ভেটিকান চহৰ
নম্ৰ, ভদ্ৰ, বিনয়ী আৰু উদাৰ স্বভাৱেৰে সমগ্ৰ বিশ্বক মোহিত কৰা লেটিন আমেৰিকাৰ প্ৰথমজন প'ণ্টিফ (ৰোমান কেথলিক গীৰ্জাৰ মুৰব্বী) পোপ ফ্ৰান্সিছৰ সোমবাৰে দেহাৱসান ঘটে। মৃত্যুৰ সময়ত তেওঁৰ বয়স আছিল ৮৮ বছৰ। পোপ হিচাপে ১২ বছৰীয়া কাৰ্যকালত বিভিন্ন ৰোগত আক্ৰান্ত হৈ থকা পোপ ফ্ৰান্সিছে শেহতীয়াকৈ ডাবল নিউমোনিয়াৰ গুৰুতৰ ৰোগৰ পৰা ৰক্ষা পৰিছিল।
সংবাদ মাধ্যমৰ সন্মুখত ভেটিকানৰ প্ৰশাসক কাৰ্ডিনেল কেভিন ফাৰেলে (Cardinal Kevin Farrell) ঘোষণা কৰে, "প্ৰিয় ভাই-ভনীসকল, গভীৰ দুখেৰে মই আমাৰ পবিত্ৰ ফাদাৰ ফ্ৰান্সিছৰ মৃত্যুৰ কথা ঘোষণা কৰিবলৈ ওলাইছো। আজি পুৱা ৭.৩৫ বজাত (5:35 GMT) ৰোমৰ বিচপ ফ্ৰান্সিছ পৰম পিতাৰ ঘৰলৈ উভতি যায়। তেওঁৰ সমগ্ৰ জীৱন ঈশ্বৰ সাধনা আৰু গীৰ্জাৰ সেৱাৰ বাবে উৎসৰ্গিত আছিল।"
ইষ্টাৰ দেওবাৰে ভেটিকানত চেণ্ট পিটাৰ বেচিলিকাৰ বেলকনিত উপস্থিত হৈ উপাসকসকলৰ সৈতে আনন্দ মনেৰে প্ৰাৰ্থনা কৰাৰ মাত্ৰ এদিন পিছতে ইষ্টাৰ সোমবাৰে পোপ ফ্ৰান্সিছৰ মৃত্যু হয়। ২০১৩ চনত তেওঁৰ পূৰ্বসূৰী Benedict XVI-এ পদত্যাগ কৰাৰ পিছত পোপৰ দায়িত্ব গ্ৰহণ কৰিছিল পন্টিফ ফ্ৰান্সিছে।
স্বাস্থ্যৰ অৱনতি ঘটিলেও দেওবাৰে ইষ্টাৰ অনুষ্ঠানত হুইল চেয়াৰত বহি হ'লেও উপস্থিত আছিল পোপ ফ্ৰান্সিছ। জীৱনৰ শেষ বাৰ্তাত তেওঁ বিশ্বত বৃহৎ পৰিসৰৰ সংঘাতৰ সাক্ষী হৈ থকাৰ প্ৰতি লক্ষ্য ৰাখি স্বাধীনতা আৰু শান্তিৰ প্ৰয়োজনীয়তাৰ ওপৰত গুৰুত্ব আৰোপ কৰে। তেওঁ ধৰ্ম আৰু মত প্ৰকাশৰ স্বাধীনতাৰ ওপৰত গুৰুত্ব আৰোপ কৰি বিশ্ব শান্তিৰ বাবে এইবোৰ অপৰিহাৰ্য বুলিও উল্লেখ কৰে।
উল্লেখ্য যে, যোৱা ১৪ ফেব্ৰুৱাৰীত ব্ৰংকাইটিছৰ চিকিৎসাৰ বাবে পোপক চিকিৎসালয়ত ভৰ্তি কৰা হৈছিল। ইয়াৰ পিছৰ দিনকেইটাত পোপৰ শৰীৰত নিউমোনিয়া ধৰা পৰে আৰু তেওঁৰ অৱস্থা সংকটজনক হৈ পৰে। তেওঁৰ বৃক্ক বিকল হোৱাৰো প্ৰাথমিক আৰু মৃদু লক্ষণ দেখা গৈছিল।
কিন্তু পাঁচ সপ্তাহৰ ভিতৰতে তেওঁৰ স্বাস্থ্যৰ উন্নতি ঘটিছিল আৰু ২৩ মাৰ্চত তেওঁ এমাহৰো অধিক সময়ৰ ভিতৰত প্ৰথমবাৰৰ বাবে চিকিৎসালয়খনৰ বেলকনিত ৰাজহুৱাভাৱে উপস্থিত হৈছিল আৰু বাহিৰত গোট খোৱা ভিৰক হাত জোকাৰি অভিবাদন জনাইছিল। পিছত তেওঁ ভেটিকানলৈ উভতি আহি দুমাহৰ নিৰ্ধাৰিত বিশ্ৰাম আৰম্ভ কৰে। ১৯ এপ্ৰিলত পোপে আমেৰিকাৰ উপ-ৰাষ্ট্ৰপতি জে ডি ভেন্সক সাক্ষাৎ কৰে। ইয়াৰ এদিন পিছত ইষ্টাৰ দেওবাৰৰ সেৱা (Easter Sunday Service)ত তেওঁ জনসমাগমক সম্ভাষণ জনায়।
