দৌলত ৰহমান / গুৱাহাটী
অসমৰ মুছলমান অধ্যুষিত অঞ্চলসমূহ মহিলা শিক্ষাৰ দিশত যথেষ্ট পিছপৰা যদিও এই ক্ষেত্ৰত কিছু ব্যতিক্ৰম হোজাই মহকুমা। হোজাই অসমৰ মহিলা শিক্ষা ক্ষেত্ৰখনৰ প্ৰাণকেন্দ্ৰ হিচাপে চিহ্নিত হৈছে। জিলাখনত গঢ় লৈ উঠা আজমল ফাউণ্ডেচনে মহিলা শিক্ষাৰ ক্ষেত্ৰত অগ্ৰণী ভূমিকা গ্ৰহণ কৰি আহিছে।
"ভাৰতত অতি কম সংখ্যক মুছলমান ছোৱালীয়ে উচ্চ শিক্ষাৰ বাবে স্কুল-কলেজলৈ যোৱাটো অত্যন্ত দুৰ্ভাগ্যজনক। এই ক্ষেত্ৰত উত্তৰ-পূৰ্বাঞ্চলৰ পৰিস্থিতি আৰু বেয়া। এই পৰিস্থিতিৰ প্ৰতি লক্ষ্য ৰাখি আজমল ফাউণ্ডেচনে ২০০৬ চনত কেৱল ছোৱালীৰ শিক্ষাৰ বাবে হায়াৰ ছেকেণ্ডাৰী স্তৰত বিজ্ঞান শাখাৰ শিক্ষা প্ৰদান কৰা মৰিয়ম আজমল মহিলা বিজ্ঞান আৰু প্ৰযুক্তি মহাবিদ্যালয় নামেৰে নিজৰ প্ৰথমখন প্ৰতিষ্ঠান স্থাপন কৰে। পৰৱৰ্তী সময়ত ২০১২ চনত মহাবিদ্যালয়খন ডিগ্ৰী পৰ্যায়লৈ উন্নীত কৰা হয়," আজমল ফাউণ্ডেশ্যনৰ সঞ্চালক ড০ খাছৰুল ইছলামে 'আৱাজ-দ্য ভইচ'ক এইদৰে কয়।
মহাবিদ্যালয়ৰ পৰীক্ষাগাৰত কেইগৰাকীমান ছাত্ৰী
ছয় বছৰৰ পাছত কলেজখন উন্নীত কৰা হয় আৰু এতিয়া ইয়াত ইংৰাজী, অসমীয়া, শিক্ষা, ৰাজনীতি বিজ্ঞান, অৰ্থনীতি, গণিত, উদ্ভিদ বিজ্ঞান, প্ৰাণীবিজ্ঞান, ৰসায়ন বিজ্ঞান, আৰু পদাৰ্থ বিজ্ঞান আদি বিষয়ত বি.এ আৰু বি.এছচি পাঠ্যক্ৰমৰ শিক্ষা আগবঢ়োৱা হয়। মহাবিদ্যালয়খন ডিব্ৰুগড় বিশ্ববিদ্যালয়ৰ সৈতে সংযুক্ত হৈ আছে।
ড০ ইছলামৰ মতে, মৰিয়ম আজমল মহিলা বিজ্ঞান আৰু প্ৰযুক্তি মহাবিদ্যালয়খন দ্ৰুতগতিৰে সম্প্ৰসাৰিত হৈ আছে আৰু ই এতিয়া অসমৰ আটাইতকৈ বিস্তৃত আন্তঃগাঁথনিসমূহৰ ভিতৰত এটা। মহাবিদ্যালয়খনত ডে বৰ্ডিং আৰু হোষ্টেল দুয়োটাৰে ব্যৱস্থা থকা অত্যাধুনিক আন্তঃগাঁথনিৰ সুবিধা আছে। ই এক একত্ৰিত দৃষ্টিভংগীৰ বাবে চেষ্টা কৰে, শিক্ষাৰ্থীসকলৰ বাবে ব্যক্তিবাদী মনোযোগৰ ওপৰত গুৰুত্ব আৰোপ কৰে।
মহাবিদ্যালয়ৰ বিজ্ঞানৰ শ্ৰেণীকোঠাত একাংশ শিক্ষাৰ্থী
উল্লেখ্য যে, মৰিয়ম আজমল মহিলা বিজ্ঞান আৰু প্ৰযুক্তি মহাবিদ্যালয়ত বৰ্তমান ১৫০০ৰো অধিক শিক্ষাৰ্থীয়ে শিক্ষা গ্ৰহণ কৰি আছে আৰু আজিলৈকে ৫০০০তকৈ অধিক ছাত্ৰীয়ে হায়াৰ ছেকেণ্ডাৰী (H.S) আৰু স্নাতক ডিগ্ৰী (BA & B.Sc.) উত্তীৰ্ণ হৈছে। এই মহাবিদ্যালয়খনৰ উত্তীৰ্ণৰ হাৰ ১০০ শতাংশ। ইয়াৰ কেইবাজনো প্ৰাক্তন ছাত্ৰ এতিয়া চিকিৎসক, অভিযন্তা, উকীল,শিক্ষক, গৱেষক, উদ্যোগী ইত্যাদি।
