আৱাজ দ্য ভইচ অসম ব্যুৰ'
বেংককত অনুষ্ঠিত বিমষ্টেক সন্মিলনৰ আঁৰত ভাৰতৰ প্ৰধানমন্ত্ৰী নৰেন্দ্ৰ মোদী আৰু বাংলাদেশৰ অন্তৱৰ্তীকালীন চৰকাৰৰ মুখ্য উপদেষ্টা মহম্মদ ইউনুছৰ মাজত এক গুৰুত্বপূৰ্ণ বৈঠক অনুষ্ঠিত হয়। বৈদেশিক পৰিক্ৰমা মন্ত্ৰী এছ জয়শংকৰ আৰু ৰাষ্ট্ৰীয় নিৰাপত্তা উপদেষ্টা অজিত ডোভালো বৈঠকত উপস্থিত থাকে।
এই বৈঠকত প্রধানমন্ত্রী মোদীয়ে বাংলাদেশৰ মূৰব্বীগৰাকীৰ সন্মুখত দেশখনত ধৰ্মীয় সংখ্যালঘুসকলৰ সুৰক্ষাক লৈ ভাৰতৰ উদ্বেগৰ বিষয়ে উল্লেখ কৰে। উত্তৰ-পূব ভাৰতক লৈ মহম্মদ ইউনুছে শেহতীয়াকৈ কৰা মন্তব্যই ভাৰতত তীব্ৰ প্ৰতিক্ৰিয়াৰ সৃষ্টি কৰাৰ দুদিন পিছতে আয়োজিত এই বৈঠকত প্ৰধানমন্ত্ৰী মোদীয়ে বাংলাদেশৰ মূৰব্বীগৰাকীক পৰিৱেশ বিনষ্ট কৰা মন্তব্য এৰাই চলিবলৈও পৰামৰ্শ আগবঢ়ায়।
"প্ৰধানমন্ত্ৰীয়ে গণতান্ত্ৰিক, সুস্থিৰ, শান্তিপূৰ্ণ, প্ৰগতিশীল আৰু সৰ্বাংগীন বাংলাদেশৰ প্ৰতি ভাৰতৰ সমৰ্থন পুনৰবাৰ উল্লেখ কৰে। তেওঁ এই সম্পৰ্কত ভাৰতে জনকেন্দ্ৰিক দৃষ্টিভংগীত বিশ্বাস কৰা বুলি উল্লেখ কৰে আৰু দুয়োখন দেশৰ দীৰ্ঘকালীন সহযোগিতাৰ ওপৰত আলোকপাত কৰে। এই মনোভাৱেৰে প্ৰধানমন্ত্ৰীয়ে পুনৰবাৰ বাংলাদেশৰ সৈতে ইতিবাচক আৰু গঠনমূলক সম্পৰ্ক গঢ়ি তোলাৰ ইচ্ছাক উল্লেখ কৰে।"-বৈদেশিক সচিব বিক্ৰম মিশ্ৰীয়ে পিছত সংবাদ মাধ্যমৰ আগত এইদৰে কয়।
মিশ্ৰীয়ে কয়, "প্ৰধানমন্ত্ৰীয়ে এই সন্দৰ্ভতো আহ্বান জনাইছে যে পৰিৱেশ বিনষ্ট কৰা যিকোনো বাক্যবাণ এৰাই চলাটোৱেই উত্তম। সীমান্তৰ সুৰক্ষাৰ ক্ষেত্ৰত সুস্থিৰতা আৰু নিৰাপত্তা বজাই ৰখাৰ বাবে প্ৰয়োজনীয় আইন কঠোৰভাৱে বলবৎ কৰা আৰু বিশেষকৈ নিশাৰ ভাগত অবৈধভাৱে সীমান্ত পাৰ হোৱা ৰোধ কৰা উচিত বুলিও প্ৰধানমন্ত্ৰীয়ে উল্লেখ কৰে।"
বৈদেশিক সচিবগৰাকীয়ে কয় যে প্ৰধানমন্ত্ৰী মোদীয়ে হিন্দুকে ধৰি বাংলাদেশৰ সংখ্যালঘুসকলৰ সুৰক্ষা আৰু নিৰাপত্তা সম্পৰ্কীয় ভাৰতৰ উদ্বেগক আলোকপাত কৰে আৰু বাংলাদেশ চৰকাৰে তেওঁলোকৰ নিৰাপত্তা সুনিশ্চিত কৰিব বুলি আশা প্ৰকাশ কৰে। প্ৰধানমন্ত্ৰীয়ে সংখ্যালঘুৰ ওপৰত হোৱা অত্যাচাৰৰ সকলো গোচৰৰ পুংখানুপুংখ তদন্তৰ বাবেও বাংলাদেশ চৰকাৰক হেঁচা প্ৰয়োগ কৰে।
উল্লেখ্য যে, যোৱা বছৰৰ আগষ্ট মাহত শ্বেখ হাছিনা চৰকাৰক উৎখাত কৰাৰ পিছত ইউনুছে বাংলাদেশৰ দায়িত্ব লৈছিল। এই পট পৰিৱৰ্তনৰ পিছত এইখন আছিল দুয়োগৰাকী নেতাৰ মাজত হোৱা প্ৰথমখন বৈঠক। বেইজিঙৰ সৈতে ঢাকাৰ ঘনিষ্ঠতা বৃদ্ধি পোৱাৰ মাজতে এই বৈঠকে বিশেষ তাৎপৰ্য লাভ কৰিছে।
