টেল আভিভ
ইজৰাইলৰ বৈদেশিক মন্ত্ৰী ইজৰাইল কাটজে নিশ্চিত কৰিছে যে ৭ অক্টোবৰ ২০২৩ত ইজৰাইলৰ ওপৰত আক্ৰমণৰ নিৰ্দেশ দিয়া হামাছৰ মুৰব্বী ইয়াহিয়া ছিনৱাৰৰ মৃত্যু হোৱা বুলি প্ৰাৰম্ভিক ডি এন এ পৰীক্ষাত প্ৰকাশ পাইছে। ৭ অক্টোবৰৰ ইহুদী ৰাষ্ট্ৰৰ ওপৰত হোৱা আটাইতকৈ মাৰাত্মক সন্ত্ৰাসবাদী আক্ৰমণত ১২০০ ইজৰাইলীৰ মৃত্যু হৈছিল আৰু ই মধ্যপ্ৰাচ্যক বিশৃংখলতাত ডুবাই পেলাইছিল।
কাটজে এক বিবৃতিত কয় যে, "৭ অক্টোবৰৰ হত্যাকাণ্ড আৰু অত্যাচাৰৰ বাবে দায়ী গণহত্যাকাৰী ইয়াহয়া সিনৱাৰক আজি আইডিএফৰ জোৱানে হত্যা কৰে।"
ইয়াৰ পূৰ্বে আজি ইজৰাইলৰ বাহিনীয়ে গাজাত এক অভিযানৰ সময়ত তিনিজন সন্ত্ৰাসবাদীক হত্যা কৰাৰ কথা ঘোষণা কৰে। বিবৃতিটোত লগতে উল্লেখ কৰা হৈছিল যে সন্ত্ৰাসবাদীক পোৱা অট্টালিকাটোত পণবন্দী হোৱাৰ কোনো চিন-মোকাম নাই। তেওঁলোকৰ অভিযানৰ সময়ত গ্ৰহণ কৰা সাৱধান পন্থাৰ ওপৰত গুৰুত্ব আৰোপ কৰি আইডিএফে লগতে কয় যে অঞ্চলটোত কাম কৰি থকা বাহিনীসমূহে প্ৰয়োজনীয় সাৱধানতাৰে কাম অব্যাহত ৰাখিছে।
ইজৰাইলে হামাছৰ মুৰব্বীজনৰ সন্ধানত বছৰজোৰা অভিযানত কোনো ধৰণৰ চেষ্টা এৰা নাই, ইহুদী ৰাষ্ট্ৰখনৰ অন্যতম ডাঙৰ শত্ৰুক নিৰ্মূল কৰিবলৈ ইজৰাইলৰ নিৰাপত্তা সংস্থাৰ ছত্ৰছায়াত চোৰাংচোৱা বিষয়া, বিশেষ কৰ্মী, সামৰিক অভিযন্তা আৰু নিৰীক্ষণ বিশেষজ্ঞৰ এটা টাস্কফৰ্ক নিয়োজিত কৰিছিল।
দীৰ্ঘদিন ধৰি হামাছৰ সামৰিক অভিযানৰ পৰিকল্পনাকাৰী হিচাপে বিবেচিত ছিনৱাৰে আগষ্ট মাহত ইছমাইল হানিয়েহৰ উত্তৰাধিকাৰী হিচাপে নিৰ্বাচিত হোৱাৰ সময়ত নিজৰ ক্ষমতা সুদৃঢ় কৰিছিল।
১৯৬২ চনত জন্মগ্ৰহণ কৰা ছিনৱাৰক হামাছৰ প্ৰতিষ্ঠাপক শ্বেইখ আহমেদ ইয়াছিনে নিযুক্তি দিছিল আৰু তেওঁক আল মাজদ নামেৰে পৰিচিত এটা আভ্যন্তৰীণ নিৰাপত্তা গোটৰ মুৰব্বী হিচাপে নিযুক্তি দিছিল। তেওঁৰ ভূমিকা আছিল ইছলামিক নৈতিকতা আইন উলংঘা কৰা বা ইজৰাইলী বাহিনীৰ সৈতে সহযোগিতা কৰা বুলি সন্দেহ কৰা লোকসকলক বিচাৰি উলিওৱা আৰু শাস্তি দিয়া, যিটো বাবে অৱশেষত তেওঁক গ্ৰেপ্তাৰ কৰা হয়।
১৯৮৮ চনত ইজৰাইলৰ সৈতে সহযোগিতা কৰাৰ অপৰাধত চাৰিজন পেলেষ্টাইনীক হত্যা কৰাৰ অপৰাধত তেওঁ কাৰাগাৰত বন্দী হৈছিল। ইজৰাইলৰ জেলত তেওঁ দুটা দশকৰো অধিক সময় কটায়, য’ত তেওঁ হিব্ৰু ভাষা শিকিছিল।
২০১১ চনত বন্দী বিনিময়ত মুকলি কৰি দিয়া হৈছিল তেওঁক।
