প্ৰধানমন্ত্ৰী মোদীক মৰিচাছৰ সৰ্বোচ্চ সন্মান প্ৰদান; গ্ল'বেল ছাউথৰ নিৰাপত্তা আৰু সমৃদ্ধিৰ বাবে ভাৰতৰ 'মহাসাগৰ' দৃষ্টিভংগী ঘোষণা

Story by atv | Posted by [email protected] • 1 d ago

প্ৰধানমন্ত্ৰী মোদীক মৰিচাছৰ সৰ্বোচ্চ সন্মান প্ৰদান

প’ৰ্ট লুইছ

প্ৰধানমন্ত্ৰী নৰেন্দ্ৰ মোদীয়ে বুধবাৰে গ্ল’বেল ছাউথ অঞ্চলৰ বাবে ভাৰতৰ ‘মহাসাগৰ’ (Mahasagar) দৃষ্টিভংগীৰ ৰূপৰেখা দাঙি ধৰে। দুদিনীয়া মৰিচাছ ভ্ৰমণৰ সময়ত দুয়োখন দেশে কেইবাটাও চুক্তি স্বাক্ষৰ কৰে আৰু ২০১৫ চনৰ মৰিচাছ ভ্ৰমণৰ সময়ত ‘সাগৰ’ দৃষ্টিভংগীৰ ৰূপৰেখা দাঙি ধৰাৰ এদশক পিছত প্ৰধানমন্ত্ৰী মোদীয়ে এইবাৰ ‘মহাসাগৰ’ দৃষ্টিভংগীৰ ৰূপৰেখা দাঙি ধৰে।

তেওঁ 'মহাসাগৰ'ক 'সাগৰ'ৰ দৃষ্টিভংগীৰ উন্নীতকৰণ সংস্কৰণ হিচাপে উত্থাপন কৰে আৰু কয় যে ইয়াৰ উদ্দেশ্য হৈছে উন্নয়নৰ বাবে বাণিজ্য, বহনক্ষম বৃদ্ধিৰ বাবে সামৰ্থ্য বিকাশ, আৰু উমৈহতীয়া ভৱিষ্যতৰ বাবে পাৰস্পৰিক নিৰাপত্তাৰ অনুভৱ।

“দহ বছৰৰ আগতে মৰিচাছত ভিজন সাগৰ (Vision Sagar) অৰ্থাৎ ‘অঞ্চলটোৰ সকলোৰে বাবে নিৰাপত্তা আৰু বৃদ্ধি’ৰ ভেটি স্থাপন কৰা হৈছিল। অঞ্চলটোৰ সুস্থিৰতা আৰু সমৃদ্ধিৰ বাবে আমি সাগৰৰ দৃষ্টিভংগীৰে আগবাঢ়িছো৷ এতিয়া গ্ল’বেল ছাউথৰ বাবে আমাৰ দৃষ্টিভংগী হ’ব 'মহাসাগৰ', অৰ্থাৎ এই অঞ্চলৰ নিৰাপত্তা আৰু সমৃদ্ধিৰ বাবে পাৰস্পৰিক আৰু সামগ্ৰিক উন্নতি সাধন কৰা। ইয়াৰ ভিতৰত উন্নয়নৰ বাবে বাণিজ্য, বহনক্ষম বৃদ্ধিৰ বাবে সামৰ্থ্য বিকাশ, আৰু উমৈহতীয়া ভৱিষ্যতৰ বাবে পাৰস্পৰিক নিৰাপত্তাৰ অনুভৱ অন্তৰ্ভুক্ত কৰা হৈছে।"-প্ৰধানমন্ত্ৰী মোদীয়ে কয়।

Prime Minister Narendra Modi tweets, "Honoured to be conferred the Grand Commander of the Order of the Star and Key of the Indian Ocean, and that too on Mauritius’ National Day."

(Pic Source: Prime Minister Narendra Modi/X) pic.twitter.com/3Q5DIqWlx6
— ANI (@ANI) March 12, 2025

