নতুন দিল্লী
ছিকিমলৈ অহা পৰ্যটকসকলে ৫০ টকাকৈ প্ৰৱেশ মাচুল হিচাপে আদায় দিব লাগিব বুলি চৰকাৰে ঘোষণা কৰিছে। ছিকিম ৰেজিষ্ট্ৰেচন অৱ টুৰিষ্ট ট্ৰেড ৰুলছ ২০২৫ৰ অধীনত এই মাহৰ পৰা প্ৰৱেশ মাচুল লোৱা কাৰ্যকৰী হোৱা বুলি তেওঁলোকে জানিবলৈ দিয়ে।
এই মাচুল চেক-ইনৰ সময়ত হোটেলত সংগ্ৰহ কৰা হয় আৰু ৰাজ্যজুৰি পৰ্যটনৰ আন্তঃগাঁথনি আৰু সেৱাৰ উন্নতিৰ বাবে পৰ্যটন বহনক্ষমতা উন্নয়ন পুঁজিত জমা কৰা হয় বুলি বিষয়াসকলে জনায়।
পাঁচ বছৰৰ তলৰ শিশুক বাদ দি সকলো পৰ্যটকৰ পৰা ৩০ দিনলৈকে থকাৰ বাবে এই ধন লোৱা হৈছে বুলি তেওঁলোকে জনায়। এমাহৰ পিছত পুনৰ অহা এজন পৰ্যটকক পুনৰ এই চাৰ্জ আৰোপ কৰা হ’ব বুলি বিষয়াসকলে জানিবলৈ দিয়ে।
তেওঁলোকে লগতে কয় যে, ৰাজ্য চৰকাৰে উৎপাদিত ৰাজহ পথ সংযোগ বৃদ্ধি, পৰিষ্কাৰ-পৰিচ্ছন্নতা উন্নত আৰু পৰ্যটনৰ আন্তঃগাঁথনি উন্নয়নৰ বাবে ব্যৱহাৰ কৰাৰ পৰিকল্পনা কৰিছে, যাৰ ফলত দৰ্শনাৰ্থীৰ বাবে উন্নত অভিজ্ঞতা নিশ্চিত কৰা হ’ব।
