নতুন দিল্লী
ভাৰতীয় চোৰাংচোৱা বুলি অভিযোগ উত্থাপন কৰি পাকিস্তানৰ জেলত ৰখা ভাৰতীয় নাগৰিক কুলভূষণ জাধৱক ২০১৯ চনত আন্তঃৰাষ্ট্ৰীয় ন্যায়ালয়ৰ ৰায়দানৰ পিছত আবেদন কৰাৰ অধিকাৰ দিয়া হোৱা নাছিল কাৰণ এই ৰায়দানত কেৱল কনছুলাৰ প্ৰৱেশৰ বিষয়টোহে সম্বোধন কৰা হৈছিল বুলি পাকিস্তানী কাকত ড’নে প্ৰকাশ কৰিছে।
২০১৯ চনৰ জুন মাহত ভাৰতৰ সপক্ষে ৰায়দান কৰি আইচিজেয়ে জাধৱৰ কনছুলাৰ প্ৰৱেশৰ অধিকাৰক দৃঢ়তাৰে উল্লেখ কৰে আৰু পাকিস্তানক তেওঁৰ দোষী সাব্যস্ত হোৱা আৰু মৃত্যুদণ্ডৰ শাস্তি পুনৰীক্ষণ আৰু পুনৰ বিবেচনা কৰিবলৈ আহ্বান জনায়।
২০২৩ চনৰ মে’ মাহত প্ৰাক্তন প্ৰধানমন্ত্ৰী ইমৰান খানক গ্ৰেপ্তাৰ কৰাৰ ব্যাপক প্ৰতিবাদত জড়িত থকাৰ অভিযোগত দোষী সাব্যস্ত হোৱা পাকিস্তানী নাগৰিকৰ বিৰুদ্ধে সামৰিক আদালতত চলি থকা গোচৰৰ সময়তে বুধবাৰে পাকিস্তানৰ প্ৰতিৰক্ষা মন্ত্ৰালয়ৰ অধিবক্তা খোৱাজা হৰিছ আহমেদে সেই দেশৰ উচ্চতম ন্যায়ালয়ৰ সাংবিধানিক বিচাৰপীঠৰ সন্মুখত জাধৱৰ গোচৰৰ কথা উল্লেখ কৰে।
২০২৩ চনৰ ৯ মে’ত সংঘটিত হোৱা ধাৰাবাহিক সংঘৰ্ষক পাকিস্তান চৰকাৰে “ক’লা দিৱস” বুলি অভিহিত কৰিছে। অধিবক্তা আহমেদে কয় যে, জাধৱক আবেদন কৰাৰ অধিকাৰ দিয়া হৈছিল, যদিও এই অধিকাৰ ২০২৩ চনৰ মে’ মাহৰ সংঘৰ্ষৰ গোচৰত দোষী সাব্যস্ত হোৱা পাকিস্তানৰ নিজৰ নাগৰিকক দিয়া হোৱা নাছিল।
ড'নে প্ৰকাশ কৰা অনুসৰি, পাকিস্তানৰ উচ্চতম ন্যায়ালয়ক জনোৱা হৈছিল যে, এটৰ্নী জেনেৰেল মনছুৰ উছমান আৱানে ৯ মে’ৰ কাণ্ডৰ দোষীক উচ্চ ন্যায়ালয়ৰ সন্মুখত আবেদন কৰাৰ অধিকাৰ প্ৰদানৰ প্ৰশ্নটোক লৈ আলোচনাত ব্যস্ত হৈ আছে, যাৰ বাবে তেওঁক দুদিনমানৰ প্ৰয়োজন হৈছিল।
পাকিস্তানে দাবী কৰিছে যে, ২০১৬ চনত বেলুচিস্তানৰ পৰা জাধৱক চোৰাংচোৱাগিৰি আৰু সন্ত্ৰাসবাদৰ অভিযোগত গ্ৰেপ্তাৰ কৰা হৈছিল। ভাৰতে পাকিস্তানৰ এই অভিযোগ নাকচ কৰিছে, আৰু কয় যে অৱসৰপ্ৰাপ্ত ভাৰতীয় নৌসেনাৰ বিষয়াজনক ইৰাণৰ চাবাহাৰ বন্দৰৰ পৰা অপহৰণ কৰা হৈছিল, য’ত তেওঁৰ অৱসৰৰ পিছত তেওঁৰ ব্যৱসায়িক স্বাৰ্থ আছিল।
ৰায়দানত আইচিজে পাকিস্তানক এইটোও কয় যে, পাকিস্তানে দোষী সাব্যস্ত আৰু শাস্তিৰ কাৰ্যকৰীভাৱে পৰ্যালোচনা আৰু পুনৰ বিবেচনা নকৰালৈকে জাধৱৰ ফাঁচী স্থগিত ৰখা উচিত।
বিশ্ব আদালতৰ ৰায়দানৰ এবছৰৰ পাছত ২০২০ চনৰ জুলাই মাহত ভাৰতে কয় যে, পাকিস্তানে তেওঁক কনছুলাৰ প্ৰৱেশৰ পৰা বঞ্চিত কৰি ভিয়েনা সন্ধি উলংঘা কৰা বুলি ভাৰতৰ স্থিতিৰ সৈতে আদালতে সন্মতি প্ৰকাশ কৰাৰ পিছতো পাকিস্তানে আইচিজেৰ ৰায়দান আখৰে আখৰে আৰু মনোভাৱেৰে কাৰ্যকৰী কৰিবলৈ অস্বীকাৰ কৰিছিল। ভাৰতে জাধৱক দোষী সাব্যস্ত কৰাৰ বিচাৰক হাস্যকৰ বুলি অভিহিত কৰিছে।
