বেংগালুৰু
মাইক্ৰ’ ব্লগিং প্লেটফৰ্ম এক্স, পূৰ্বৰ টুইটাৰে, ভাৰত চৰকাৰৰ বিৰুদ্ধে কৰ্ণাটক উচ্চ ন্যায়ালয়ত আবেদন দাখিল কৰি কেন্দ্ৰীয় চৰকাৰে ইলন মাস্কৰ মালিকানাধীন ৱেবছাইটোৰ টুইট আৰু অন্যান্য বিষয়বস্তু আঁতৰোৱাৰ দাবীত তথ্য প্ৰযুক্তি (আইটি) আইনৰ ধাৰা ৭৯(৩)(খ) ব্যৱহাৰ কৰাৰ ধৰণটোক প্ৰত্যাহ্বান জনাইছে। এক্সৰ দাবী যে ভাৰতৰ চৰকাৰী কৰ্তৃপক্ষই সঠিক আইনী পদ্ধতি উপেক্ষা কৰি অনলাইনত কন্টেন্ট ব্লক কৰিবলৈ অবৈধ ব্যৱস্থা স্থাপন কৰিছে।
আইটি আইনখনৰ ভিত্তিত এক্সৰ দৰে প্লেটফৰ্মে চৰকাৰী কৰ্তৃপক্ষই কোৱাৰ দৰে কন্টেন্ট আঁতৰাই বা ব্লক নকৰিলে নিজৰ আইনী সুৰক্ষা হেৰুৱাব পাৰে। কিন্তু এক্সে যুক্তি দিয়ে যে এই ধাৰাটোৱে চৰকাৰক কন্টেন্ট ব্লক কৰাৰ ক্ষমতা প্ৰদান নকৰে, আৰু কৰ্তৃপক্ষই তথ্য প্ৰযুক্তি আইনৰ ধাৰা ৬৯এ- কন্টেন্ট ব্লক কৰাৰ বাবে এক বিতং প্ৰক্ৰিয়া আৰু সুৰক্ষাৰ অপব্যৱহাৰ কৰি আছে, যিটো ভাৰতৰ উচ্চতম ন্যায়ালয়ে ২০১৫ চনৰ শ্ৰেয়া সিংঘল ৰায়ত উল্লেখ কৰে।
এক্সে দাবী কৰে যে ধাৰা ৬৯এ-য়ে কেৱল নিৰ্দিষ্ট কাৰণতহে বিষয়বস্তু ব্লক কৰাৰ অনুমতি দিয়ে, যেনে ৰাষ্ট্ৰীয় নিৰাপত্তা সুৰক্ষিত কৰা, আৰু ইয়াৰ বাবে পৰ্যালোচনা প্ৰক্ৰিয়াৰ প্ৰয়োজন। ইয়াৰ বিপৰীতে ধাৰা ৭৯(৩)(বি)ৰ কোনো স্পষ্ট নিয়ম নাই আৰু কৰ্তৃপক্ষই সঠিক পৰীক্ষা অবিহনে বিষয়বস্তু ব্লক কৰাৰ অনুমতি দিয়ে। ইয়াৰ ফলত ভাৰতত ব্যাপক চেন্সৰশ্বিপৰ সৃষ্টি হ’ব পাৰে বুলি কোম্পানীটোৱে সকীয়াই দিয়ে।
এক্সে কয় যে এই কাৰ্য্যই ভাৰতত ইয়াৰ ব্যৱসায়ত আঘাত হানিছে। কোম্পানীটোৱে কয় যে ই ব্যৱহাৰকাৰীয়ে বৈধ তথ্য শ্বেয়াৰ কৰিব পৰাৰ ওপৰত নিৰ্ভৰশীল, আৰু আশংকা কৰে যে ৰেণ্ডম ব্লক অৰ্ডাৰে ইয়াৰ প্লেটফৰ্ম আৰু ব্যৱহাৰকাৰীৰ বিশ্বাসৰ ক্ষতি কৰে।
