কিয়েভ
ৰাছিয়া-ইউক্ৰেইনৰ মাজত শান্তি চুক্তি তথা যুদ্ধবিৰতিৰ বিষয়ে আলোচনা চলি থকাৰ সময়তে পুনৰ ইউক্ৰেইনত ড্ৰোণ আক্ৰমণ সংঘটিত কৰিছে ৰাছিয়াই। দেওবাৰে নিশা সমগ্ৰ ইউক্ৰেইনত চলোৱা এই ড্ৰোণ আক্ৰমণত কমেও ৭ জন লোকৰ মৃত্যু হয়। স্থানীয় ইউক্ৰেইনৰ বিষয়া আৰু জৰুৰীকালীন সেৱাই এই কথা জনাইছে।
উল্লেখ্য যে, ছৌডি আৰবত যুদ্ধবিৰতি আলোচনাৰ পূৰ্বে ৰাজধানী কিয়েভকে ধৰি বিভিন্ন অঞ্চলত এই আক্ৰমণ সংঘটিত হয়। ইউক্ৰেইন আৰু ৰাছিয়াই সোমবাৰে শক্তি প্ৰকল্প আৰু অসামৰিক আন্তঃগাঁথনিক লক্ষ্য কৰি দীৰ্ঘ দূৰত্বৰ আক্ৰমণ স্থগিত ৰখাৰ বিষয়ে আলোচনা কৰিবলৈ আমেৰিকাৰ মধ্যস্থতাত আলোচনা কৰিব বুলি আশা কৰা হৈছে।
আনহাতে, ইউক্ৰেইনৰ ৰাষ্ট্ৰপতি ভলোডিমিৰ জেলেনস্কিয়ে কয় যে, ইউক্ৰেইনৰ প্ৰতিনিধি দলটোৱে পৰোক্ষ আলোচনাৰ এদিন পূৰ্বে ছৌডি আৰবত আমেৰিকাৰ বিষয়াসকলক সাক্ষাৎ কৰিব বুলি আশা কৰা হৈছে। ইয়াৰোপৰি আংশিক যুদ্ধবিৰতি বিতংভাৱে আলোচনা কৰিবলৈ ইউক্ৰেনে কাৰিকৰী দল প্ৰেৰণৰ পৰিকল্পনা কৰিছে।
ট্ৰাম্পৰ বিশেষ দূত ষ্টিভ ৱিটকফে কয় যে, তেওঁ ছৌডি আৰবত অনুষ্ঠিত হ'ব লগা আলোচনাত কিছু পৰিমাণে বাস্তৱ প্ৰগতি আশা কৰিছে। তেওঁ কয়, "এই আলোচনাই বিশেষকৈ দুয়োখন দেশৰ মাজত জাহাজ চলাচলৰ ক্ষেত্ৰত কৃষ্ণ সাগৰৰ যুদ্ধবিৰতিক গুৰুত্ব দিব, সেয়ে তাৰ প্ৰভাৱে স্বাভাৱিকতে সম্পূৰ্ণ যুদ্ধবিৰতিলৈ আগবঢ়াই নিয়াৰ সম্ভাৱনা আছে।"
ইফালে পুটিনে শান্তি বিচাৰে বুলি তেওঁ নিশ্চিত নেকি বুলি কৰা প্ৰশ্নৰ উত্তৰত ৱিটকফে কয়, "মই অনুভৱ কৰোঁ যে তেওঁ শান্তি বিচাৰে।"
উল্লেখ্য যে, ইউক্ৰেইনৰ বায়ুসেনাই জনোৱা অনুসৰি, ৰাছিয়াই নিশাটোৰ ভিতৰতে সমগ্ৰ ইউক্ৰেইনত ১৪৭ টা ড্ৰোণ নিক্ষেপ কৰিছে। ইউক্ৰেইনৰ বায়ু প্ৰতিৰক্ষাই ইয়াৰে ভিতৰত ৯৭ টা ভূপতিত কৰে আৰু ইউক্ৰেইনৰ প্ৰতিৰোধী পদক্ষেপৰ বাবে আন ২৫ টা লক্ষ্যত উপনীত হ'ব পৰা নাছিল। এই আক্ৰমণ খাৰকিভ, চুমি, চেৰনিহিভ, ওডেচা আৰু ডনেটস্ক অঞ্চলৰ লগতে ৰাজধানী কিয়েভতো কৰা হয়।
চহৰখনৰ সামৰিক প্ৰশাসনে জনোৱা মতে, কিয়েভৰ ওপৰত সংঘটিত ড্ৰোণ আক্ৰমণত এটা ৫ বছৰীয়া শিশুসহ তিনিজন লোক নিহত হয় আৰু ১০ জন আহত হয়। ইউক্ৰেইনৰ ৰাজধানীত বিস্ফোৰণৰ তীব্ৰ শব্দ শুনা গৈছিল। কিয়নো পাঁচ ঘণ্টাতকৈও অধিক সময় ধৰি বিমান আক্ৰমণ চলি আছিল। ৰাছিয়াৰ ড্ৰোণ আৰু বায়ু প্ৰতিৰক্ষাৰ পৰা হাত সাৰিবলৈ কম উচ্চতাত উৰি থকা ভূপতিত কৰা ড্ৰোণৰ ধ্বংসাৱশেষবোৰ সাধাৰণ জনতাৰ অট্টালিকাবোৰৰ ওপৰত পৰে।
