হাথৰাছ
উত্তৰ প্ৰদেশৰ হাথৰছত মঙলবাৰে সৎসংগ (ধৰ্মীয় সমাৱেশ)ত ভয়াবহ পদপিষ্টত ১১৫ জনৰো অধিক লোকৰ মৃত্যু হয়। নিহতসকলৰ ভিতৰত কেইবাগৰাকীও মহিলা আৰু শিশুও আছে। নিহতসকলক হাথৰাছ আৰু চুবুৰীয়া ইটা জিলাৰ চিকিৎসালয়লৈ লৈ যোৱা হয়। আলিগড়ৰ আৰক্ষী আয়ুক্ত চৈত্ৰা ভিয়ে নিশ্চিত কৰিছে যে ১১৫ জনৰো অধিক লোকৰ মৃত্যু হৈছে। তেওঁ আৰু কয় যে এই পদপিষ্টত প্ৰায় ১৮ জন লোক আহত হয়।
সংবাদ মাধ্যমৰ সৈতে হোৱা বাৰ্তালাপত জ্যেষ্ঠ আৰক্ষী বিষয়া ৰাজেশ কুমাৰ সিঙে কয় যে হাথৰাছ জিলাৰ এখন গাঁৱত চলি থকা সৎসংগত এই ভয়াবহ ঘটনা সংঘটিত হয়।
মানৱ মংগল মিলন সদ্ভাৱনা সমাজ সমিতিৰ উদ্যোগত স্বয়ম্ভু আধ্যাত্মিক ব্যক্তি নাৰায়ণ সকৰ হৰিৰ বাবে এই সৎসংগৰ আয়োজন কৰা হৈছিল। তেওঁক সকৰ বিশ্ব হৰি বা ভোলে বাবা বুলিও কোৱা হয়।
এই ঘটনাৰ পৰিপ্ৰেক্ষিতত জিলা প্ৰশাসনে দুটা হেল্পলাইন খুলিছে: ০৫৭২২২২৭০৪১ আৰু ০৫৭২২২২৭০৪২।
এই ভয়ংকৰ ঘটনাৰ কথা মনত পেলাই প্ৰত্যক্ষদৰ্শীয়ে কয়, "আমি সৎসংগৰ বাবে আহিছিলোঁ। বৃহৎ জনসমাগম আছিল। সৎসংগ শেষ হোৱাৰ লগে লগে আমি ওলাই যাবলৈ ধৰিলোঁ। প্ৰস্থান পথটো ঠেক আছিল। আমি যেতিয়া পথাৰৰ ফালে ওলাই যাবলৈ চেষ্টা কৰি আছিলোঁ হঠাতে হুলস্থুলৰ আৰম্ভ হ'ল। আৰু আমি কি কৰিব লাগে নাজানিলোঁ। বহুতৰে মৃত্যু হৈছে।"
"সৎসংগ শেষ হোৱাৰ পিছত সকলো ওলাই আহিল। বাহিৰত ৰাস্তাটো এটা উচ্চতাত নিৰ্মাণ কৰা হৈছিল আৰু তলত এটা নলা আছিল। ইটোৰ পিছত সিটোকৈ মানুহ নলাটোত পৰিবলৈ ধৰিলে। কিছুমান মানুহ ভৰিৰ তলত পিষ্ট হৈছিল।" - এইদৰে কয় আন এজন প্ৰত্যক্ষদৰ্শীয়ে।
মৃত্যু হোৱা লোকসকলৰ পৰিয়াললৈ সমবেদনা জ্ঞাপন কৰি ৰাষ্ট্ৰপতি দ্ৰৌপদী মুৰ্মুৱে এই ঘটনা হৃদয়বিদাৰক বুলি উল্লেখ কৰে।
