মস্কো
পশ্চিম আৰু ইউক্ৰেইনলৈ প্ৰেৰণ কৰা স্পষ্ট বাৰ্তাত মঙলবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনে মস্কোৱে পাৰমাণৱিক শক্তি-সমৰ্থিত অপাৰমাণৱিক ৰাষ্ট্ৰৰ ওপৰত পাৰমাণৱিক অস্ত্ৰ ব্যৱহাৰ কৰাৰ পৰিসৰ বহল কৰাৰ এক নীতিত স্বাক্ষৰ কৰে।
ৰাছিয়াই ইউক্ৰেইন আক্ৰমণ কৰাৰ ১০০০তম দিনত এই সিদ্ধান্ত লোৱা হৈছে, য’ত জো বাইডেনে ইউক্ৰেইনক নিজৰ দীৰ্ঘ দূৰত্বৰ ক্ষেপণাস্ত্ৰ ব্যৱহাৰ কৰি ৰাছিয়াৰ ভূখণ্ডৰ গভীৰভাগলৈ আক্ৰমণ কৰাৰ অনুমতি দিছিল।
বাইডেন প্ৰশাসনে এক উল্লেখযোগ্য নীতি পৰিৱৰ্তন কৰি ইউক্ৰেইনক প্ৰথমবাৰৰ বাবে ৰাছিয়াৰ ভিতৰৰ লক্ষ্যত আক্ৰমণ কৰিবলৈ আমেৰিকাত নিৰ্মিত এ টি এ চি এম এছ (ATACMS) ক্ষেপণাস্ত্ৰ ব্যৱহাৰ কৰিবলৈ অনুমতি দিছে।
এই সিদ্ধান্ত ৰাষ্ট্ৰপতি জো বাইডেনে ইউক্ৰেইনলৈ আমেৰিকাৰ সামৰিক সাহায্যক লৈ সন্দেহ প্ৰকাশ কৰা ড’নাল্ড ট্ৰাম্পক ক্ষমতা অৰ্পণ কৰাৰ মাত্ৰ দুমাহ পূৰ্বেই লৈছে।
ক্ৰেমলিনে মঙলবাৰে ইউক্ৰেইনক পৰাস্ত কৰাৰ প্ৰতিশ্ৰুতি দি কয় যে, "কীভৰ প্ৰতি পশ্চিমীয়া সমৰ্থনে সংঘাতত কোনো প্ৰভাৱ পেলাব নোৱাৰে আৰু পশ্চিমীয়া সাহায্যই আমাৰ অভিযানৰ ফলাফলত প্ৰভাৱ পেলাব নোৱাৰে। ই অব্যাহত আছে, আৰু সম্পূৰ্ণ হ'ব।"
ক্ৰেমলিনৰ মুখপাত্ৰ দিমিত্ৰী পেস্কোভে কয় যে, "কীভৰ বিৰুদ্ধে সামৰিক অভিযান অব্যাহত আছে।"
ইউক্ৰেইন আৰু ইয়াৰ পশ্চিমীয়া সমৰ্থকসকলক উল্লেখ কৰি তেওঁ লগতে কয় যে পাৰমাণৱিক ৰাষ্ট্ৰৰ অংশগ্ৰহণেৰে অপাৰমাণৱিক ৰাষ্ট্ৰৰ আগ্ৰাসনক যৌথ আক্ৰমণ হিচাপে গণ্য কৰা হ'ব।
পেস্কোভে লগতে কয় যে, ৰাছিয়াই “সদায় পাৰমাণৱিক অস্ত্ৰক প্ৰতিৰোধৰ মাধ্যম হিচাপে গণ্য কৰি আহিছে”, আৰু ৰাছিয়াই “বাধ্য” অনুভৱ কৰিলেহে ইয়াক ব্যৱহাৰ কৰিন।
ইউক্ৰেইনত পুটিনে ‘অগ্ৰগতি লাভ’ কৰিব নালাগে বুলি কৈছিল নাটোৰ মুৰব্বীয়ে। অৱশ্যে মাত্ৰ এমাহ আগতে তেওঁ কৈছিল যে দেশখন “অসাৱধান আৰু দায়িত্বহীন” হোৱাৰ স্বত্বেও ৰাছিয়াৰ পৰা পাৰমাণৱিক অস্ত্ৰৰ বিপদৰ পূৰ্বানুমান তেওঁ দেখা নাই।
ৰাছিয়াৰ ঘনিষ্ঠ মিত্ৰ দেশ বেলাৰুছলৈও এই পাৰমাণৱিক মতবাদৰ প্ৰযোজ্য হ’ব।
ইউক্ৰেইনত ৰাছিয়াই লেহেমীয়াকৈ চলাই থকা আক্ৰমণ অব্যাহত ৰখাৰ সময়তে পশ্চিমক পিছুৱাই যাবলৈ বাধ্য কৰা পুটিনৰ বুদ্ধি ইয়াৰ দ্বাৰা প্ৰতিফলন ঘটিছে।
