ইম্ফল
কেন্দ্রই জনগোষ্ঠীয় হিংসাৰ আক্রান্ত মণিপুৰলৈ আৰু ১০ হাজাৰৰো অধিক জোৱান প্রেৰণ কৰিব, যাৰ ফলত ম্যানমাৰৰ চুবুৰীয়া ৰাজ্যখনত কেন্দ্রীয় বাহিনীৰ মুঠ কোম্পানী ২৮৮টা হ’ব, ৰাজ্যখনৰ মুখ্য নিৰাপত্তা উপদেষ্টাগৰাকীয়ে শুক্ৰবাৰে সাংবাদিকৰ আগত কয়৷
ৰাজ্যখনৰ ৰাজধানী ইম্ফলত সাংবাদিকৰ আগত মণিপুৰৰ নিৰাপত্তা উপদেষ্টা কুলদীপ সিঙে কয় যে ৯০টা কোম্পানী বা প্ৰায় ১০,৮০০ কেন্দ্ৰীয় বাহিনীৰ জোৱান সংযোজন হ’লে মণিপুৰত নিয়োজিত কোম্পানীসমূহৰ মুঠ সংখ্যা ২৮৮টা হ’ব।
২০২৩ চনৰ মে’ মাহৰ পৰা মণিপুৰৰ হিংসাত্মক ঘটনাত ২৫৮ জন লোকৰ মৃত্যু হৈছে বুলিও তেওঁ কয়।
"আমি ৯০টা কোম্পানী বাহিনী পাইছো। ইয়াৰ এটা বৃহৎ অংশ ইতিমধ্যে ইম্ফলত উপস্থিত হৈছে। আমি সাধাৰণ নাগৰিকৰ জীৱন আৰু সম্পত্তি নিৰাপত্তা আৰু দুৰ্বল অঞ্চলসমূহ নিৰীক্ষণৰ বাবে বাহিনী বিতৰণ কৰি আহিছো।"
"কেইদিনমানৰ ভিতৰতে সকলো অঞ্চল সামৰি লোৱা হ'ব। আমি ফুলপ্ৰুফ ব্যৱস্থা কৰিছো। প্ৰতিখন জিলাতে নতুন সমন্বয় কোষ আৰু যৌথ নিয়ন্ত্ৰণ কক্ষ স্থাপন কৰা হ'ব। ইতিমধ্যে যিবোৰ অঞ্চলত কাম কৰি আছে সেইবোৰ আমি পৰ্যালোচনা কৰিছো।"
২০২৩ চনৰ মে’ মাহত মেইটেই সম্প্ৰদায় আৰু কুকি জনগোষ্ঠীৰ মাজত সংঘৰ্ষ আৰম্ভ হোৱাৰ পিছত এতিয়ালৈকে নিৰাপত্তা বাহিনীয়ে আৰক্ষীৰ অস্ত্ৰভাণ্ডাৰৰ পৰা লুটপাত কৰা প্ৰায় ৩ হাজাৰ অস্ত্ৰ-শস্ত্ৰ উদ্ধাৰ কৰিছে বুলি সিঙে কয়।
তেওঁ কয় যে আৰক্ষী, কেন্দ্ৰীয় সংৰক্ষিত আৰক্ষী বল (CRPF), সীমান্ত সুৰক্ষা বাহিনী (BSF), সেনা, অসম ৰাইফলছ, ভাৰত-তিব্বতী সীমান্ত আৰক্ষী (ITBP), আৰু সাশাস্ত্ৰ সীমা বলকে ধৰি সকলো বাহিনীয়ে একেলগে কাম কৰি আছে।
"মণিপুৰ সমস্যাটো মোকাবিলা কৰাত আমি সকলোৱে একেলগে আছো। যিয়েই সমস্যাৰ সৃষ্টি নহওক কিয়, আমি একেলগে সেইবোৰৰ সৈতে মোকাবিলা কৰো। ইতিমধ্যে অপাৰেচন চলি আছে।" - সিঙে কয়। তেওঁ লগতে কয় যে প্ৰান্তীয় এলেকা আৰু ৰাষ্ট্ৰীয় ঘাইপথ সুৰক্ষিত কৰাৰ বাবে এক নতুন মানক সঞ্চালন প্ৰক্ৰিয়া (SOP) স্থাপন কৰা হ'ব।
যোৱা ৭ নৱেম্বৰত জিৰিবামৰ জাইৰাউন গাঁৱত তিনিটা সন্তানৰ মাতৃ মাৰ জনগোষ্ঠীৰ এগৰাকী মহিলাক সন্দেহযুক্ত মেইটেই উগ্ৰপন্থীয়ে হত্যা কৰাৰ অভিযোগ উত্থাপন হোৱাৰ পিছতে প্ৰতিশোধ হিচাপে ১১ নৱেম্বৰত জিৰিবামৰ বৰোবেক্ৰাত দুই ডজন কুকি উগ্ৰপন্থীয়ে আক্ৰমণ কৰে।
CRPFৰ সৈতে হোৱা সংঘৰ্ষত ১০ জন নিহত হোৱাৰ পিছত বাকীসকলে মেইটেই পৰিয়ালৰ ছয়জন সদস্যক পণবন্দী কৰি পলায়ন কৰে। CRPFৰ সৈতে মুখামুখি হোৱাৰ পূৰ্বেই আৰু দুজন জ্যেষ্ঠ মেইটেই নাগৰিকক কুকি উগ্ৰপন্থীয়ে হত্যা কৰে।
এটা নৱজাতকসহ ছয়জন পণবন্দীৰ মৃতদেহ এখন নদীত পোৱা গৈছিল।