ধাৰা ৭৯(৩)(বি)ৰ আদেশ পৰিচালনাৰ বাবে প্ৰস্তুত কৰা ভাৰতীয় চাইবাৰ অপৰাধ সমন্বয় কেন্দ্ৰ (আই ৪ চি)ৰ দ্বাৰা পৰিচালিত পৰ্টেল সহ্যোগত (Sahyog) যোগদান কৰিবলৈ চৰকাৰে বল দিয়াৰ বিৰোধিতাও এক্সে কৰিছে। এক্সে সহ্যোগক “চেন্সৰশ্বিপ পৰ্টেল” বুলি অভিহিত কৰি কয় যে এই ব্যৱস্থা সৃষ্টিৰ কোনো আইনী ভিত্তি নাই বা কোম্পানীসমূহক ইয়াৰ বাবে বিশেষ বিষয়া নিযুক্তি দিবলৈ বাধ্য কৰাব নোৱাৰে। এক্সে আপাত দৃষ্টিত যুক্তি দিয়ে যে ইতিমধ্যে ২০২১ চনৰ আইটি গাইডলাইনৰ অধীনত বৰ্তমানৰ নিয়মসমূহ মানি চলিছে, য’ত প্লেটফৰ্মসমূহে অভিযোগ আৰু অনুসৰণ বিষয়া নিযুক্তি দিব লাগে।
১৭ মাৰ্চৰ শুনানিৰ সময়ত ন্যায়াধীশ এম নাগপ্ৰসন্নই এক্সক কয় যে যদিহে চৰকাৰে কোম্পানীটোৰ বিৰুদ্ধে কোনো গুৰুতৰ ব্যৱস্থা গ্ৰহণ কৰে তেন্তে আদালতলৈ উভতি আহিব পাৰে। বৰ্তমানৰ বাবে চৰকাৰে কয় যে সহ্যোগ পৰ্টেলত যোগদান কৰিবলৈ অস্বীকাৰ কৰাৰ বাবে এক্সৰ বিৰুদ্ধে কোনো শাস্তিমূলক পদক্ষেপ লোৱা হোৱা নাই।
এক্সে নিজৰ আবেদনত ইলেক্ট্ৰনিক্স আৰু তথ্য প্ৰযুক্তি মন্ত্ৰালয়ক (MeitY) অভিযোগ উত্থাপন কৰিছে যে তেওঁলোকে মন্ত্ৰালয়, ৰাজ্য, আৰু আৰক্ষীক কন্টেন্ট ব্লক কৰিবলৈ সমান্তৰাল ব্যৱস্থা সৃষ্টি কৰিবলৈ উৎসাহিত কৰিছে। প্ৰমাণ হিচাপে এক্সে ২০২৪ চনৰ ফেব্ৰুৱাৰী মাহত প্ৰেৰণ কৰা ৰে’ল মন্ত্ৰালয়ৰ পৰা অহা অৰ্ডাৰ ব্লক কৰাৰ উদাহৰণ দিয়ে।
আমোদজনকভাৱে এক্সৰ পৰা ভাৰত চৰকাৰৰ সৈতে আদালতত যুঁজিবলৈ এই পদক্ষেপ লোৱা হৈছে এনে সময়ত যেতিয়া আন ইলন মাস্কৰ কোম্পানী — টেছলা আৰু স্পেচএক্সে ভাৰতত ব্যৱসায় আৰম্ভ কৰিবলৈ নিয়ন্ত্ৰণমূলক অনুমোদন বিচাৰিছে। টেছলাই ভাৰতত ইলেক্ট্ৰিক গাড়ী বিক্ৰী কৰিব বিচৰাৰ বিপৰীতে স্পেচএক্সে জিঅ’ আৰু এয়াৰটেলৰ সৈতে অংশীদাৰিত্বৰে ভাৰতত ষ্টাৰলিংক চেটেলাইট ইণ্টাৰনেট সেৱা মুকলি কৰাৰ আশা কৰিছে।
