নতুন দিল্লী
প্ৰায় ছমাহ ধৰি কাৰাগাৰত থকা দিল্লীৰ মুখ্যমন্ত্ৰী অৰবিন্দ কেজৰিৱালে শুকুৰবাৰে তিহাৰ জেলৰ পৰা ওলাই আহিল।
“প্ৰথমে মই ঈশ্বৰক ধন্যবাদ জনাইছো যাৰ আশীৰ্বাদত মই ইয়াত থিয় হৈ আছো। এই প্ৰচণ্ড বৰষুণত ইয়ালৈ অহা লাখ-কোটি লোকক ধন্যবাদ জনাইছো।" - ঘণ্টাৰ পিছত ঘণ্টা ধৰি তেওঁৰ বাবে অপেক্ষা কৰি থকা আম আদমী পাৰ্টিৰ সমৰ্থকসকলক দিয়া ভাষণত কেজৰিৱালে এইদৰে কয়। দিল্লীৰ সুৰা কেলেংকাৰীৰ অভিযোগত কেন্দ্ৰীয় তদন্তকাৰী ব্যুৰোৱে (চিবিআই) দাখিল কৰা দুৰ্নীতিৰ গোচৰত উচ্চতম ন্যায়ালয়ে তেওঁক জামিন প্ৰদান কৰে।
"মোৰ তেজৰ প্ৰতিটো টোপাল ৰাষ্ট্ৰৰ বাবে উৎসৰ্গিত। অসুবিধাৰ সন্মুখীন হ’লোঁ যদিও ঈশ্বৰ সদায় মোৰ লগত আছে। মোৰ মনোবল ভাঙিবলৈ মোক জেলত ভৰাই থৈছিল, কিন্তু মোৰ মনোবল আগতকৈ বেছি হ'ল; কাৰাগাৰে মোক দুৰ্বল কৰিব নোৱাৰে।"
"তেওঁলোকে মোক জেলত ভৰাই দিলে, কেজৰিৱালক কাৰাগাৰত ৰাখিলে তেওঁৰ মনোবল ভাঙিব বুলি ভাবিছিল। আজি মই আপোনালোকক কব বিচাৰিছো যে মই জেলৰ পৰা ওলাই আহিছো, মোৰ মনোবল ১০০ গুণ বৃদ্ধি পাইছে। মোৰ শক্তি ১০০ গুণ বৃদ্ধি পাইছে।" - কেজৰিৱালে লগতে কয়।
কেজৰিৱালে কয় যে তেওঁ দেশখনক দুৰ্বল কৰাৰ চেষ্টা কৰা “জাতী বিৰোধী শক্তি”ৰ সৈতে যুঁজি থাকিব। যোৱা ২৬ জুনত চিবিআইয়ে দুৰ্নীতিৰ গোচৰত গ্ৰেপ্তাৰ কৰিছিল আপৰ আহ্বায়কগৰাকীক। তেওঁৰ গ্ৰেপ্তাৰক সমৰ্থন কৰা দিল্লী উচ্চ ন্যায়ালয়ৰ নিৰ্দেশক তেওঁ উচ্চতম ন্যায়ালয়ৰ সন্মুখত প্ৰত্যাহ্বান জনাইছিল।
২১ মাৰ্চত দিল্লীৰ মুখ্যমন্ত্ৰীক গ্ৰেপ্তাৰ কৰা বলবৎকাৰী সঞ্চালকালয়ে (ইডি) দাখিল কৰা ধন সৰবৰাহৰ গোচৰত উচ্চতম ন্যায়ালয়ে কেজৰিৱালক অন্তৱৰ্তীকালীন জামিন প্ৰদান কৰিছিল।
কেজৰিৱালক জামিন মঞ্জুৰ কৰাৰ সময়ত শীর্ষ আদালতে তেওঁক গোচৰৰ গুৰুত্ব সন্দৰ্ভত কোনো ৰাজহুৱা বক্তব্য নিদিবলৈ নিৰ্দেশ দি কয় যে ইডি গোচৰত জাৰি কৰা চৰ্ত আৰু নিয়ম ইয়াতো প্ৰযোজ্য হ’ব।
উচ্চতম ন্যায়ালয়ে লগতে কয় যে লেফটেনেণ্ট গৱৰ্ণৰৰ অনুমোদন লাভৰ বাবে একেবাৰে প্ৰয়োজনীয় নহ’লে কেজৰিৱালে নিজৰ কাৰ্যালয় বা দিল্লী সচিবালয়লৈ গৈ কোনো চৰকাৰী ফাইলত স্বাক্ষৰ কৰিব নোৱাৰে।
