নতুন দিল্লী
কানাডা চৰকাৰে শুকুৰবাৰে কয় যে খালিস্তানী সন্ত্ৰাসবাদী হৰদীপ সিং নিজ্জাৰৰ হত্যাকে ধৰি কানাডাৰ কোনো অপৰাধমূলক কাৰ্যকলাপৰ সৈতে ভাৰতৰ প্ৰধানমন্ত্ৰী নৰেন্দ্ৰ মোদী বা তেওঁৰ শীৰ্ষ বিষয়াসকল জড়িত থকাৰ কোনো প্ৰমাণ নাই।
কানাডাৰ এখন কাকতত নাম প্ৰকাশ নকৰা ৰাষ্ট্ৰীয় নিৰাপত্তা বিষয়াৰ উদ্ধৃতি দি নিজ্জাৰক হত্যাৰ অভিযোগ উত্থাপন কৰা ষড়যন্ত্ৰ কেন্দ্ৰীয় গৃহমন্ত্ৰী অমিত শ্বাহে পৰিচালনা কৰা বুলি দাবী কৰা বাতৰিৰ পিছতে কানাডা চৰকাৰে এই স্পষ্টীকৰণ দিয়া হৈছে। প্ৰতিবেদনত আৰু অভিযোগ কৰা হৈছে যে প্ৰধানমন্ত্ৰী মোদী, বৈদেশিক পৰিক্ৰমা মন্ত্ৰী এছ জয়শংকৰ, আৰু ৰাষ্ট্ৰীয় নিৰাপত্তা উপদেষ্টা অজিত ডোভালক এই পৰিকল্পনাৰ বিষয়ে অৱগত কৰা হৈছিল।
অৱশ্যে একেখন প্ৰতিবেদনতে স্বীকাৰ কৰা হৈছে যে কানাডা চৰকাৰৰ হাতত প্ৰধানমন্ত্ৰী মোদীৰ বিৰুদ্ধে কৰা এই দাবীসমূহৰ সমৰ্থনত “কোনো প্ৰত্যক্ষ প্ৰমাণ” নাই। কানাডা চৰকাৰে নিজৰ বিবৃতিত এই অভিযোগসমূহৰ পৰা নিজকে আঁতৰাই ৰাখি কয় যে কোনো প্ৰমাণিত প্ৰমাণ নাই।
"কানাডাৰ ভিতৰত চলি থকা গুৰুতৰ অপৰাধমূলক কাৰ্যকলাপৰ সৈতে প্ৰধানমন্ত্ৰী মোদী, বৈদেশিক মন্ত্ৰী জয়শংকৰ বা এন এছ এ ডোভালক জড়িত কৰা বুলি কানাডা চৰকাৰে ক'তো উল্লেখ কৰা নাই বা এই বিষয়ক লৈ আমাৰ কোনো প্ৰমাণো নাই। ইয়াৰ বিপৰীতে যিকোনো পৰামৰ্শ জল্পনা-কল্পনামূলক আৰু ভুল দুয়োটা।"-চৰকাৰী বিবৃতিটোত এইদৰে কোৱা হৈছে।
উল্লেখ্য যে, যোৱা বছৰ কানাডাৰ প্ৰধানমন্ত্ৰী জাষ্টিন ট্ৰুডোৱে প্ৰথমবাৰৰ বাবে ভাৰতক নিজ্জাৰ হত্যাকাণ্ডৰ সৈতে জড়িত বুলি অভিযোগ কৰাৰ পিছৰে পৰা দেশখনৰ সৈতে ভাৰতৰ সম্পৰ্ক বিঘ্নিত হয়। কানাডাৰ দৈনিক কাকতখনৰ প্ৰতিবেদনক হাস্যকৰ আৰু ভিত্তিহীন বুলি উল্লেখ কৰি ভাৰতে কৈছিল যে এইবোৰ মনেসজা বাতৰিয়ে দেশ দুখনৰ সম্পৰ্কত ক্ষতি সাধন কৰিব।
বৈদেশিক পৰিক্ৰমা মন্ত্ৰালয়ৰ মুখপাত্ৰ ৰন্ধীৰ জয়ছৱালে কয় যে আমি সাধাৰণতে সংবাদ মাধ্যমৰ বাতৰিৰ ওপৰত কোনো মন্তব্য নকৰো। অৱশ্যে কানাডাৰ চৰকাৰী সূত্ৰৰ উদ্ধৃতিৰে প্ৰকাশ পোৱা এনে হাস্যকৰ বক্তব্যক চৰকাৰে খাৰিজ কৰা উচিত।