“প্ৰাক্তন ছাত্ৰ-ছাত্ৰীৰ বহুতেই দিল্লী বিশ্ববিদ্যালয়, জৱাহৰলাল নেহৰু বিশ্ববিদ্যালয়, আলিগড় মুছলিম বিশ্ববিদ্যালয়, তেজপুৰ বিশ্ববিদ্যালয়, গৌহাটী বিশ্ববিদ্যালয়, ডিব্ৰুগড় বিশ্ববিদ্যালয়, অসম বিশ্ববিদ্যালয়, নৰ্থ ইষ্টাৰ্ণ হিল বিশ্ববিদ্যালয় আদিৰ দৰে স্বনামধন্য বিশ্ববিদ্যালয়ত উচ্চ শিক্ষা অব্যাহত ৰাখিছে। একেদৰে, প্ৰতি বছৰে ভালে সংখ্যক ছাত্ৰ-ছাত্ৰীয়ে NEET আৰু JEEৰ বাবে যোগ্যতা অৰ্জন কৰে আৰু তেওঁলোকে ৰাষ্ট্ৰীয় খ্যাতিসম্পন্ন প্ৰতিষ্ঠানত চিকিৎসা আৰু অভিযান্ত্ৰিক পাঠ্যক্ৰম গ্ৰহণ কৰি আছে,” ড০ ইছলামে কয়।
মৰিয়ম আজমল মহিলা বিজ্ঞান আৰু প্ৰযুক্তি মহাবিদ্যালয়ৰ ভৱন
মৰিয়ম আজমল মহিলা বিজ্ঞান আৰু প্ৰযুক্তি মহাবিদ্যালয়ৰ পৰা জিৰত কাটাহাৰপিয়ে জেইই এডভান্সড (JEE Advanced)ৰ বাবে যোগ্যতা অৰ্জন কৰিছিল আৰু তেওঁ আইআইটি খড়গপুৰত অধ্যয়ন কৰি আছে। শোৰিফা য়াচমিন (২০১৯), খাদিজা বেগম আৰু স্বপ্না বেগমে (২০২১) আইআইটি-জেএএম(IIT-JAM) পৰীক্ষাত উত্তীৰ্ণ হৈছে। নাছৰত জাহান, পাপৰি ভদ্ৰা, আৰু ফৰিদা বেগমে ২০২১ চনত GATEৰ বাবে যোগ্যতা অৰ্জন কৰিছিল।
বিগত বছৰবোৰত মৰিয়াম আজমল মহিলা বিজ্ঞান আৰু প্ৰযুক্তি মহাবিদ্যালয়ৰ আৰ্হি অনুসৰণ কৰি গৌৰীপুৰ, খাৰুপেটিয়া আৰু হোজাইৰ দৰে অসমৰ বিভিন্ন প্ৰান্তত আন কেইবাখনো শিক্ষা প্ৰতিষ্ঠান স্থাপন কৰা হৈছে, যিবোৰ কেৱল ছোৱালী শিক্ষাৰ বাবে উৎসর্গিত।
আজমল ছুপাৰ-৪০ৰ একাংশ কৃতী ছাত্ৰ-ছাত্ৰীৰ সৈতে সাংসদ বদৰুদ্দিন আজমল
খাৰুপেটীয়াৰ মৰিয়াম আজমল উচ্চতৰ মাধ্যমিক বিদ্যালয়ে এতিয়ালৈকে বিস্ময়কৰ ফলাফল দাঙি কৰিছে। বৰ্তমান ২৫৫ গৰাকী ছোৱালীয়ে এই বিদ্যালয়ত পঢ়ি আছে আৰু ৭৭১ গৰাকী ইতিমধ্যে উত্তীৰ্ণ হৈছে। বিদ্যালয়খনৰ কেইবাজনো প্ৰাক্তন ছাত্ৰীয়ে অসম চৰকাৰৰ জিলা প্ৰাথমিক শিক্ষাৰ অধীনত বিভিন্ন বিদ্যালয়ত শিক্ষক হিচাপে নিযুক্তি লাভ কৰিছে।
ধুবুৰী জিলাৰ গৌৰীপুৰৰ মৰিয়াম আজমল উচ্চতৰ মাধ্যমিক বিদ্যালয় হৈছে বৰ্তমান প্ৰায় ২০০ গৰাকী ছোৱালী শিক্ষাৰ্থী থকা আন এখন আগশাৰীৰ শিক্ষা প্ৰতিষ্ঠান। ইয়াৰ পৰা এতিয়ালৈকে ৫০০তকৈও অধিক শিক্ষাৰ্থীয়ে হায়াৰ ছেকেণ্ডাৰী ফাইনেল পৰীক্ষাত উত্তীৰ্ণ হৈছে আৰু ইয়াৰে বেছিভাগ প্ৰাক্তন ছাত্ৰীয়ে উচ্চ শিক্ষাৰ প্ৰতিষ্ঠিত প্ৰতিষ্ঠানত অধ্যয়ন কৰি আছে।
আজমল ফাউণ্ডেচনৰ প্ৰতিষ্ঠাপক সাংসদ মৌলানা বদৰুদ্দিন আজমলৰ সপোন হৈছে মৰিয়ম আজমল মহিলা বিশ্ববিদ্যালয় স্থাপন কৰা আৰু ইয়াৰ পৰা এনে মহিলাৰ জন্ম দিয়া, যিয়ে মানৱতাৰ সন্মুখলৈ অহা ভৱিষ্যতৰ প্ৰত্যাহ্বানসমূহৰ সৈতে মোকাবিলা কৰিব পাৰিব আৰু এই পৃথিৱীখনক জীয়াই থকাৰ বাবে এখন উন্নত হিচাপে গঢ়ি তুলিব।
.webp)
.webp)
.webp)
.webp)
