ঢাকা
শেহতীয়াকৈ প্ৰাক্তন প্ৰধানমন্ত্ৰী শ্বেখ হাছিনাৰ পিতৃ শ্বেখ মুজিবুৰ ৰহমানৰ ঘৰ ধ্বংস কৰাৰ পিছত পদচ্যুত প্ৰধানমন্ত্ৰীগৰাকীয়ে দিয়া বক্তব্যৰ সন্দৰ্ভত বাংলাদেশে ভাৰতৰ ওচৰত আনুষ্ঠানিকভাৱে “তীব্ৰ প্ৰতিবাদ” সাব্যস্ত কৰে।
বাংলাদেশে হাছিনাৰ শেহতীয়া ভাষণক “মিছা আৰু ৰচনামূলক” বুলি সমালোচনা কৰি কয় যে ভাৰতত নিৰ্বাসিত হৈ থকাৰ সময়ত প্ৰাক্তন প্ৰধানমন্ত্ৰীগৰাকীৰ বক্তব্য আৰু কাৰ্যকলাপক “বিদ্বেষপূৰ্ণ কাৰ্য্য” বুলি গণ্য কৰে।
পাৰস্পৰিক সন্মানৰ গুৰুত্ব আৰু দুয়োখন দেশৰ ঐতিহাসিক সম্পৰ্কৰ কথা উল্লেখ কৰি ভাৰতে তেওঁক আৰু ভাষণ দিয়াত বাধা দিবলৈ অনুৰোধ জনাইছে।
"সামাজিক মাধ্যমকে ধৰি বিভিন্ন মঞ্চত, প্ৰাক্তন প্ৰধানমন্ত্ৰী শ্বেখ হাছিনাই বাংলাদেশত অস্থিৰতা জগাই তোলা মিছা আৰু ৰচনামূলক মন্তব্য আৰু বক্তব্যক লৈ বাংলাদেশৰ বৈদেশিক পৰিক্ৰমা মন্ত্ৰালয়ে ভাৰত চৰকাৰৰ ওচৰত তীব্ৰ প্ৰতিবাদ সাব্যস্ত কৰে, কিয়নো এনে বক্তব্যই বাংলাদেশৰ জনসাধাৰণৰ আৱেগক আঘাত কৰে ... মন্ত্ৰালয়ে লগতে জোৰ দি কয় যে তেওঁৰ এনে কাৰ্যকলাপ, বাংলাদেশৰ প্ৰতি বিদ্বেষপূৰ্ণ কাৰ্য্য হিচাপে গণ্য কৰা হয় আৰু দুয়োখন দেশৰ মাজত সুস্থ সম্পৰ্ক স্থাপনৰ প্ৰচেষ্টাৰ বাবে অনুকূল নহয়।" - বাংলাদেশৰ বৈদেশিক মন্ত্ৰালয়ে ফেচবুকত এটা পোষ্টত কয়।
বৃহস্পতিবাৰে বাংলাদেশৰ বৈদেশিক মন্ত্ৰালয়ে ভাৰতৰ ভাৰপ্ৰাপ্ত উচ্চায়ুক্তক ঢাকালৈ মাতি আনে। বাংলাদেশৰ বিদেশ উপদেষ্টা মো টৌহিদ হোছেইনে কয় যে বাংলাদেশে ভাৰতক আনুষ্ঠানিকভাৱে লিখিতভাৱে অনুৰোধ জনাইছে যে শ্বেখ হাছিনাই এনে বক্তব্য আৰু মন্তব্য দিয়াতযেন বাধা দিয়ে, কিয়নো সেইবোৰ বাংলাদেশৰ স্বাৰ্থৰ বিৰুদ্ধে।