"উত্তৰ প্ৰদেশৰ হাথৰাছ জিলাত সংঘটিত দুৰ্ঘটনাত মহিলা-শিশুকে ধৰি বহু ভক্তৰ মৃত্যুৰ খবৰ হৃদয় বিদাৰক। পৰিয়ালৰ সদস্যক হেৰুৱাই পেলোৱাসকলৰ প্ৰতি গভীৰ শোক প্ৰকাশ কৰাৰ লগতে আহতসকলৰ আশু আৰোগ্য লাভৰ বাবে প্ৰাৰ্থনা জনাইছো।" - তেওঁ নিজৰ অফিচিয়েল এক্স হেণ্ডেলত পোষ্ট কৰিছে।
লোকসভাত ভাষণ দি প্ৰধানমন্ত্ৰী নৰেন্দ্ৰ মোদীয়ে কয়, "হাথৰাছত এক শোকাৱহ ঘটনাৰ খবৰ পাইছো। যিসকলে প্ৰাণ হেৰুৱাইছে তেওঁলোকৰ প্ৰতি সমবেদনা জ্ঞাপন কৰিছো আৰু আহতসকল শীঘ্ৰে আৰোগ্য হোৱা কামনা কৰিছো। ৰাজ্য চৰকাৰে উদ্ধাৰৰ কামত নিয়োজিত হৈ আছে। ভুক্তভোগীসকলক সকলো সম্ভাৱ্য সহায় আগবঢ়োৱা হ’ব।”
কেন্দ্ৰীয় গৃহমন্ত্ৰী অমিত শ্বাহে এক্সত কয়, "উত্তৰ প্ৰদেশৰ হাথৰাছত সংঘটিত হোৱা মৰ্মান্তিক দুৰ্ঘটনাটোত মই গভীৰ দুখ প্ৰকাশ কৰিছো। এই দুৰ্ঘটনাত প্ৰাণ হেৰুৱাই পেলোৱাসকলৰ পৰিয়াললৈ সমবেদনা জ্ঞাপন কৰিছো। ভগৱানে তেওঁলোকক এই বেদনা সহ্য কৰিবলৈ শক্তি দিয়ক। স্থানীয় প্ৰশাসনে সাহায্যৰ কামত নিয়োজিত হৈ আছে।"
ঘটনা সন্দৰ্ভত উত্তৰ প্ৰদেশৰ মুখ্যমন্ত্ৰী যোগী আদিত্যনাথে বিষয়াসকলক অনতিপলমে স্থানত উপস্থিত হৈ সাহায্যৰ কাম ক্ষিপ্ৰতাৰে কৰিবলৈ নিৰ্দেশ দিয়ে।
আহতসকলৰ শীঘ্ৰে আৰোগ্য কামনা কৰি মুখ্যমন্ত্রীগৰাকীয়ে বিষয়াসকলক আহতসকলে চিকিৎসালয়ত সঠিক চিকিৎসা লাভ কৰাটো নিশ্চিত কৰিবলৈ নিৰ্দেশ দিছে।
মুখ্যমন্ত্ৰী আদিত্যনাথে আৰক্ষী সঞ্চালক প্ৰধানৰ লগতে দুজন জ্যেষ্ঠ মন্ত্ৰী আৰু মুখ্য সচিবক সেই স্থানলৈ প্ৰেৰণ কৰে। ইউ পিৰ মন্ত্ৰী সন্দীপ সিঙে কয় যে, "হাথৰাছ কাণ্ডস্থলীত উপস্থিত হৈ বিষয়টো চাবলৈ আৰু চৰকাৰৰ হৈ প্ৰয়োজনীয় সিদ্ধান্ত ল'বলৈ মুখ্যমন্ত্ৰীয়ে আমাক নিৰ্দেশ দিছে। মৃত্যু হোৱা লোকৰ সংখ্যা ক্ৰমাগতভাৱে বৃদ্ধি পাইছে।"
মৃতকৰ পৰিয়ালক ২ লাখ টকাকৈ আৰু আহতসকলক ৫০ হাজাৰ টকাকৈ আৰ্থিক সাহায্য প্ৰদানৰ নিৰ্দেশ দিয়ে মুখ্যমন্ত্ৰীয়ে।
