‘যুদ্ধ অপৰাধ’ক লৈ নেতানিয়াহুৰ বিৰুদ্ধে আন্তঃৰাষ্ট্ৰীয় অপৰাধ আদালতৰ গ্ৰেপ্তাৰী পৰোৱানা

Story by atv | Posted by [email protected] • 7 h ago

ইজৰাইলৰ প্ৰধানমন্ত্ৰী বেঞ্জামিন নেতানিয়াহু

নতুন দিল্লী

ইজৰাইলৰ প্ৰধানমন্ত্ৰী বেঞ্জামিন নেতানিয়াহু, দেশখনৰ প্ৰাক্তন প্ৰতিৰক্ষা মন্ত্ৰী যোয়াভ গেলেণ্ট আৰু হামাছৰ নেতা মহম্মদ ডায়াব ইব্ৰাহিম আল মাছৰীৰ বিৰুদ্ধে যুদ্ধ-অপৰাধ আৰু মানৱতাৰ বিৰুদ্ধে অপৰাধৰ অভিযোগত বৃহস্পতিবাৰে আন্তঃৰাষ্ট্ৰীয় অপৰাধ আদালতে গ্ৰেপ্তাৰী পৰোৱানা জাৰি কৰে বুলি ৰয়টাৰে প্ৰকাশ কৰিছে।

যোৱা ২০ মে’ত আইচিচিৰ গোচৰীয়া কৰিম খানে ৭ অক্টোবৰত ইজৰাইলৰ ওপৰত হামাছৰ আক্ৰমণ আৰু গাজাত টেল আভিভৰ সামৰিক কাৰ্যকলাপৰ সৈতে জড়িত থকাৰ অভিযোগত গ্ৰেপ্তাৰৰ পৰোৱানা বিচৰা বুলি ঘোষণা কৰাৰ পিছতে এই পদক্ষেপ গ্ৰহণ কৰা হৈছে।

উল্লেখ্য যে, ২০২৩ চনৰ ৭ অক্টোবৰত ইজৰাইলত হামাছৰ আক্ৰমণৰ ফলত ইজৰাইল-হামাছৰ সংঘাত পুনৰ তুংগত উঠে। ইয়াৰ প্ৰতিক্ৰিয়া স্বৰূপে টেল আভিভে ধাৰাবাহিক আক্ৰমণ চলায়। গাজাত দুফালৰ আক্ৰমণত হাজাৰ হাজাৰ নিৰীহ সাধাৰণ নাগৰিকে প্ৰাণ হেৰুৱাইছিল। ইয়াৰ পিছতে আন্তঃৰাষ্ট্ৰীয় অপৰাধ আদালতত যুদ্ধ অপৰাধৰ অভিযোগ দাখিল কৰে কৰিম খানে। কৰিমে অজস্ৰ লোকৰ প্ৰাণ হেৰুৱাৰ বাবে নেতানিয়াহু আৰু তেওঁৰ সংগীসকলক দোষাৰোপ কৰি তেওঁলোকৰ গ্ৰেপ্তাৰৰ দাবী উত্থাপন কৰে।

The International Criminal Court has announced that it is issuing international arrest warrants for Israel’s Prime Minister Benjamin Netanyahu and former Defence Minister Yoav Gallant, alleging war crimes. pic.twitter.com/bLGRXEZIyI
— Al Jazeera English (@AJEnglish) November 21, 2024

আইচিচি (আন্তঃৰাষ্ট্ৰীয় অপৰাধ আদালত)য়ে নেতানিয়াহু আৰু গেলেণ্টক হত্যা, নিৰ্যাতন, অমানৱীয় কাৰ্য্যকে ধৰি মানৱতাৰ বিৰুদ্ধে অপৰাধৰ লগতে যুদ্ধৰ পদ্ধতি হিচাপে অনাহাৰৰ যুদ্ধাপৰাধৰ অভিযোগ উত্থাপন কৰে। অভিযোগ অনুসৰি তেওঁলোকে গাজাত সাধাৰণ নাগৰিকৰ বাবে খাদ্য, পানী, চিকিৎসা সাহায্যৰ দৰে অত্যাৱশ্যকীয় যোগান সীমিত কৰি ৰাখিছিল, যাৰ ফলত শিশুকে ধৰি ভয়াৱহ মানৱীয় সংকট আৰু মৃত্যুৰ সৃষ্টি হৈছিল।