শ্বাগুফতা নেমাত / নতুন দিল্লী / শ্ৰীনগৰ
কাশ্মীৰ উপত্যকাৰ ইকৰা ফাৰুকৰ নাম আজি সকলোৰে মুখে মুখে। শেহতীয়াকৈ তেওঁ জম্মু-কাশ্মীৰ প্ৰশাসনিক সেৱা (জেকেএএছ)ৰ পৰীক্ষাত দ্বিতীয় স্থান দখল কৰিবলৈ সক্ষম হৈছে। অত্যন্ত মেধাৱী ছাত্ৰী ইকৰাই এই সাফল্যৰে প্ৰমাণ কৰিলে যে কঠোৰ পৰিশ্ৰম আৰু সাহসৰ বলত যিকোনো সপোন বাস্তৱায়িত কৰিব পাৰে।
ইকৰাৰ বাবে এই যাত্ৰা সহজ নাছিল। বহু অসুবিধা আৰু আৰ্থিক প্ৰত্যাহ্বানৰ সন্মুখীন হৈ তেওঁ জম্মু-কাশ্মীৰ প্ৰশাসনিক সেৱা পৰীক্ষাত চমকপ্ৰদ সফলতা অৰ্জন কৰিছিল। সীমিত সা-সুবিধাৰ মাজতো ডাঙৰ সপোন দেখিবলৈ সাহস কৰা সকলো যুৱক-যুৱতীৰ বাবে ইকৰা এক প্ৰেৰণাৰ নাম।
এটা মধ্যবিত্ত পৰিয়ালত জন্ম গ্ৰহণ কৰা ইকৰাৰ পিতৃ ফাৰুক আহমেদ এজন দৰ্জী। তেওঁ উপাৰ্জন সীমিত আছিল যদিও কেতিয়াও নিজৰ কন্যাৰ শিক্ষাৰ সৈতে আপোচ কৰা নাছিল। এজন সাধাৰণ দৰ্জীৰ কন্যা হোৱাৰ পিছতো ইকৰাই কেতিয়াও নিজৰ সপোনবোৰ চুটি কৰা নাছিল।
মাক দেউতাকৰ সৈতে ইকৰা ফাৰুক
তেওঁৰ দেউতাকৰ সপোন আছিল যে জীয়েকে পঢ়া-শুনাত উচ্চ মৰ্যাদা লাভ কৰক। ইকৰাই দেউতাকৰ এই সপোন বাস্তৱায়িত কৰিলে। ২০২১ চনত স্নাতকোত্তৰ শিক্ষা সমাপ্ত কৰি তেতিয়াৰ পৰাই অসামৰিক সেৱা পৰীক্ষাৰ বাবে প্ৰস্তুতি আৰম্ভ কৰে। ইকৰাই এক সাক্ষাৎকাৰত কয়, "সৰুৰে পৰা মই বহু আৰ্থিক প্ৰত্যাহ্বানৰ সন্মুখীন হ'বলগীয়া হৈছিল। কিন্তু মা-দেউতাই মোক সদায় সমৰ্থন কৰিছিল আৰু পঢ়া-শুনাত কেতিয়াও নিৰাশ কৰা নাছিল।"
ইকৰাৰ পিতৃ-মাতৃয়ে শিক্ষাৰ গুৰুত্ব বুজি পাইছিল আৰু ইয়াৰ বাবে তেওঁলোকে সীমিত আয় সত্ত্বেও কোনো ক্ৰুটি ৰখা নাছিল। ইকৰাৰ মতে তেওঁৰ সফলতাৰ বাবে পিতৃ-মাতৃৰ সহযোগিতা আৰু সমৰ্থন আটাইতকৈ গুৰুত্বপূৰ্ণ। কেৰিয়াৰত সফলতা লাভ কৰিবলৈ হ’লে মনোযোগ বজাই ৰখা আৰু বিক্ষিপ্ত বস্তুৰ পৰা আঁতৰি থকাটো অতি প্ৰয়োজনীয়।