তেওঁ লগতে কয়, "আমি এই সন্দৰ্ভত কোনো সঁহাৰি পোৱা নাই। শেহতীয়া পৰিস্থিতিৰ বাবে বাংলাদেশে পুনৰবাৰ ভাৰতলৈ প্ৰতিবাদী টোকা প্ৰেৰণ কৰিছে। ভাৰতীয় ভাৰপ্ৰাপ্ত উচ্চায়ুক্তক মাতি আনি প্ৰতিবাদ পত্ৰখন গতাই দিয়া হৈছে যাতে তেওঁ (শ্বেখ হাছিনা)ক বাধা দিয়া হয়।"
প্ৰতিবাদকাৰীয়ে তেওঁৰ পিতৃ তথা বাংলাদেশৰ প্ৰতিষ্ঠাপক শ্বেখ মুজিবুৰ ৰহমানৰ ঢাকাত থকা বাসগৃহ ভাঙি জুই লগাই দিয়াৰ পিছত বুধবাৰে নিশা হাছিনাই ভাষণ প্ৰদান কৰে। আৱামি লীগৰ নেতাক লক্ষ্য কৰি আন কেইবাটাও স্থানতো অনুৰূপ ভাংচুৰ কাণ্ড সংঘটিত হয়।
ভাষণৰ সময়ত হাছিনাই নাগৰিকসকলক বৰ্তমানৰ প্ৰশাসনৰ বিৰুদ্ধে বিৰোধিতা কৰিবলৈ আহ্বান জনায়। স্পষ্ট আৱেগেৰে ভাষণ দি হাছিনাই কয় যে পাকিস্তানী বাহিনীয়ে ১৯৭১ চনৰ মুক্তিযুদ্ধত ঘৰটো লুটপাত দ্ৰিছিল, কিন্তু তেওঁলোকে ইয়াক ভাঙি পেলোৱা নাছিল বা জ্বলাই দিয়া নাছিল।
"আজি এই ঘৰটো ভাঙি পেলোৱা হৈছে। কি অপৰাধ কৰিছিল? ঘৰটোলৈ ইমান ভয় কিয় কৰিছে ... মই দেশৰ জনসাধাৰণৰ পৰা ন্যায় বিচাৰো। মই আপোনালোকৰ বাবে একো কৰা নাছিলো নেকি?" তেওঁ কয়।
হাছিনাই কয় যে, "তেওঁলোকে এটা অট্টালিকা ভাঙিব পাৰে, কিন্তু ইতিহাস নহয়... কিন্তু তেওঁলোকে এইটোও মনত ৰাখিব লাগিব যে ইতিহাসে প্ৰতিশোধ লয়।"
"তেওঁলোকৰ এতিয়াও ৰাষ্ট্ৰীয় পতাকা, সংবিধান আৰু আমি লাখ লাখ শ্বহীদৰ জীৱনৰ মূল্যত অৰ্জন কৰা স্বাধীনতা বুলডোজাৰেৰে ধ্বংস কৰাৰ শক্তি নাই," তেওঁ মুহাম্মাদ ইউনুছ নেতৃত্বাধীন অন্তৱৰ্তীকালীন চৰকাৰৰ কথা উল্লেখ কৰি কয়।
সামাজিক মাধ্যমত “বুলডজাৰ শোভাযাত্ৰা”ৰ আহ্বানৰ প্ৰতি সঁহাৰি জনাই ঢাকাৰ শ্বেখ মুজিবুৰ ৰহমানৰ ৩২নং ধনমণ্ডী বাসগৃহৰ ওচৰত সমবেত হয় বিক্ষোভকাৰী। পৰৱৰ্তী সময়ত ভিৰটোৱে অট্টালিকাটোত জ্বলাই দিয়ে।
বিভিন্ন আৱামি লীগ সংগঠনৰ কাৰ্যালয় হিচাপে কাম কৰা চুবুৰীয়া গাঁথনিটোও ধ্বংস হৈ পৰে।
প্ৰতিবাদকাৰীয়ে শ্বেখ মুজিবুৰ ৰহমানৰ ছবিৰ মিউৰেলৰো ক্ষতিসাধন কৰে।