ব্লুমবাৰ্গৰ এক প্ৰতিবেদন অনুসৰি ইউক্ৰেইনৰ সশস্ত্ৰ বাহিনীয়ে ৰাছিয়াৰ ভূখণ্ডৰ ভিতৰৰ সীমান্ত অঞ্চলত ATACMS ক্ষেপণাস্ত্ৰৰে প্ৰথমবাৰৰ বাবে আক্ৰমণ চলাইছিল বুলি আৰ বি চি ইউক্ৰেইনে দেশখনৰ সেনাবাহিনীৰ এজন বিষয়াৰ উদ্ধৃতি দি প্ৰকাশ কৰিছে।
ইউক্ৰেইনৰ সংবাদ মাধ্যমৰ বাতৰি অনুসৰি, ইউক্ৰেইনৰ সীমান্তৰ পৰা প্ৰায় ১৩০ কিলোমিটাৰ দূৰত্বত অৱস্থিত ব্ৰায়ানস্ক অঞ্চলৰ কাৰাচেভ চহৰৰ ওচৰৰ ৰাছিয়াৰ সামৰিক কেন্দ্ৰক লক্ষ্য কৰি আক্ৰমণ কৰা হৈছিল।
ৰাষ্ট্ৰখনৰ সেনাবাহিনীৰ এজন বিষয়াৰ উদ্ধৃতি দি আৰ বি চি ইউক্ৰেইনে প্ৰকাশ কৰা অনুসৰি, "সঁচাকৈয়ে প্ৰথমবাৰৰ বাবে আমি ৰাছিয়াৰ ভূখণ্ডত আক্ৰমণ কৰিবলৈ ATACMS ব্যৱহাৰ কৰিছিলো। ব্ৰায়ানস্ক অঞ্চলৰ এটা ব্যৱস্থাৰ বিৰুদ্ধে এই আক্ৰমণ চলোৱা হৈছিল, আৰু ইয়াক সফলতাৰে সম্পূৰ্ণ কৰা হৈছিল।"
১৯ নৱেম্বৰৰ নিশা ৰাছিয়াৰ প্ৰতিৰক্ষা মন্ত্ৰালয়ৰ মূল মিছাইল আৰু আৰ্টিলাৰী সঞ্চালকালয়ৰ ৬৭ নং আৰ্চিনেলত এই আক্ৰমণ সংঘটিত হোৱা বুলি জানিব পৰা গৈছে।
ইউক্ৰেইনৰ জেনেৰেল ষ্টাফেও কাৰাচেভৰ ওচৰৰ এটা ব্যৱস্থাত আক্ৰমণৰ কথা নিশ্চিত কৰে যদিও কি ক্ষেপণাস্ত্ৰ ব্যৱহাৰ কৰা হৈছিল সেই সম্পৰ্কে কোনো মন্তব্য কৰা নাছিল আৰু এই তথ্য গোপনীয় বুলি কয়।
মঙলবাৰে ৰাছিয়াই নিশ্চিত কৰে যে ইউক্ৰেইনে ইয়াৰ ভূখণ্ডৰ বিৰুদ্ধে দীৰ্ঘ দূৰত্বৰ ATCACMS ক্ষেপণাস্ত্ৰ ব্যৱহাৰ কৰিছে আৰু মস্কোৰ বিৰুদ্ধে ই “পশ্চিমীয়া যুদ্ধৰ নতুন পৰ্যায়” বুলি কয় আৰু “সেই অনুসৰি” প্ৰতিক্ৰিয়াৰ প্ৰতিশ্ৰুতি দিছে।
ব্ৰাজিলত জি-২০ৰ সংবাদমেলত ৰাছিয়াৰ বৈদেশিক মন্ত্ৰী চাৰ্গেই লাভ্ৰভে এই সংঘাতৰ বিষয়ে কয় যে, "এইটো নিঃসন্দেহে তেওঁলোকে তীব্ৰতৰ হুৱাটো বিচৰাৰ সংকেত।"
ৱাশ্বিংটনে কীভক ক্ষেপণাস্ত্ৰ চলোৱাত সহায় কৰাৰ অভিযোগ উত্থাপন কৰি তেওঁ লগতে কয় যে, "আমি এইটোক ৰাছিয়াৰ বিৰুদ্ধে পশ্চিমীয়া যুদ্ধৰ গুণগতভাৱে নতুন পৰ্যায় হিচাপে ল’ম। আৰু আমি সেই অনুসৰি প্ৰতিক্ৰিয়া প্ৰকাশ কৰিম।"
একবিংশ শতিকাৰ আটাইতকৈ মাৰাত্মক যুদ্ধৰ ভয়াৱহ বাস্তৱতাৰ মাজত ইউক্ৰেইনৰ চহৰ, নগৰ আৰু গাঁওবোৰ ধ্বংস হৈ পৰিছে আৰু এতিয়া ধ্বংসস্তূপত হৈ পৰি আছে। যুদ্ধবিধ্বস্ত দেশখনৰ অন্তহীন হৃদয়বিদাৰক কাহিনীৰ শৃংখলাত মানৱ জীৱন আৰু বস্তুগত সম্পদৰ ক্ষতি বাঢ়ি গৈ থাকে।
ৰাছিয়া আৰু ইউক্ৰেইন দুয়োখন দেশৰ জনসংখ্যা হ্ৰাস পাইছে আৰু যুদ্ধৰ আগৰ পৰাই সংগ্ৰাম কৰি আহিছে। যুদ্ধৰ বাবে হোৱা মৃত্যুৰ সংখ্যাই দুয়োখন দেশৰ বাবে সুদূৰপ্ৰসাৰী জনগাঁথনিগত প্ৰভাৱ পেলাব।
