কলকাতা
যোৱা মাহত কলকাতাৰ আৰ জি কাৰ মেডিকেল কলেজ এণ্ড হস্পিতালত এগৰাকী প্ৰশিক্ষাৰ্থী চিকিৎসকক ধৰ্ষণ আৰু হত্যাৰ অভিযোগৰ তদন্ত চলাই থকা কেন্দ্ৰীয় তদন্তকাৰী সংস্থাই কলকাতাৰ বিচাৰ আদালতত দাখিল কৰা ৰিমাণ্ড নোটত “দলবদ্ধ ধৰ্ষণ”ৰ কথা উল্লেখ কৰা নাই।
এই গোচৰৰ প্ৰাৰম্ভিক পৰ্যায়ত তদন্ত কৰি থকা কলকাতা আৰক্ষীয়ে যোৱা ৯ আগষ্টত ভাৰতীয় ন্যায় সংহিতাৰ ৬৪ (ধৰ্ষণ) আৰু ১০৩ (১) (হত্যা) ধাৰাত প্ৰথম তথ্য প্ৰতিবেদন (এফআইআৰ) দাখিল কৰিছিল। পিছত যেতিয়া কলিকতা উচ্চ ন্যায়ালয়ে এই গোচৰৰ তদন্তৰ নিৰ্দেশ দিয়ে চিবিআইয়ে একেবোৰ ধাৰাত এফআইআৰ ৰুজু কৰে। শিয়ালদাহৰ অতিৰিক্ত মুখ্য ন্যায়িক দণ্ডাধীশ (এচিজেএম) আদালতে সঞ্জয় ৰায়ক ১৪ দিনৰ ন্যায়িক জিম্মালৈ প্ৰেৰণ কৰে।
“শুকুৰবাৰে এচিজেএম আদালতৰ সন্মুখত ৰয়ৰ ন্যায়িক জিম্মা বিচৰাৰ সময়ত সংস্থাটোৱে ৰিমাণ্ড নোটত বিএনএছৰ ধাৰা ৭০ (১) (দলবদ্ধ ধৰ্ষণৰ বাবে ধাৰা) অন্তৰ্ভুক্ত কৰা নাছিল যিয়ে ইংগিত দিয়ে যে এতিয়ালৈকে ৰায়ই এই গোচৰৰ একমাত্ৰ অভিযুক্ত।" - এই সবিশেষৰ বিষয়ে অৱগত এজন বিষয়াই সংবাদ মাধ্যমক এইদৰে কয়।
অৱশ্যে ৰায়ে এচিজেএম আদালতৰ সন্মুখত দাবী কৰিছে যে তেওঁক প্ৰৱন্ধিত কৰা হৈছে।
অৱশ্যে বিষয়াগৰাকীয়ে কয় যে তদন্ত কেনেদৰে চলি আছে তাৰ ওপৰত নিৰ্ভৰ কৰি গোচৰৰ যিকোনো পৰ্যায়তে তদন্তকাৰীয়ে শাস্তিমূলক ধাৰা সংযোজন কৰিব পাৰে। যদিও প্ৰথম অৱস্থাত কলকাতা আৰক্ষীৰ ডিটেকটিভ বিভাগে গোচৰটো চম্ভালিছিল, তথাপিও কলিকতা উচ্চ ন্যায়ালয়ৰ পিছত দিয়া নিৰ্দেশৰ ভিত্তিত ১৩ আগষ্টৰ পৰা চিবিআইয়ে ইয়াৰ তদন্ত চলাই আহিছে।
এই সন্দৰ্ভত কোনো চিবিআইৰ বিষয়াই মন্তব্য কৰা নাই।
এই গোচৰত এতিয়ালৈকে গ্ৰেপ্তাৰ হোৱা একমাত্ৰ ব্যক্তি হৈছে ৰায়। অপৰাধৰ এদিন পিছতে কলকাতা আৰক্ষীয়ে তেওঁক গ্ৰেপ্তাৰ কৰে। পিছত গোচৰটো চিবিআইক গতাই দিয়ে।
"আমাৰ তদন্তত দেখা গ’ল যে এই অপৰাধৰ সৈতে জড়িত একমাত্ৰ ব্যক্তি ৰয়। তেওঁ অপৰাধৰ কথাও স্বীকাৰ কৰে। এই গোচৰৰ সৈতে জড়িত সকলো নথি-পত্ৰ আৰু সামগ্ৰী কলিকতা উচ্চ ন্যায়ালয়ৰ নিৰ্দেশত চিবিআইক গতাই দিয়া হৈছে।" - এই মন্তব্য কলকাতা আৰক্ষীৰ এগৰাকী জ্যেষ্ঠ বিষয়াৰ।
দীৰ্ঘদিন ধৰি প্ৰমাণ হেৰফেৰ কৰাৰ অভিযোগ উত্থাপন হৈ আহিছে যদিও ২২ আগষ্টত চিবিআইয়ে উচ্চতম ন্যায়ালয়ক অপৰাধৰ স্থান সলনি কৰা বুলি জনাইছিল। ৰাজ্য চৰকাৰে অৱশ্যে এই অভিযোগ খণ্ডন কৰিছিল।
পিছলৈ সামাজিক মাধ্যমত ভিডিঅ’ ভাইৰেল হৈ পৰে য’ত কোৱা হৈছে যে কনিষ্ঠ চিকিৎসকগৰাকীৰ মৃতদেহ উদ্ধাৰ হোৱা চিকিৎসালয়খনৰ চেমিনাৰ হলত ভিৰ গোট খাইছিল। পিছত কলকাতা আৰক্ষীয়ে দাবী কৰে যে অপৰাধস্থলী ঘেৰাও কৰি ৰখা হৈছে আৰু কোনো অকৰ্তৃত্বশীল ব্যক্তিয়ে অঞ্চলটোত প্ৰৱেশ কৰা নাই। কিন্তু পৰৱৰ্তী সময়ত ঘেৰাও কৰা অঞ্চলটোত দুজন ব্যক্তিৰ পৰিচয়ক লৈ প্ৰশ্ন উত্থাপন হয়।
