আৱাজ দ্য ভইচ/ নতুন দিল্লী
এটা সাধাৰণ মুছলমান পৰিয়ালৰ কন্যা তৈবা আফৰোজে কমাৰ্চিয়েল পাইলট হৈ ইতিহাসৰ সৃষ্টি কৰিছে। তেওঁৰ পিতৃ মতিউল হকে বিহাৰৰ ছাৰণ জিলাৰ মাধৌৰা অঞ্চলত এতিয়াও ৰেচনৰ দোকান চলাই আছে আৰু মাতৃ চেমচন নিছা এগৰাকী গৃহিণী। এনে প্ৰত্যাহ্বানৰ মাজতো তৈবাই কমাৰ্চিয়েল পাইলট হোৱাৰ সপোন পূৰণৰ বাবে দৃঢ়প্ৰতিজ্ঞ হৈ আছিল।
তৈবাই নিজৰ গাঁৱৰ এখন স্কুলত প্ৰাথমিক শিক্ষা গ্ৰহণ কৰিছিল। সৰুৰে পৰাই তেওঁৰ আকাশত উৰিবলৈ হেঁপাহ আছিল। যেতিয়া তেওঁ দেউতাকৰ আগত পাইলট হোৱাৰ ইচ্ছা প্ৰকাশ কৰিছিল, তেতিয়া এটা সাধাৰণ পৰিয়ালৰ বাবে সেয়া আছিল এক ডাঙৰ প্ৰত্যাহ্বান। কিন্তু তৈবাৰ নিষ্ঠা আৰু পঢ়া-শুনাত উৎকৃষ্ট প্ৰদৰ্শন দেখি পৰিয়াল আৰু আত্মীয়ই তেওঁক সম্পূৰ্ণৰূপে সমৰ্থন কৰিছিল।
পাইলটৰ ইউনিফৰ্মত তৈবা আফৰোজ
তেওঁৰ দেউতাকে এখন সৰু গেলামালৰ দোকান চলাইছিল। জীয়েকৰ সপোন পূৰণ কৰিবলৈ তেওঁ নিজৰ মাটি বিক্ৰী কৰি প্ৰয়োজনীয় ধন সংগ্ৰহ কৰিছিল। দেউতাকৰ ত্যাগ আৰু সমৰ্পণে তৈবাৰ ছাৰণ জিলাৰ প্ৰথমগৰাকী মহিলা বাণিজ্যিক পাইলট হোৱাৰ গৌৰৱ প্ৰদান কৰিছিল। বৰ্তমান তেওঁৰ অসামৰিক বিমান পৰিবহণ সঞ্চালকালয় (DGCA) অনুজ্ঞাপত্ৰ আছে, যিটো ভাৰত চৰকাৰৰ বিমান পৰিবহণ বিভাগে প্ৰদান কৰিছে।
২০১৯ চনত ভুৱনেশ্বৰৰ চৰকাৰী বিমান প্ৰশিক্ষণ প্ৰতিষ্ঠানত যোগদান কৰাৰ সময়ৰ পৰা তেওঁৰ সপোনৰ যাত্ৰা আৰম্ভ হৈছিল। তাত তেওঁ ধুমুহা, বৰষুণৰ সৈতে যুঁজি ২০০ ঘণ্টাৰ কঠিন উৰণ সম্পূৰ্ণ কৰিবলৈ সক্ষম হয়। “১০০ ঘণ্টা এককভাৱে উৰাজাহাজ চলোৱাটো মোৰ বাবে ভয়ংকৰ অভিজ্ঞতা আছিল, কিন্তু ভয় মোৰ মনত কেতিয়াও প্ৰৱেশ কৰা নাছিল,” তেওঁ এইদৰে স্মৰণ কৰে।
তৈবা আফৰোজে পিছলৈ ২০২৩ চনত ইন্দোৰ ফ্লাইং ক্লাবত ১২০ ঘণ্টাৰ প্ৰশিক্ষণ সম্পূৰ্ণ কৰে। এই সকলোবোৰৰ পিছত অৱশেষত তেওঁ ডিডিচিএৰ পৰা লাইচেন্স লাভ কৰে আৰু বাণিজ্যিক পাইলট হোৱাৰ প্ৰমাণপত্ৰ লাভ কৰে। এতিয়া তেওঁ যিকোনো বাণিজ্যিক বিমান উৰুৱাব পাৰিব।
তৈবা আফৰোজ তেওঁৰ পিতৃ- মাতৃৰ সৈতে
পাইলটৰ ইউনিফৰ্ম পিন্ধা মুছলমান মহিলা হিচাপে তৈবাক প্ৰশ্ন কৰা হৈছিল- "বৰ্খা পিন্ধিব নালাগেনে?" তেতিয়া তেওঁ এইদৰে উত্তৰ দিয়ে, “ককপিটত কোনো ড্ৰেছ কোড নাই। বিমানখনে আপোনাৰ উপাধিৰ প্ৰতি কোনো গুৰুত্ব নিদিয়ে।”
উল্লেখ্য যে, এগৰাকী পাইলটৰ দৰমহা ১.৫ লাখ টকাৰ পৰা আৰম্ভ হয়। কিন্তু তৈবাই এই ধনৰাশিৰ বাবে পাইলট হ'ব বিচৰা নাছিল। তেওঁ প্ৰকৃত কৃতিত্ব হ’ল বিহাৰৰ পিছপৰা অঞ্চলৰ এটা অৰ্থনৈতিকভাৱে পিছপৰা মুছলমান পৰিয়ালৰ ছোৱালী হোৱাৰ পিছতো বিভিন্ন প্ৰত্যাহ্বান নেওচি তেওঁ সফলতাৰ শিখৰ স্পৰ্শ কৰিবলৈ সক্ষম হৈছে। তেওঁৰ বাৰ্তা হ’ল; “এই মুছলমান ছোৱালীজনীলৈ চাওক, তাই বিমান উৰুৱাব পাৰে।”
তৈবা আফৰোজ কেৱল এজন পাইলটে নহয়; সপোন সৰু কৰিবলৈ কোৱা প্ৰতিগৰাকী মুছলমান ছোৱালীৰ বাবেও তেওঁ এক আদৰ্শ। তেওঁৰ সফলতাৰ কাহিনী গৌৰৱৰ বিষয়, কাৰণ তেওঁ বহু মুছলমান ছোৱালীক নিজৰ কেৰিয়াৰৰ পথ অনুসৰণ কৰিবলৈ অনুপ্ৰাণিত কৰে। অধ্যৱসায় আৰু দৃঢ়তাৰে যিকোনো লক্ষ্যত উপনীত হ’ব পৰা যায় বুলি তৈবাৰ এই কৃতিত্বই প্ৰমাণ কৰে। তেওঁৰ কাহিনীয়ে কয় যে; আকাশ সীমা নহয়, আৰম্ভণিহে।
