নতুন দিল্লী
বৈদেশিক পৰিক্ৰমা মন্ত্ৰালয়ে জনোৱা মতে, লাডাখৰ অংশস্বৰূপ চীনৰ হোটান প্ৰিফেকচাৰত দুখন নতুন কাউন্টিৰ ঘোষণাক লৈ ভাৰতে চীনৰ ওচৰত “গম্ভীৰ প্ৰতিবাদ” সাব্যস্ত কৰিছে।
শুকুৰবাৰে সংবাদ মাধ্যমৰ সন্মুখত বৈদেশিক মন্ত্ৰালয়ৰ মুখপাত্ৰ ৰণধীৰ জয়ছৱালে কয়, "আমি চীনৰ হোটান প্ৰিফেকচাৰত দুখন নতুন কাউন্টি স্থাপনৰ সৈতে জড়িত ঘোষণা দেখিছো। এই তথাকথিত কাউন্টিসমূহৰ অধিকাৰক্ষেত্ৰৰ কিছু অংশ ভাৰতৰ কেন্দ্ৰীয় শাসিত অঞ্চল লাডাখত পৰে।"
জয়ছৱালে কয় যে লাডাখত ভাৰতৰ ভূখণ্ড চীন অবৈধভাৱে দখল কৰাটো ভাৰতে কেতিয়াও মানি লোৱা নাই। "নতুন কাউন্টি সৃষ্টিৰ ফলত এই অঞ্চলৰ ওপৰত আমাৰ সাৰ্বভৌমত্বৰ সন্দৰ্ভত ভাৰতৰ দীৰ্ঘদিনীয়া আৰু সামঞ্জস্যপূৰ্ণ স্থিতিৰ ওপৰত কোনো প্ৰভাৱ নপৰে আৰু চীনে সেই ভূমি অবৈধ আৰু বলপূৰ্বকভাৱে দখল কৰাটোকো বৈধতা প্ৰদান নকৰে। আমি কূটনৈতিক মাধ্যমেৰে চীনৰ ওচৰত গম্ভীৰ প্ৰতিবাদ দাখিল কৰিছো।"-তেওঁ কয়।
উল্লেখযোগ্য যে, বেইজিঙে নিজৰ মানচিত্ৰত ভাৰতীয় ভূখণ্ডৰ ওপৰত দাবী উত্থাপন কৰাটো এইটোৱে প্ৰথম ঘটনা নহয়। ২০১৭ চনত চীনে অৰুণাচল প্ৰদেশৰ ছটা স্থানৰ ‘মানক’ (standardised) নামৰ প্ৰাৰম্ভিক তালিকা প্ৰকাশ কৰিছিল। ২০২১ চনত ই ১৫টা স্থানক লৈ দ্বিতীয়খন তালিকা প্ৰকাশ কৰে আৰু আন এখন তালিকাত ২০২৩ চনত প্ৰকাশ পোৱা ১১টা অতিৰিক্ত স্থানৰ নাম সন্নিবিষ্ট কৰা হয়।
ইফালে, চীনে ভাৰতীয় ভূখণ্ড দাবী কৰাৰ চেষ্টাক নাকচ কৰি ভাৰতে দৃঢ়তাৰে কয় যে নতুন নাম নিৰ্ধাৰণ কৰিলে এই বাস্তৱতাৰ কোনো পৰিৱৰ্তন নহয়।
জয়ছৱালে কয় যে তিব্বতৰ ইয়াৰলুং ছাংপো নদীত চীনে জলবিদ্যুৎ প্ৰকল্প নিৰ্মাণৰ বিষয়েও কেন্দ্ৰ অৱগত। 'নদীৰ পানীৰ ওপৰত প্ৰতিষ্ঠিত ব্যৱহাৰকাৰী অধিকাৰ থকা এখন নদীপৰীয়া ৰাষ্ট্ৰ হিচাপে আমি বিশেষজ্ঞ পৰ্যায়ৰ লগতে কূটনৈতিক মাধ্যমৰ জৰিয়তে চীনৰ পক্ষক তেওঁলোকৰ ভূখণ্ডৰ নদীসমূহৰ ওপৰত মেগা প্ৰকল্পৰ সন্দৰ্ভত আমাৰ মতামত আৰু উদ্বেগ ধাৰাবাহিকভাৱে প্ৰকাশ কৰি আহিছো।' তেওঁ কয়।
