গুৱাহাটীৰ পেট্ৰ’ল পাম্পত মহিলা সৱলীকৰণৰ সুন্দৰ দৃশ্য
Story by Munni Begum | Posted by Munni Begum • 2 Months ago
কামাখ্যা এনাৰ্জি পইণ্ট পেট্ৰ'ল পাম্পত কৰ্মৰত মহিলা কৰ্মচাৰী
মুন্নী বেগম / গুৱাহাটী
আমাৰ সমাজত মহিলাসকল প্ৰায়ে শোষিত আৰু বঞ্চিত হৈ অহা বুলি ধাৰণা কৰা হয় যদিও বহু যুৱতী আৰু মহিলাই এতিয়া এই ধাৰণা ভূল প্ৰমাণিত কৰিছে।তাৰে এক উদাহৰণ দেখা গৈছে গুৱাহাটী মহানগৰীৰ একাংশ পেট্ৰ'ল পাম্পত।
কিছু বছৰ আগলৈকে পেট্ৰ'ল পাম্পত আমি কোনো মহিলা কৰ্মচাৰী দেখা নাছিলো যদিও সময়ৰ লগে লগে মহিলাসকলে কৰ্মসংস্থাপনৰ নতুন সুযোগক আকোঁৱালি লৈছে। এতিয়া মহানগৰীৰ লগতে ৰাজ্যৰ বিভিন্ন প্ৰান্তৰ পেট্ৰ'ল পাম্পত মহিলা কৰ্মচাৰীয়ে ৰ'দ-বৰষুণ, প্ৰচণ্ড গৰম অথবা শীতকো নেওচি গ্ৰাহকৰ বাহনত তেল যোগান ধৰা দেখা যায়। এই ক্ষেত্ৰখনত তেওঁলোকে সঠিকভাৱে প্ৰশিক্ষণ লাভ কৰি সুচাৰুৰূপে নিজৰ সেৱা আগবঢ়াইছে আৰু কৰ্মসংস্থাপন লাভ কৰিবলৈ সক্ষম হৈছে।
মহানগৰীৰ ভেটাপাৰাস্থিত কামাখ্যা এনাৰ্জি পইণ্ট পেট্ৰ'ল পাম্পত কৰ্মৰত এগৰাকী মহিলা কৰ্মচাৰী হিয়া মজুমদাৰে আৱাজ-দ্য ভইচ অসমক কয়, "মই বিগত ৪ বছৰৰ পৰাই কামাখ্যা এনাৰ্জি পইণ্ট পেট্ৰ'ল পাম্পত কৰ্মচাৰী হিচাপে কাম কৰি আহিছো। ইয়াত মই আৰু মোৰ স্বামী একেলগে কাম কৰি আছো। মোৰ ডিউটি পুৱা ৬ বজাৰ পৰা দুপৰীয়া ২ বজালৈ থাকে, যদিও কেতিয়াবা দুপৰীয়া ২ বজাৰ পৰা নিশা ৮ তথা ১০ বজালৈও কৰিবলগীয়া হয়। কিন্তু কামৰ সময়ক লৈ মোৰ কোনো ধৰনৰ অসুবিধা হোৱা নাই। কাৰণ আমাৰ ইয়াত মহিলা সুৰক্ষাৰ ওপৰত বহু বেছি গুৰুত্ব দিয়া হয়। মই কেতিয়াও ইয়াত কামৰ সময় কোনো ধৰনৰ অপ্ৰীতিকৰ পৰিস্থিতিৰ সন্মুখীন হোৱা নাই। ইয়াত কাম কৰি ভালে পাইছো।"
কামৰ কোনো সৰু-বৰ নাই, সকলোৱে সকলো ধৰনৰ কাম কৰিব পাৰে বুলি মন্তব্য কৰি হিয়া মজুমদাৰে কয়, "মই সকলো ছোৱালীকে ক'ব বিচাৰো যে, কোনো কামতে লাজ কৰিব নালাগে। ল'ৰাই কৰিব পাৰিব বা ছোৱালীয়ে কৰিব নোৱাৰে বুলি কোনো কথা নাই আমি সকলোৱে সকলো ধৰনৰ কাম কৰিব পাৰো, কেৱল মাত্ৰ আমাৰ মাজত আত্মবিশ্বাস থাকিব লাগিব। বৰ্তমান সমাজৰ পৰিস্থিত কিছু কিছু ক্ষেত্ৰত বেয়া হৈছে, যদিও সমাজত বেয়া মানুহৰ লগতে বহু ভাল মানুহ আছে।"
কামাখ্যা এনাৰ্জি পইণ্ট পেট্ৰ'ল পাম্পৰ আন এগৰাকী মহিলা কৰ্মচাৰী অৰ্পনা ৰয় দাসে কয়, "মই ইয়াত বিগত ২ বছৰৰ পৰা কাম কৰি আহিছো। মই ইয়াত কাম কৰি খুব ভাল পাইছো। ইয়াতে মোৰ লগতে মোৰ স্বামীয়েও কাম কৰি আছে। মই কেতিয়াও ইয়াত কামৰ সময় কোনো ধৰনৰ অপ্ৰীতিকৰ পৰিস্থিতিৰ সন্মুখীন হোৱা নাই। গ্ৰহকৰ পৰা খুব ভাল সহাৰি লাভ কৰো। আমিও প্ৰতিগৰাকী গ্ৰাহককে অতিথি বুলি বিবেচনা কৰি আমাৰ সেৱা আগবঢ়াই আহিছো।"
পদ্মা এণ্ড চ'নছ নামৰ পেট্ৰ'ল পাম্পৰ কৰ্মচাৰীসকল
কামাখ্যা এনাৰ্জি পইণ্ট পেট্ৰ'ল পাম্পৰ এগৰাকী বিষয়া অৰুন কুমাৰ সিঙে কয়, "আজিকালি ছোৱালী বা ল'ৰা বুলি কোনো কথা নাই। সকলোৱে সকলো ধৰনৰ কাম কৰিব পাৰে, কেৱল মাত্ৰ আত্মবিশ্বাসৰ থাকিব লাগিব। কিবা এটা কৰিব লাগিলে তাৰ বাবে ছোৱালীবোৰে নিজেই ওলাই আহিব লাগিব। মই মোৰ পেট্ৰ'ল পাম্পত প্ৰথমে ২ জনী ছোৱালীক সংস্থাপন দিছিলো, তাৰ্পিছত লাহে লাহে ছোৱালীৰ সংখ্যা বাঢ়িল আৰু এতিয়া মোৰ পেট্ৰ'ল পাম্পত মুঠ ১২ জনী ছোৱালীয়ে কাম কৰি আছে।"
যুৱতীসকলৰ নিৰাপত্তাৰ বিষয়ে সোধাত অৰুন কুমাৰ সিঙে কয়, "এজনী ছোৱালী কাম কৰিবলৈ আহিলে প্ৰথম কথাটো আহি পৰে তেওঁলোকৰ নিৰাপত্তা। অন্যৰ কথা নাজানো কিন্তু আমাৰ ইয়াত কাম কৰা প্ৰতি গৰাকী ছোৱালীৰ নিৰাপত্তাৰ ক্ষেত্ৰত আমি বহু সচেতন। আমাৰ ইয়াত কাম কৰা কোনো ছোৱালীৰ যদি নিশাৰ কাম থাকে আৰু নিশা নিজৰ কৰ্তব্য শেষ কৰি অকলে ঘৰ যাব লগা হয়, তেন্তে আমি তেওঁলোকক ঘৰলৈ থৈ অহাৰ ব্যৱস্থা কৰো।"