কাইলৈ হাথৰাছ ভ্ৰমণ কৰিব মুখ্যমন্ত্ৰী আদিত্যনাথে। তেওঁ ঘটনাস্থলীৰ বুজ ল’ব, আৰু ভুক্তভোগীৰ পৰিয়ালক সাক্ষাৎ কৰিব। তেওঁৰ সৈতে মুখ্যমন্ত্ৰীৰ প্ৰধান সচিব সঞ্জয় প্ৰসাদও থাকিব।
চৰকাৰী সূত্ৰৰ উদ্ধৃতি দি সংবাদ সংস্থা এএনআইয়ে প্ৰকাশ কৰা অনুসৰি এই ঘটনাৰ কাৰণ তদন্তৰ বাবে অতিৰিক্ত আৰক্ষী সঞ্চালক প্ৰধান আগ্ৰা আৰু আলিগড়ৰ আয়ুক্তৰে এটা দল গঠন কৰা হৈছে।
এই সন্দৰ্ভত হাথৰাছৰ সাংসদ অনুপ প্ৰধানে উল্লেখ কৰে যে তেওঁ সেই স্থানলৈ যাব য’ত ৮০ জনতকৈ অধিক লোকৰ প্ৰাণহানি ঘটে। "মই স্পটলৈ যাম। মই এই মাত্ৰ জিলা দণ্ডাধীশৰ সৈতে কথা পাতিলোঁ। বহু লোকৰ মৃত্যু হৈছে।"
যোগী চৰকাৰক সমালোচনা কৰি সমাজবাদী পাৰ্টিৰ মুৰব্বী অখিলেশ যাদৱে কয় যে, "যিহেতু সৎসংগত অংশগ্ৰহণ কৰিবলৈ যোৱা বৃহৎ সংখ্যক লোকৰ বিষয়ে পূৰ্বে ৰাজ্য চৰকাৰক অৱগত কৰা হৈছিল, সেয়েহে উপযুক্ত ব্যৱস্থা গ্ৰহণ কৰাটো তেওঁলোকৰ দায়িত্ব আছিল।"
ইয়াক "অত্যন্ত বেদনাদায়ক" ঘটনা বুলি অভিহিত কৰি লোকসভাৰ বিৰোধী দলপতি ৰাহুল গান্ধীয়ে কয়, "মই শোকসন্তপ্ত পৰিয়ালবৰ্গলৈ গভীৰ সমবেদনা জ্ঞাপন কৰিছো আৰু আহতসকলৰ শীঘ্ৰে আৰোগ্য লাভৰ কামনা কৰিছো। চৰকাৰ আৰু প্ৰশাসনক সকলো ধৰণৰ চিকিৎসাৰ ব্যৱস্থা কৰিবলৈ অনুৰোধ জনোৱা হৈছে। আহতসকলক আৰু ক্ষতিগ্ৰস্ত পৰিয়ালসমূহক সকাহ দিবলৈ ভাৰতৰ সকলো শ্ৰমিকক সাহায্য আৰু উদ্ধাৰৰ ক্ষেত্ৰত সহযোগিতা আগবঢ়াবলৈ অনুৰোধ জনোৱা হৈছে।"
বিএছপি প্ৰধান মায়াৱতীয়ে ঘটনাটোৰ তদন্তৰ দাবী জনাইছে। "এইটো অতি দুখজনক যে উত্তৰ প্ৰদেশৰ হাথৰাছ জিলাত এক ধৰ্মীয় সমাৱেশৰ সময়ত হোৱা পদপিষ্টত বৃহৎ সংখ্যক লোকৰ মৃত্যু হৈছে আৰু বহুলোক আহত হৈছে আৰু আগ্ৰাত বৌদ্ধ/ভীম কথাৰ সময়ত এজন যুৱক নিহত হৈছে। চৰকাৰে এই ঘটনাবোৰৰ তদন্ত কৰা উচিত আৰু উপযুক্ত ব্যৱস্থা লোৱা উচিত আৰু ভুক্তভোগী পৰিয়ালবোৰক আৰ্থিক সহায় আগবঢ়োৱা উচিত," তেওঁ এক্সত পোষ্ট কৰিছে।