ইকৰাৰ দেউতাকে কয়, “মোৰ দুয়োটা ল’ৰা-ছোৱালীয়ে পঢ়া-শুনাত সদায় ভাল। ইকৰাই এই পৰীক্ষাত কোনো ব্যক্তিগত প্ৰশিক্ষণ নোহোৱাকৈয়ে উত্তীৰ্ণ হৈছিল। পিতৃ হিচাপে মই দিনে-নিশাই কাম কৰি পৰিয়ালটোক আৰ্থিকভাৱে পোহপাল দিছো।" ইকৰাৰ এই কৃতিত্বই প্ৰমাণ কৰিছে যে যিকোনো সাধাৰণ পৰিয়ালৰ শিশুৱেও ডাঙৰ সপোন দেখিব পাৰে আৰু সেইবোৰ পূৰণ কৰিব পাৰে।
ইকৰাই জম্মু-কাশ্মীৰ প্ৰশাসনিক সেৱাৰ পৰীক্ষাৰ বাবে প্ৰস্তুতি চলাবলৈ কিছুমান কঠোৰ নিয়ম মানি চলিছিল। তেওঁ পঢ়া-শুনাৰ বাবে এক কৌশল প্ৰস্তুত কৰিছিল, য’ত প্ৰতিটো বিষয়ৰ প্ৰতি বিশেষ গুৰুত্ব দিয়া হৈছিল। তেওঁ দৈনিক ৫-৬ ঘণ্টা পঢ়িছিল আৰু মক টেষ্ট দি নিজৰ অগ্ৰগতিৰ মূল্যায়ন কৰিছিল।
ইকৰা ফাৰুক
মেধাৱী যুৱতীগৰাকীয়ে প্ৰকাশ কৰে যে তেওঁৰ প্ৰস্তুতিৰ উদ্দেশ্য আছিল জম্মু-কাশ্মীৰে সন্মুখীন হোৱা সমস্যাসমূহৰ বিষয়ে ভালকৈ বুজি পোৱা আৰু এই সন্দৰ্ভত গভীৰ জ্ঞান লাভ কৰা। ইকৰাৰ মতে, তেওঁ অঞ্চলটোৰ সামাজিক, ৰাজনৈতিক আৰু অৰ্থনৈতিক পৰিস্থিতি বুজি পাইছিল আৰু ই তেওঁক পৰীক্ষাত সহায় কৰিছে।
কঠোৰ পৰিশ্ৰম আৰু নিষ্ঠাৰ ফলত ইকৰা কেৱল পৰীক্ষাত সফল হোৱাই নহয়, কাশ্মীৰৰ ভিতৰত দ্বিতীয় স্থান দখল কৰিবলৈও সক্ষম হয়। সীমিত সা-সুবিধাৰ মাজতো ডাঙৰ সপোন দেখিব বিচৰা সকলোৰে বাবে ইকৰাৰ সফলতাৰ যাত্ৰা এক প্ৰেৰণাদায়ক কাহিনী।
উল্লেখ্য যে, জম্মু-কাশ্মীৰ প্ৰশাসনিক সেৱাৰ পৰীক্ষা কেইবাটাও স্তৰত অনুষ্ঠিত হয় আৰু ইয়াৰ বাছনি প্ৰক্ৰিয়া যথেষ্ট কঠোৰ। প্ৰথম ৰাউণ্ডত ৩০,৭৫৬ গৰাকী পৰীক্ষাৰ্থীয়ে প্ৰাৰম্ভিক পৰীক্ষাৰ বাবে আবেদন কৰিছিল, ইয়াৰে ১৮,৮৮২ গৰাকী পৰীক্ষাৰ্থীয়ে ২০২৩ চনৰ ১৫ অক্টোবৰত অনুষ্ঠিত পৰীক্ষাত অৱতীৰ্ণ হৈছিল।