উল্লেখ্য যে, এই ভ্ৰমণৰ সময়ত ভাৰতৰ প্ৰধানমন্ত্ৰী মোদী আৰু মৰিচাছৰ প্ৰধানমন্ত্ৰী নবীনচন্দ্ৰ ৰামগুলামে দ্বিপাক্ষিক সম্পৰ্কক বৰ্ধিত কৌশলগত অংশীদাৰিত্বৰ মৰ্যাদালৈ উন্নীত কৰে। ইয়াৰ পূৰ্বে বুধবাৰে পুৱা ৰামগুলামে দেশৰ ৰাজধানী প’ৰ্ট লুইছত অনুষ্ঠিত এক অনুষ্ঠানত প্ৰধানমন্ত্ৰী মোদীক মৰিচাছৰ সৰ্বোচ্চ সন্মান গ্ৰেণ্ড কমাণ্ডাৰ অৱ অৰ্ডাৰ অৱ দ্য ষ্টাৰ এণ্ড কী অৱ দ্য ইণ্ডিয়ান অ’চেন (Grand Commander of the Order of the Star and Key of the Indian Ocean) প্ৰদান কৰে। এই সন্মান লাভ কৰা প্ৰধানমন্ত্ৰী মোদী প্ৰথমজন ভাৰতীয় আৰু পঞ্চমজন বিদেশী নাগৰিক। মোদীয়ে এই সন্মান ভাৰতৰ ১৪০ কোটি জনসাধাৰণ আৰু আমাৰ দেশ দুখনৰ মাজত শতিকা পুৰণি বন্ধুত্বৰ প্ৰতি উৎসৰ্গা কৰে।

মোদীয়ে আৰু কয়, ‘মৰিচাছৰ জনসাধাৰণ আৰু চৰকাৰে মোক তেওঁলোকৰ সৰ্বোচ্চ অসামৰিক সন্মান প্ৰদান কৰাৰ সিদ্ধান্ত লৈছে। এই সিদ্ধান্ত মই বিনম্ৰভাৱে অতি শ্ৰদ্ধাৰে গ্ৰহণ কৰো। এয়া কেৱল মোৰ বাবে সন্মান নহয়, ভাৰত আৰু মৰিচাছৰ মাজত থকা ঐতিহাসিক বন্ধনৰ বাবে ই এক সন্মান।”

Honoured to attend the National Day celebrations of Mauritius! Wishing the people of Mauritius continued prosperity and success as we also strengthen the deep-rooted ties between our countries. pic.twitter.com/9zsTfxF3O3
— Narendra Modi (@narendramodi) March 12, 2025

এই ভ্ৰমণৰ সময়ত ভাৰত আৰু মৰিচাছে নিৰাপত্তা সহযোগিতা, কূটনীতিবিদসকলক প্ৰশিক্ষণ দিয়া, ক্ষুদ্ৰ আৰু মজলীয়া ব্যৱসায়ীসকলক সহায় কৰা, বৈজ্ঞানিক সহযোগিতা, আৰু আৰ্থিক সাহায্য আদিৰ দৰে ক্ষেত্ৰসমূহত এলানি চুক্তি স্বাক্ষৰ কৰে। মোদী আৰু ৰামগুলামে মৰিচাছত অটল বিহাৰী বাজপেয়ী ইনষ্টিটিউট অৱ পাব্লিক চাৰ্ভিচ এণ্ড ইনোভেচনো (Atal Bihari Vajpayee Institute of Public Service and Innovation ) উদ্বোধন কৰে। এই প্ৰতিষ্ঠানে শিক্ষা, গৱেষণা আৰু জনসেৱাৰ কেন্দ্ৰ হিচাপে কাম কৰিব বুলি মোদীয়ে উল্লেখ কৰে।

ইয়াৰ পূৰ্বে মঙলবাৰে নিশা প্ৰধানমন্ত্ৰী মোদীয়ে মৰিচাছৰ প্ৰৱাসী ভাৰতীয়সকলক সম্বোধন কৰে। ভাষণত প্ৰধানমন্ত্ৰীয়ে মৰিচাছৰ প্ৰধানমন্ত্ৰীৰ আদৰ-সম্ভাষণ আৰু বন্ধুত্বৰ বাবে তথা দুয়োখন দেশৰ মাজত সজীৱ আৰু বিশেষ সম্পৰ্ক সুদৃঢ় কৰাৰ ক্ষেত্ৰত আগবঢ়োৱা অৱদানৰ বাবে ধন্যবাদ জ্ঞাপন কৰে। তেওঁ প্ৰধানমন্ত্ৰী ৰামগুলাম আৰু তেওঁৰ পত্নী বীনা ৰামগুলামক অ’চিআই কাৰ্ডো প্ৰদান কৰে। মৰিচাছৰ জনসাধাৰণক তেওঁলোকৰ ৰাষ্ট্ৰীয় দিৱস উপলক্ষে শুভেচ্ছা জ্ঞাপন কৰি প্ৰধানমন্ত্ৰীয়ে দুয়োখন দেশৰ উমৈহতীয়া ঐতিহাসিক যাত্ৰাক স্মৰণ কৰে।