে, আহি থকা নতুন বছৰত এ আৰ ৰহমানৰ মেগা প্ৰজেক্টসমূহৰ ভিতৰত আছে চাভা (Chhava), লাহোৰ ১৯৪৭ (Lahore 1947), গান্ধী ছিৰিজ, ইমতিয়াজ আলী আৰু মণি ৰত্নমৰ সৈতে আন কিছু প্ৰজেক্ট।