উল্লেখ্য যে, ভেটিকানৰ বাহিৰত শেষকৃত্য সম্পন্ন কৰা ১০০ বছৰতকৈও অধিক সময়ৰ ভিতৰত পোপ ফ্ৰান্সিছ হ’ব প্ৰথমজন পোপ। তেওঁৰ ইচ্ছা আছিল যে তেওঁক ছেইণ্ট পিটাৰ বেচিলিকাত নহয়, ৰোমৰ চান্টা মাৰিয়া মেজিঅ’ৰ বেচিলিকাত সমাধিস্থ কৰা হওক। তেওঁ পোপসকলৰ তিনিটা কফিন থকাৰ পৰম্পৰাকো নাকচ কৰিছিল, তাৰ পৰিৱৰ্তে কাঠ আৰু জিংকৰ দ্বাৰা নিৰ্মিত মাত্ৰ এটা কফিনত সমাধিস্থ কৰিবলৈ বাছি লৈছিল। এজন নম্ৰ আৰু বিনয়ী ধৰ্মগুৰু হিচাপে তেওঁৰ ভূমিকা প্ৰতিফলিত হোৱাৰ বাবে তেওঁ এই উদাৰতা প্ৰদৰ্শন কৰিছিল।
আৰ্জেণ্টিনাৰ জৰ্জ মাৰিঅ’ বাৰ্গোলিঅ’ত জন্মগ্ৰহণ কৰা ফ্ৰান্সিছ আছিল বিশ্বৰ প্ৰায় ১.৪ বিলিয়ন কেথলিকক নেতৃত্ব দিয়া প্ৰথমজন জেচুইট আৰু আমেৰিকাৰ পৰা অহা প্ৰথমজন পোপ। ২০১৩ চনৰ ১৩ মাৰ্চত ৭৬ বছৰ বয়সত পোপ হিচাপে নিৰ্বাচিত হোৱা ফ্ৰান্সিছৰ নিযুক্তিয়ে বিশ্বৰ বহু গীৰ্জাৰ মূৰব্বীক আচৰিত কৰি তুলিছিল। তেওঁলোকে আৰ্জেণ্টিনাৰ ধৰ্মগুৰুজনক বাহিৰৰ মানুহ হিচাপে গণ্য কৰিছিল।
ফ্ৰান্সিছে উত্তৰাধিকাৰী সূত্ৰে লাভ কৰিছিল এনে এখন গীৰ্জা যিখন শিশু যৌন নিৰ্যাতনৰ কেলেংকাৰীক লৈ বিশ্বজুৰি সন্দেহৰ আৱৰ্তত আছিল। বছৰ বছৰ ধৰি তেওঁ অধিক মুকলি আৰু দয়ালু গীৰ্জা গঢ়ি তুলিবলৈ চেষ্টা কৰিছিল।
১২ বছৰৰ ভিতৰত তেওঁ ভেটিকানৰ আমোলাতন্ত্ৰক পুনৰ সংগঠিত কৰিছিল, চাৰিটা ডাঙৰ শিক্ষকতা নথি (teaching documents) লিখিছিল, ৬৫খনতকৈও অধিক দেশলৈ ৪৭টা বিদেশ ভ্ৰমণ কৰিছিল আৰু ৯০০ৰো অধিক সন্তৰ সৃষ্টি কৰিছিল। ইয়াৰ উপৰিও তেওঁ বিশ্বৰ কেথলিক বিচপৰ পাঁচটা বৃহৎ ভেটিকান সন্মিলন অনুষ্ঠিত কৰি মহিলাক নিযুক্তি দিয়া আৰু গীৰ্জাৰ যৌন শিক্ষা সলনি কৰাৰ দৰে গুৰুত্বপূৰ্ণ বিষয়সমূহৰ ওপৰত আলোচনা কৰিছিল।
পোপ ফ্ৰান্সিছৰ মৃত্যুত আন্তৰিক শোক প্ৰকাশ কৰি প্ৰধানমন্ত্ৰী নৰেন্দ্ৰ মোদীয়ে এক্সত লিখিছে, "এই মুহূৰ্তত মই পোপ ফ্ৰান্সিছৰ সৈতে হোৱা মোৰ সাক্ষাৎকাৰৰ কথা মৰমেৰে মনত পেলাইছো। সৰ্বাংগীন উন্নয়নৰ প্ৰতি তেওঁৰ দায়বদ্ধতাৰ পৰা বহুখিনি অনুপ্ৰাণিত হৈছিলো। ভাৰতৰ জনসাধাৰণৰ প্ৰতি তেওঁৰ মৰম সদায় স্মৰণ কৰা হ'ব। তেওঁৰ আত্মাই ঈশ্বৰৰ আলিংগনত চিৰশান্তি লাভ কৰক।"