প্ৰাথমিক পৰীক্ষাৰ অন্তত ২০২৪ চনৰ মাৰ্চ-এপ্ৰিলৰ ভিতৰত অনুষ্ঠিত হোৱা মূল পৰীক্ষাৰ বাবে ২১৪৪ গৰাকী পৰীক্ষাৰ্থী বাছনি কৰা হয়। এই প্ৰত্যাহ্বানমূলক পৰীক্ষাটোত সফল হ'বলৈ ইকৰাই তীব্ৰ অনুশাসন মানি চলিছিল আৰু সম্পূৰ্ণ নিষ্ঠাৰে পঢ়া-শুনা কৰিছিল। তেওঁ কেৱল মক-টেষ্ট দি প্ৰস্তুতি চলোৱাই নহয়, বিষয়বোৰ গভীৰভাৱে বুজি পোৱাৰ ওপৰতো গুৰুত্ব আৰোপ কৰিছিল। ইয়াৰ ফলত তেওঁৰ আত্মবিশ্বাস আৰু অধিক বৃদ্ধি পাইছিল।
পৰিয়ালৰ সৈতে বহি থকা মুহূৰ্তত ইকৰা ফাৰুক
ইকৰাই কয়, "মই এনে এক পৰ্যায়ত উপনীত হ'ব বিচাৰো, য'ত মই সমাজৰ সেৱা কৰিব পাৰো আৰু আৰ্তজনক সহায় কৰিব পাৰো। মই যুৱক-যুৱতীসকলক এটা বাৰ্তা দিব বিচাৰো যে যদি দৃঢ়তা শক্তিশালী হয় তেন্তে আৰ্থিক অসুবিধা কেতিয়াও বাধা হ’ব নোৱাৰে। মোৰ জ্ঞান আৰু প্ৰশাসনিক দক্ষতাক সমাজৰ উত্থানৰ বাবে ব্যৱহাৰ কৰাই মোৰ প্ৰধান লক্ষ্য।"
এই পৰীক্ষাত ইকৰাৰ উপৰিও অংকা বাণ্টী ইৰছাদ আৰু ডেনিছ হুছেইনেও উল্লেখযোগ্য স্থান লাভ কৰিবলৈ সক্ষম হয়। ৩৩ সংখ্যক স্থান লাভ কৰা আংকা বাণ্টী ইৰছাদে কয় যে তেওঁ তৃণমূল পৰ্যায়ত পৰিৱৰ্তন আনিব বিচাৰে।
একেদৰে ইলেক্ট্ৰিকেল ইঞ্জিনিয়াৰিঙৰ বেকগ্ৰাউণ্ড থকা ডেনিছ হুছেইনে ৩০সংখ্যক স্থান লাভ কৰে। মেধাৱী যুৱকজনে কয় যে তেওঁৰ প্ৰস্তুতিৰ বাবে ডেৰ-দুবছৰ সময় লাগিছিল যদিও তেওঁ জীৱনত ভাৰসাম্য বজাই ৰাখি নিজৰ লক্ষ্যত উপনীত হ’ল।
ইকৰা, অংকা, ডেনিছৰ দৰে যুৱক-যুৱতীসকলৰ এই সাফল্যই কেৱল কাশ্মীৰৰ যুৱক-যুৱতীসকলকেই নহয়, সমগ্ৰ ভাৰতৰ যুৱক-যুৱতীসকলকো আগবাঢ়ি যাবলৈ আৰু সপোন বাস্তৱায়িত কৰিবলৈ অনুপ্ৰাণিত কৰে। এই কাহিনীয়ে প্ৰমাণ কৰে যে প্ৰকৃত পৰিশ্ৰম, নিষ্ঠা আৰু সাহসেৰে যিকোনো বাধা অতিক্ৰম কৰিব পাৰি।
