ৱাশ্বিংটন
আমেৰিকাৰ ৰাষ্ট্ৰপতি ড'নাল্ড ট্ৰাম্পে আজিৰ দিনটোক 'মুক্তি দিৱস' হিচাপে ঘোষণা কৰিছে। তেওঁ নতুনকৈ ঘোষণা কৰা আমেৰিকাৰ নতুন শুল্ক নীতি আজিৰে পৰা কাৰ্যকৰী কৰিব। সেয়ে আজিৰ দিনটোক তেওঁ আমেৰিকাৰ ইতিহাসৰ মুক্তি দিৱস হিচাপে ঘোষণা কৰিছে।
ট্ৰাম্পৰ এই নতুন শুল্ক নীতি হৈছে শুল্ক বা টেক্সৰ বিপৰীতে টেক্স। আমেৰিকাৰ সামগ্ৰীৰ ওপৰত যি দেশে যিমান টেক্স আৰোপ কৰিব আমেৰিকায়ো সেই দেশৰ সামগ্ৰীৰ ওপৰত সম পৰিমাণৰ টেক্স আৰোপ কৰিব। এয়াই ট্ৰাম্পৰ নতুন নীতি।
আজি ট্ৰাম্পে ভাৰতীয় সময় অনুসৰি মাজনিশা আৰু স্থানীয় সময় অনুসৰি বিয়লি ৪ বজাত আনুষ্ঠানিকভাৱে কোন দেশৰ ওপৰত কিমান কৰ আৰোপ কৰিব সেয়া আনুষ্ঠানিকভাৱে ঘোষণা কৰিব। সমগ্ৰ বিশ্বই ট্ৰাম্পৰ এই পাৰস্পৰিক শুল্ক নীতিৰ ওপৰত দৃষ্টি নিবদ্ধ কৰি ৰাখিছে।
ভাৰতেও আমেৰিকাৰ এই নতুন নীতি তথা ট্ৰাম্পৰ ঘোষণাৰ ওপৰত চকু ৰাখিব। সমগ্ৰ পৰিস্থিতি পৰ্যবেক্ষণ কৰি নতুন দিল্লীয়ে বিকল্প চিন্তা কৰিব বুলিও জানিব পৰা গৈছে। সমগ্ৰ বিষয়টো সন্দৰ্ভত মঙলবাৰে হোৱাইট হাউছৰ ফালৰ পৰা কয় যে, ট্ৰাম্পৰ ঘোষণাৰ লগে লগে পাৰস্পৰিক শুল্ক নীতি কাৰ্যকৰী হ’ব।
ট্ৰাম্পৰ প্ৰেছ সচিব কেৰলিন লেভিটে কয় যে, আমেৰিকাৰ জনসাধাৰণৰ বাবে এক বৃহৎ শুল্ক নীতি নিশ্চিত কৰিবলৈ ট্ৰাম্পে গোটেই দিনটো অৰ্থনৈতিক উপদেষ্টাসকলৰ সৈতে বৈঠকত বহে। পাৰস্পৰিক শুল্ক নীতিয়ে আমেৰিকাৰ অৰ্থনীতিৰ ওপৰত কি প্ৰভাৱ পেলাব পাৰে সেই বিষয়েও বৈঠকত আলোচনা কৰা বুলি জানিব পৰা গৈছে।
হোৱাইট হাউছে এইটোও উল্লেখ কৰিছে যে, যদি কোনো দেশৰ কোনো ৰাষ্ট্ৰপ্ৰধানে সেই দেশত উৎপাদিত সামগ্ৰীৰ ওপৰত শুল্ক হ্ৰাস কৰাৰ বাবে অনুৰোধ জনাই ট্ৰাম্পৰ সৈতে যোগাযোগ কৰে তেন্তে আমেৰিকাৰ ৰাষ্ট্ৰপতিয়ে নিশ্চিতভাৱে ইয়াৰো উত্তৰ দিব।
সোমবাৰে আমেৰিকাই পৰিসংখ্যাৰ উদ্ধৃতি দি কয় যে, ইউৰোপীয় সংঘই আমেৰিকাৰ দুগ্ধজাত সামগ্ৰীৰ ওপৰত ৫০ শতাংশ শুল্ক, জাপানে আমেৰিকাৰ চাউলৰ ওপৰত ৭০০ শতাংশ শুল্ক আৰোপ কৰি আহিছে। ভাৰতে আমেৰিকাৰ কৃষিজাত সামগ্ৰীৰ ওপৰত ১০০ শতাংশ শুল্ক আৰু কানাডাই আমেৰিকাৰ দুগ্ধজাত সামগ্ৰীৰ ওপৰত প্ৰায় ৩০০ শতাংশ শুল্ক আৰোপ কৰি আহিছে।
বহুতে অনুমান কৰিছে নতুন শুল্ক নীতি কাৰ্যকৰী হোৱাৰ লগে লগে এইসমূহ দেশৰ পৰা আমেৰিকালৈ ৰপ্তানি কৰা সামগ্ৰীৰ ওপৰত আমেৰিকাই সম পৰিমাণৰ শুল্ক আৰোপ কৰিব পাৰে।
কিন্তু সোমবাৰে ট্ৰাম্পে কয় যে, ভাৰতে আমেৰিকাৰ সামগ্ৰীৰ ওপৰত শুল্ক হ্ৰাস কৰিবলৈ ওলাইছে বুলি শুনিছে। অৱশ্যে এই সন্দৰ্ভত নতুন দিল্লীয়ে আনুষ্ঠানিকভাৱে একো ঘোষণা কৰা নাই। এই ক্ষেত্ৰত ভাৰতে ‘স্লো মোচন’ নীতিৰে আগবাঢ়ি যাব বিচাৰিছে।
