ইফালে, অনিলৰ পিতৃ কাৰ্তিকে কয়, “মোৰ এটা আশা আছিল যে অনিলে যাতে দৈনিক হাজিৰা কৰিবলগীয়া নহয়। কিন্তু তেওঁ এখোজ আগুৱাই গৈ চৰকাৰী চাকৰি এটা পালে, যিটো আমি কেতিয়াও কল্পনাও কৰা নাছিলো।”
ব্ৰহ্মপুত্ৰৰ উত্তৰ পাৰত বিশাল ধাননি পথাৰেৰে আগুৰি থকা দুটা কোঠাৰ কেচা ঘৰ এটাত পিতৃ-মাতৃ আৰু সৰু ভনীয়েকৰ সৈতে বাস কৰা অনিলৰ গাঁওখনৰ ৮০% তকৈ অধিক লোক আদিবাসী। গাঁওবুঢ়া জয়ন্ত কেওটে কয় যে গাওঁখনৰ দুই এটা পৰিয়ালে প্ৰধানমন্ত্ৰী গ্ৰামীণ আৱাস যোজনাৰ অধীনত ঘৰ লাভ কৰাৰ বাহিৰে উন্নয়ন বুলিবলৈ আন একো নাই।
নিযুক্তি লাভ কৰিবলৈ খানাপাৰা পশু চিকিৎসা বিজ্ঞান মহাবিদ্যালয়ৰ খেলপথাৰত গোট খোৱা প্ৰাৰ্থী
তেওঁ আৰু কয়, “কোনো স্নাতক, চৰকাৰী কৰ্মচাৰী বা ধনী পৰিয়াল নথকা গাঁওখনৰ ভূমিহীন লোকসকলৰ অধিকাংশই দৈনিক মজুৰিৰ ওপৰত নিৰ্ভৰ কৰিবলগীয়া হয়। অনিলৰ সফলতা আমাৰ গাঁওৰ বাবে এক মাইলৰ খুঁটি।”
আনহাতে, সংখ্যালঘু সম্প্ৰদায়ৰ লোকসকলৰ মাজতো বৃহস্পতিবাৰৰ নিযুক্তি প্ৰদান অনুষ্ঠানে এক আশাৰ বতৰা কঢ়িয়াই আনিছে। কাৰণ কোনো ৰাজনৈতিক হস্তক্ষেপ বা পইচা নিদিয়াকৈ সম্পূৰ্ণ মেধা আৰু যোগ্যতাৰ ভিত্তিত বহু সংখ্যক সংখ্যালঘু সম্প্ৰদায়ৰ প্ৰাৰ্থীয়ে চাকৰি পাবলৈ সক্ষম হৈছে।
আৱাজ-দ্য ভইচ'ৰ সন্মুখত নিযুক্তিপ্ৰাপ্ত প্ৰাৰ্থী লোকমান আলীয়ে কয়; "মই পশু চিকিৎসা বিভাগত নিযুক্তি লাভ কৰিছোঁ। আজি মই অত্যন্ত সুখী যে মোৰ স্নাতক ডিগ্ৰী সম্পূৰ্ণ নহওতে চাকৰি লাভ কৰিছোঁ। ডাঙৰ কথাটো হ'ল বৰ্তমান মেধা আৰু যোগ্যতাৰ ভিত্তিত চাকৰি প্ৰদান কৰা হৈছে। হিমন্ত বিশ্ব শৰ্মাৰ দিনত কোনো ধৰণৰ টকা-পইচাৰ লেনদেন নোহোৱাকৈ চাকৰি মানুহে চাকৰি পাবলৈ সক্ষম হৈছে। তাৰ বাবে নতুন চাকৰি প্ৰত্যাসীসকল আশা কৰিব পৰা হৈছে।"
উল্লেখযোগ্য যে, হিমন্ত বিশ্ব শৰ্মা নেতৃত্বাধীন চৰকাৰে ১ লাখ চাকৰি দিয়াৰ প্ৰতিশ্ৰুতি মতে চলিত বৰ্ষৰ জুলাই মাহত পুনৰ ২২৭৬৫ টা নতুন পদৰ বাবে বিজ্ঞাপন মুকলি কৰিব।