ইয়াৰ পূৰ্বে প্ৰধানমন্ত্ৰী মোদীয়ে ২৬ মাৰ্চত মহম্মদ ইউনুছলৈ পত্ৰ লিখি বাংলাদেশৰ স্বাধীনতা দিৱসৰ শুভেচ্ছা জনাইছিল। প্ৰধানমন্ত্ৰীয়ে তেওঁৰ পত্ৰত পাৰস্পৰিক সংবেদনশীলতাৰ তাৎপৰ্যৰ ওপৰত গুৰুত্ব আৰোপ কৰি কৈছিল যে বাংলাদেশৰ মুক্তি যুদ্ধ দুয়োখন দেশৰ এক উমৈহতীয়া ইতিহাস।
মনকৰিবলগীয়া যে, বাংলাদেশ চৰকাৰৰ মুৰব্বী মহম্মদ ইউনুছৰ শেহতীয়া এক মন্তব্যত অসমকে ধৰি সমগ্ৰ উত্তৰ-পূব ভাৰতক সামৰি ‘বৃহত্তৰ বাংলা' গঠনৰ বাবে ভাৰতবিৰোধী স্থিতি লৈ অহা মৌলবাদী শক্তিৰ ষড়যন্ত্র প্রকাশ পোৱাৰ পিছতে তীব্ৰ প্ৰতিক্ৰিয়া প্ৰকাশ কৰিছে শাসক-বিৰোধী উভয় পক্ষৰ নেতাসকলে।
সকলোৱে আশংকা কৰিছে যে শিলিগুৰি কৰিডৰ এলেকাত বাংলাদেশ আৰু নেপালৰ মাজৰ দূৰত্ব প্রায় ষাঠি কিলোমিটাৰ আৰু বাংলাদেশৰ পৰা ভূটানৰ কাষৰীয়া চীনৰ ভূখণ্ডলৈ দূৰত্ব প্রায় এশ কিলোমিটাৰ। ফলত যদিহে চীনে বাংলাদেশত ঘাটি পাতি গজগজীয়া হয়, তেন্তে সময়ত আগ্রাসী দেশখনে অতি সহজেই ‘চিকেন নেক' দখল কৰিব পাৰিব।
চীনক বজাৰ দখলৰ বাবে আমন্ত্ৰণ জনাই বাংলাদেশৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে উত্তৰ-পূৰ্বাঞ্চলক ‘লেণ্ড লকড' এলেকা বুলি আখ্যা দিয়া মন্তব্যক গৰিহণা দিছে অসমৰ মুখ্যমন্ত্ৰী হিমন্তবিশ্ব শৰ্মাই। উত্তৰ-পূৰ্বাঞ্চলক লেণ্ড লকড বুলি অভিহিত কৰি আৰু বাংলাদেশ সমুদ্ৰৰ অভিভাৱক বুলি দেশখনৰ অন্তৱৰ্তীকালীন চৰকাৰৰ মুৰব্বী মহম্মদ ইউনুছে আগবঢ়োৱা মন্তব্য আপত্তিজনক বুলি শৰ্মাই অভিহিত কৰে।
সমগ্ৰ বিষয়টোক লৈ মুখ্যমন্ত্রী শর্মাই কয়—'উত্তৰ-পূৰ্বাঞ্চল লেণ্ড লকড হয়। কিন্তু আমি লেণ্ড লকড নোহোৱা কৰিব পাৰো। যদি 'চিকেন নেক'ৰ তলেদি আণ্ডাৰ গ্ৰাউণ্ড ৰে'লৱে কৰিডৰ নিৰ্মাণ কৰিব পাৰো, ৰাস্তা বনাব পাৰো, ভুটানেদি যদি আৰু এটা ৰাস্তা ভাৰতবৰ্ষৰ উত্তৰ-পূৰ্বৰ মূল ভূখণ্ডলৈ নিৰ্মাণ কৰিব পাৰো, তেন্তে পৰিবেশৰ পৰিবৰ্তন হ'ব। মহম্মদ ইউনুছে যি বক্তব্য প্ৰদান কৰিছে, সেয়া পাতলকৈ লোৱা উচিত নহয় । মই ভাবো ভাৰত চৰকাৰে এইক্ষেত্ৰত শক্তিশালী পদক্ষেপ ল'ব।'
উল্লেখ্য যে, চীন ভ্ৰমণৰ সময়ত বাংলাদেশৰ অন্তৱৰ্তীকালীন মূৰব্বী মহম্মদ ইউনুছে বেইজিঙক প্ৰত্যক্ষভাৱে আহ্বান জনাইছে যে বাংলাদেশক তেওঁলোকে উৎপাদন, লজিষ্টিক আৰু বাণিজ্যৰ ক্ষেত্ৰত মূল আঞ্চলিক অংশীদাৰ হিচাপে স্থান দিয়ক। বাংলাদেশৰ জৰিয়তে চীনৰ গভীৰ অৰ্থনৈতিক সংযোগক আমন্ত্ৰণ জনাই ইউনুছে কয়, “সাত ভগ্নী বুলি জনাজাত পূব ভাৰতৰ সাতখন ৰাজ্য সম্পূৰ্ণৰূপে ভূমিৰে আৱদ্ধ। সমুদ্ৰ ঢুকি পাবলৈ তেওঁলোকৰ কোনো উপায় নাই। আমি সাগৰৰ একমাত্ৰ গেটৱে (প্ৰৱেশদ্বাৰ)। সেয়ে চীনে এই অঞ্চলসমূহত অৰ্থনীতিৰ বিস্তাৰ ঘটাব পাৰে।"
