নতুন দিল্লী
২০২৪ চনৰ ৱাকফ সংশোধনী বিধেয়কে মুছলমান সম্প্ৰদায়ৰ অধিকাৰ খৰ্ব কৰিছে বুলি উত্থাপিত অভিযোগ খণ্ডন কৰিছে দিল্লী হজ কমিটীৰ অধ্যক্ষ কৌছাৰ জাহানে। তেওঁ কয় যে এই প্ৰস্তাৱিত আইনখনে ৱাকফ ব’ৰ্ডসমূহৰ বাবে অতি প্ৰয়োজনীয় স্বচ্ছতা আৰু জবাবদিহিতা কঢ়িয়াই আনিব। ৱাকফ সংশোধনী বিধেয়কৰ বিৰুদ্ধে কেইবাটাও মুছলমান সংগঠন আৰু দেশৰ বিৰোধী দলসমূহে প্ৰতিবাদমুখৰ হৈ থকাৰ সময়তে দিল্লী হজ কমিটীৰ অধ্যক্ষৰ এই মন্তব্য অত্যন্ত গুৰুত্বপূৰ্ণ বিবেচিত হৈছে।
যোৱা বছৰ ৱাকফ সংশোধনী বিধেয়ক ২০২৪ উত্থাপন হোৱাৰ পিছত সকলো পক্ষৰ আলোচনাৰ বাবে ইয়াক যুটীয়া সংসদীয় সমিতিলৈ প্ৰেৰণ কৰা হয়। চৰকাৰে দাবী কৰিছে যে প্ৰস্তাৱিত সংশোধনীৰ জৰিয়তে ৱাকফ ব’ৰ্ডৰ দ্বাৰা নিয়ন্ত্ৰিত সম্পত্তিৰ ঘোষণা আৰু নিয়ন্ত্ৰণ সুশৃংখলিত হ’ব। বিৰোধী দলসমূহে বিধেয়কখনৰ বিৰোধিতা কৰি ইয়াক মুছলমানৰ অধিকাৰ খৰ্ব বুলি অভিহিত কৰিছে।
এই সন্দৰ্ভত কৌছাৰ জাহানে কয়, “কিছুমান লোকে বিশ্বাস কৰে যে এই সংশোধনীসমূহৰ কোনো প্ৰয়োজন নাই, আৰু চৰকাৰৰ উদ্দেশ্যৰ বিষয়ে অপপ্ৰচাৰ চলোৱা হৈছে, কিন্তু এই পৰিৱৰ্তনসমূহৰ প্ৰয়োজন হৈছে জবাবদিহিতা আৰু স্বচ্ছতাৰে ৱাকফ ব’ৰ্ড গঠনৰ আঁৰৰ উদ্দেশ্য সম্পূৰ্ণৰূপে উপলব্ধি কৰিবলৈ।”
প্ৰতিনিধিত্বমূলক ফটো
বিধেয়কখনৰ পক্ষত তেওঁ কয়, ‘পিছপৰা আৰু দৰিদ্ৰ মুছলমানসকলক সহায় কৰিবলৈ ৱাকফ ব’ৰ্ড গঠন কৰা হৈছিল যদিও ইয়াৰ পৰিৱৰ্তে কেইজনমান লোকৰ পকেট ভৰোৱাৰ বাবে ব’ৰ্ডৰ অপব্যৱহাৰ কৰা হৈছে। উদাহৰণস্বৰূপে, দিল্লীত ৱাকফ ব’ৰ্ডৰ প্ৰাক্তন মুৰব্বী আমানতুল্লাহ খানে ইমামসকলক দৰমহা নিদিলে, যিটো অৱশেষত দিল্লীৰ উপ-ৰাজ্যপাল ভি কে ছাক্সেনাই আবণ্টন দিলে। বিধৱা পেঞ্চন বন্ধ কৰি ৰখা হৈছিল আৰু ধন কেনেকৈ খৰচ কৰা হয় তাৰ স্বচ্ছতাৰ ওপৰতো প্ৰশ্ন উত্থাপন হৈছিল। আনকি নিযুক্তিৰ ক্ষেত্ৰতো মূৰব্বীজনৰ বন্ধু-বান্ধৱ আৰু আত্মীয়সকলে অগ্ৰাধিকাৰ পাইছিল।’
‘বহুতে অনুভৱ কৰে যে ৱাকফ ব’ৰ্ডখন একাংশ মনেমিলা লোকেৰে গঠিত এটা ক্লাবে পৰিচালনা কৰে। সঠিক নথিপত্ৰৰ সৈতে সঠিক চিনাক্তকৰণ নিশ্চিত কৰিবলৈ ৱাকফৰ সম্পত্তিৰ জৰীপকাৰী হিচাপে সংগ্ৰাহকৰ নিৰ্দিষ্ট ভূমিকাৰ প্ৰয়োজন। প্ৰশাসন জড়িত হৈ থকা বাবে নিকা আৰু স্বচ্ছ পদ্ধতি অনুসৰণ কৰাটো নিশ্চিত হ'ব লাগিব, আৰু নথি-পত্ৰবোৰ সঠিকভাৱে ৰক্ষণাবেক্ষণ কৰিব লাগিব।’-মহিলাগৰাকীয়ে কয়।
ৱাকফ সংশোধনী বিধেয়ক, ২০২৪ত জিলা উপায়ুক্তক, বা তেওঁৰ দ্বাৰা মনোনীত ব্যক্তিক (অতিৰিক্ত জিলা উপায়ুক্ত পদবীৰ তলত নহয়) ৱাকফৰ সম্পত্তিৰ জৰীপ কৰাৰ ক্ষমতা প্ৰদান কৰাৰ প্ৰস্তাৱ দিয়া হৈছে। বিধেয়কখনত অমুছলমান আৰু মহিলা সদস্যকে ধৰি ৱাকফ কাউন্সিল আৰু ৰাজ্যিক ৱাকফ ব’ৰ্ডক বহল ভিত্তিত গঠন কৰা, কেন্দ্ৰীভূত পৰ্টেলৰ জৰিয়তে ৱাকফৰ সম্পত্তি পঞ্জীয়নৰ ব্যৱস্থা কৰা হৈছে। লগতে ৰাজহ আইন অনুসৰি সম্পত্তিৰ মিউটেচনৰ বাবে বিশদ পদ্ধতিৰ প্ৰস্তাব দিয়া হৈছে আৰু যিকোনো সম্পত্তিক ৱাকফ সম্পত্তি হিচাপে শ্ৰেণীভুক্ত কৰাৰ পূৰ্বে সংশ্লিষ্ট সকলোকে উপযুক্ত জাননী দিব লাগিব।
