নতুন দিল্লী
লণ্ডন-মুম্বাই ভাৰ্জিন আটলাণ্টিক বিমানখনৰ ২৫০ জনতকৈ অধিক যাত্ৰী বৰ্তমান ৪০ ঘণ্টাৰো অধিক সময় ধৰি তুৰস্কৰ দিয়াৰবাকিৰ বিমানবন্দৰত আৱদ্ধ হৈ আছে, যিসকলৰ অধিকাংশই হৈছে ভাৰতীয় যাত্ৰী। বিমান সংস্থাৰ এগৰাকী মুখপাত্ৰই জনোৱা মতে, ২ এপ্ৰিলত লণ্ডনৰ পৰা মুম্বাইলৈ যোৱা VS358 বিমানখন দিয়াৰবাকিৰ বিমানবন্দৰলৈ “জৰুৰী চিকিৎসা ডাইভাৰচন”ৰ বাবে অৱতৰণ কৰা হৈছিল। অৱতৰণ কৰাৰ পিছত বিমানখনে কাৰিকৰী সমস্যাত ভুগিছে আৰু পৰিদৰ্শন চলি আছে।
আমাৰ যাত্ৰী আৰু ক্ৰুৰ সুৰক্ষা আৰু নিৰাপত্তা আমাৰ সৰ্বোচ্চ অগ্ৰাধিকাৰ হৈয়ে আহিছে, আৰু ইয়াৰ ফলত হোৱা অসুবিধাৰ বাবে আমি আন্তৰিকতাৰে ক্ষমা বিচাৰিছো। প্ৰয়োজনীয় কাৰিকৰী অনুমোদন লাভ কৰাৰ ভিত্তিত আমি ৪ এপ্ৰিল শুকুৰবাৰে স্থানীয় সময় অনুসৰি ১২:০০ বজাত দিয়াৰবাকিৰ বিমানবন্দৰৰ পৰা মুম্বাইলৈ VS1358 বিমান চলাই যাম বুলি ভাৰ্জিন আটলাণ্টিকৰ মুখপাত্ৰই জনায়।
যদিহে অনুমোদন লাভ নকৰে তেন্তে আমি ইয়াৰ পৰিৱৰ্তে কাইলৈ তুৰ্কীৰ আন এটা বিমানবন্দৰত যাত্ৰীৰ বাবে বাছ ট্ৰেন্সফাৰৰ ব্যৱস্থা কৰি আমাৰ যাত্ৰীৰ মুম্বাইলৈ যাত্ৰা সম্পূৰ্ণ কৰাৰ পৰিকল্পনা কৰিছো বুলি বিমান সংস্থাটোৱে জনায়। ইয়াৰ মাজতে তুৰস্কত যাত্ৰীসকলক ৰাতিটোৰ বাবে হোটেলত থকাৰ ব্যৱস্থা আৰু সতেজ খাদ্যৰ ব্যৱস্থা কৰা হৈছে, আনহাতে আমি এটা সমাধানৰ দিশত কাম কৰিম, আৰু নতুন আপডেট উপলব্ধ হোৱাৰ লগে লগে আমি সকলো যাত্ৰীক অৱগত কৰিম বুলি ভাৰ্জিন আটলাণ্টিকে কয়।
বিমানবন্দৰত ৰৈ থকা ৩০০ জন যাত্ৰীৰ বাবে এটা মাত্ৰ শৌচাগাৰৰ অভিযোগ বহুতে কৰিছিল। সংবাদ সংস্থাৰ আগত এগৰাকী যাত্ৰীয়ে কয় যে যাত্ৰীসকলৰ বাবে কম্বলৰ ব্যৱস্থা কৰা হোৱা নাছিল। যাত্ৰীসকলৰ বৰ্তমানৰ অৱস্থা সম্পৰ্কে ভাৰ্জিন আটলাণ্টিকৰ এগৰাকী মুখপাত্ৰই উত্তৰ দিয়ে যে যাত্ৰীসকলক হোটেলত ৰখা হৈছে আৰু বিমান সংস্থাটোৱে সমাধানৰ দিশত কাম কৰি আছে। আংকাৰাত থকা ভাৰতীয় দূতাবাসে পৰিস্থিতি নিৰীক্ষণ কৰি থকা বুলি জানিবলৈ দিছে।
যাত্ৰীসকলে কয় যে, ভাৰ্জিন আটলাণ্টিকে প্ৰথমতে যাত্ৰীসকলক ইস্তানবুললৈ — প্ৰায় ১৪০০ কিলোমিটাৰ দূৰত্বত আৰু তাৰ পৰা মুম্বাইলৈ যোৱাৰ পিছত ধন ঘূৰাই দিয়াৰ প্ৰস্তাৱ দিছিল। কিন্তু বিকল্প ভ্ৰমণৰ বিকল্প সীমিত, আৰু কোনো বাণিজ্যিক বিমানে দিয়াৰবাকিৰৰ পৰা ভাৰতলৈ পোনপটীয়াকৈ চলাচল নকৰে।
প্ৰথমতে যাত্ৰীসকলৰ দুৰ্দশাৰ ওপৰত আলোকপাত কৰা এক্স ব্যৱহাৰকাৰী সত্যম সুৰানাই কয় যে, "ভাৰ্জিন আটলাণ্টিকে আৱদ্ধ যাত্ৰীসকলক কোনো ধৰণৰ আপডেট আৰু সমৰ্থন দিয়াত নিৰ্মমভাৱে ব্যৰ্থ হৈছে। মহিলা, জ্যেষ্ঠ নাগৰিক, কেঁচুৱা, সকলোৱে আৱদ্ধ আৰু হতাশ হৈ পৰিছে।"
সীমিত সুবিধা থকা সৰু সামৰিক বিমানবন্দৰ বুলি কোৱা দিয়াৰবাকিৰ বিমানবন্দৰে যাত্ৰীসকলৰ অস্বস্তি আৰু অধিক বৃদ্ধি কৰিছে। এক্সলৈ লৈ গৈ যাত্ৰীসকলে কৰ্মচাৰীসকলৰ ইংৰাজী কোৱাৰ সীমিত দক্ষতা আৰু অভদ্ৰ আচৰণৰ অভিযোগ কৰিছিল।
দিয়াৰবাকিৰত আবদ্ধ হৈ থকা পৰিয়ালৰ সদস্য শ্বেৰিলিন ফাৰ্নাণ্ডেছে এক্সত অভিযোগ কৰে যে, "যাত্ৰীসকলৰ দোষ নহ’লেও বিমানবন্দৰৰ কৰ্মচাৰীসকলে লেণ্ডিঙৰ বাবে ক্ষুব্ধ হৈ পৰিছে। আনকি তেওঁলোকে পাছপ’ৰ্টও দাবী কৰিছে।”
